រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំដណ្តើមខ្សែក្រវាត់ស្រាបៀរលីអូក្នុងប្រភេទទម្ងន់៦០គីឡូក្រាមនៅលើសង្វៀន CTN នាថ្ងៃសៅរ៍ ទី២៥ តុលាសប្តាហ៍នេះ ឈានដល់ទីបញ្ចប់ហើយ ។ សម្រាប់បេក្ខភាពដែលត្រូវប្រកួតនៅក្នុងវគ្គជម្រុះចុងក្រោយនេះមាន ពៅ ស៊ីយ៉េត មកពីក្លិបក្រុងប៉ោយប៉ែត ជួបប្រកួតជាមួយ រឿម វណ្ណៈ មកពីសមាគមកីឡាប្រដាល់ក្រសួងការពារជាតិ និងង៉ែត្រ រដ្ឋា មកពីសមាគមកីឡាប្រដាល់ក្រសួងមហាផ្ទៃ ជួបប្រកួតជាមួយ សេក រតនា មកពីក្លិបសឹករងខេត្តសៀមរាប ។
ពៅ ស៊ីយ៉េត និងរឿម វណ្ណៈ ជួបគ្នាលើកនេះ បើទោះជាអ្នកណាឈ្នះ ក៏គ្មានឱកាសបានឡើងទៅប្រកួតនៅវគ្គបន្តទៀតបានដែរ ដោយសារពួកគេទាំង២នាក់ប្រកួតបាន៦លើក ឈ្នះតែ២លើក និងចាញ់ដល់ទៅ៤លើកឯណោះ។ ចំណែកសេក រតនា ជួបង៉ែត្រ រដ្ឋា លើកនេះក៏មានវាសនាមិនខុសពី ពៅ ស៊ីយ៉េត និងរឿម វណ្ណៈ នោះដែរ ព្រោះលទ្ធផលប្រកួតកន្លងមក គឺចាញ់រហូត ។ ឯង៉ែត្រ រដ្ឋា បានឡើងទៅប្រកួតនៅវគ្គបន្តដោយស្វ័យប្រវត្តិ ទោះបីភ្លាត់ស្នៀតចាញ់លើកនេះក៏ដោយ ។ ទោះបីយ៉ាងណា រឿងទាំងអស់នេះប្រហែលជាមិនកើតឡើងឡើយ ព្រោះសេក រតនា អាចនឹងអវត្តមានដោយសាររបួសមិនទាន់ជាផងក៏មិនដឹង ។
ជាក់ស្តែងកាលពីសប្តាហ៍មុន សេក រតនា ក៏បានអវត្តមានមិនបានមកប្រកួតរួចម្តងមកហើយ ដូច្នេះនៅសប្តាហ៍នេះកីឡាកររូបនេះអាចនឹងបោះបង់ការប្រកួតរបស់ខ្លួនចោល ព្រោះតែដឹងខ្លួនថា ទៅមិនរួចជាមួយគូប្រកួត ៕
ចែករំលែកព័តមាននេះ