រាជធានីភ្នំពេញ ៖ បុរសអ្នករត់ម៉ូតូឌុបម្នាក់ត្រូវជនសង្ស័យកាប់នឹងកូនពូថៅដៃបណ្តាលឱ្យបែកក្បាលហូរឈាមកក្លាក់ បង្កឱ្យមានការភ្ញាក់ផ្អើលកាលពីវេលាម៉ោង៨ និង៣០នាទីព្រឹក ថ្ងៃទី២១ តុលា ២០១៤ ក្នុងភូមិអូរអណ្ដូង សង្កាត់ព្រែកប្រា ខណ្ឌច្បារអំពៅ។
ក្រោយពេលកើតហេតុការណ៍ខាងលើនេះកើតឡើងសមត្ថកិច្ចបានចុះអន្តរាគមន៍ឡោមព័ទ្ធចាប់ខ្លួនជនដៃដល់បានភ្លាមៗបញ្ជូនមកកាន់អធិការនគរបាលខណ្ឌច្បារអំពៅដើម្បីចាត់ការតាមផ្លូវច្បាប់។
បើតាមមន្ត្រីមូលដ្ឋានបានឲ្យដឹងថា មុនពេលកើតហេតុ ជនរងគ្រោះបានឌុបសង្ស័យពីស្ពានច្បារអំពៅឆ្ពោះមកចំណុចកន្លែងកើតហេតុ ពេលនោះជនសង្ស័យបានប្រាប់ បុរសអ្នករត់ម៉ូតូឌុបឲ្យឈប់ដើម្បីចូលផ្ទះយកលុយឲ្យថ្លៃម៉ូតូឌុប ប៉ុន្តែពេលចេញមកវិញ បែរជាមានកាន់ពូថៅ រួចកាប់លើជនរងគ្រោះពីក្រោយធ្វើឲ្យផ្អើលដល់អ្នកជិតខាង និងសមត្ថកិច្ចព័ទ្ធចាប់ជនសង្ស័យបានភ្លាមៗតែម្តង ។
សមត្ថកិច្ចបានឲ្យដឹងថា ជនសង្ស័យឈ្មោះដាលីន អាយុ២៥ឆ្នាំ ភេទប្រុស មុខរបរដើរឆក់ ទីលំនៅមិនពិតប្រាកដ ។ ចំណែកជនរងគ្រោះឈ្មោះ សុខ ក្រៃ អាយុ២៦ឆ្នាំ ភេទប្រុស មុខរបររត់ម៉ូតូឌុប មានទីលំនៅសង្កាត់ព្រែកប្រា ខណ្ឌច្បារអំពៅ ។ ទោះជាយ៉ាងណាគេមិនទាន់ដឹងថា ករណីនេះជាករណីប្លន់ ឬជាគំនុំនោះទេ ៕
ចែករំលែកព័តមាននេះ