ខេត្តកំពង់ចាម ៖ «សូមកុំគិតពីអ្នកមាន អ្នកក្រ ត្រូវចាត់ទុកអ្នកជំងឺប្រៀបបាននឹងសាច់ញាតិ បងប្អូន កូនក្មួយរបស់ខ្លួនជាមួយនោះគ្រូពេទ្យមេត្តាកុំប្រើពាក្យសំដីអាក្រក់ លុបបំបាត់កុំឲ្យមាន ហើយត្រូវផ្តល់សេវាព្យាបាលស្មើៗគ្នា ថែមទាំងមានបេះដូងស្អាតស្អំទៀតផង » ។ នេះជាប្រសាសន៍ដាស់តឿនរបស់លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលថ្លែងនៅក្នុងពិធីប្រកាសទទួលស្គាល់ជាផ្លូវការមន្ទីរពេទ្យខេត្តកំពង់ចាម ជាមន្ទីរពេទ្យស្រលាញ់ទារក នាព្រឹកថ្ងៃទី២១ តុលា ២០១៤ ។
លោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្តមានប្រសាសន៍ឲ្យដឹងថា មន្ទីរពេទ្យខេត្តកំពង់ចាមបានចាប់អនុវត្តជាមន្ទីរពេទ្យស្រលាញ់ទារកចាប់ពីខែសីហា ឆ្នាំ២០១២ ដោយមានការបណ្តុះបណ្តាលដល់បុគ្គលិកបានយ៉ាងត្រឹមត្រូវ ។ ក្នុងពេលដំណើរការអង្កការយូនីសេហ្វ បានជួយឧបត្ថម្ភនូវផ្ទាំងប៉ាណូរូបស្ត្រីបំបៅកូន និងស្លាកមន្ទីររពេទ្យស្រលាញ់ទារក ។
លោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្តមានប្រសាសន៏បន្តថា ដោយមានការខិតខំប្រឹងប្រែងអស់ពីកម្លាំងកាយចិត្ត និងឆន្ទៈដ៏មោះមុតរបស់មន្ទីរសុខាភិបាល មន្ទីរពេទ្យ ជាពិសេសមន្ត្រីផ្នែកសម្ពពទាំងអស់ក្នុងការសំរេចចិត្តឲ្យបាននូវការអនុវត្តជំហានទាំងដប់នៃការបំបៅកូនដោយទឹកដោះម្តាយប្រកបដោយជោគជ័យដែលនៅក្នុងរយៈពេលនេះមន្ទីរពេទ្យទទួលបានស្ត្រីមកសំរាលកូនក្នុង១ឆ្នាំៗ មានប្រមាណចំនួន៤.០០០នាក់ ។
គ្រប់ស្ត្រីទាំងអស់សុទ្ធតែបានទទួលការគាំទ្រពីគ្រូពេទ្យឆ្មបដើម្បីឲ្យម្តាយចាប់ផ្តើមបំបៅកូនដោយទឹកដោះដំបូងនៅក្នុងអំឡុងម៉ោងដំបូង បន្ទាប់ពីសំរាលទាំងការផ្តល់ការអប់រំអំពីរបៀបបំបៅកូន និងលើកទឹកចិត្តម្តាយឲ្យបំបៅកូនដោយទឹកដោះម្តាយតែមួយមុខគត់រយៈពេល៦ខែ ៕
ចែករំលែកព័តមាននេះ