កំពូលអ្នកប្រើកណ្តាប់ដៃឆ្វេងសឺចូ ម៉ាទីនេសបានបង្ហាញពីបំណងរបស់ខ្លួនក្នុងការជួបប្រកួតជាមួយកីឡាករអាមេរិកហ្វ្លយ មេវេដឌ័រ ប៉ុន្តែបានបន្លុយពាក្យថា ខ្លួនក៏នឹងមិនលង់លក់ក្នុងការរង់ចាំជួបជាមួយមេវេដឌ័រ នោះដែរ ។ ម្ចាស់ជើងឯកពិភពលោកក្នុងប្រភេទទម្ងន់ Middleweight រូបនេះបានបញ្ជាក់ថា ៖ «មេវេដឌ័រ ចូលចិត្តពង្វាងហេតុការណ៍ ដូច្នេះវាជារឿងស្មុគស្មាញក្នុងការរត់តាមគេ» ។
កីឡាករវ័យ៣៩ឆ្នាំរូបនេះបានបន្តថា ៖ «ខ្ញុំត្រូវតែស្វែងរកផ្លូវដើរដោយខ្លួនឯង ហើយប្រសិនជាកីឡាករមេវេដឌ័រយល់ព្រម នោះពិតជាអព្ភូតហេតុមួយហើយ ។ សម្រាប់ខ្ញុំ គ្មានការសង្ស័យទេដែលថា មេវេដឌ័រ គឺជាជើងខ្លាំងក្នុងលោកនោះ ។ ខ្ញុំតែងតែចង់ជួបជាមួយជើងខ្លាំងបែបនេះ ដ្បិតវានឹងក្លាយជាឱកាសដ៏អស្ចារ្យមួយសម្រាប់ខ្ញុំ» ។
ជាមួយនឹងខ្សែក្រវាត់ពិភពលោក៥ប្រភេទទម្ងន់ មេវេដឌ័រ ពុំមានប្រវត្តិចាញ់ម្តងណាឡើយ។ សម្រាប់ម៉ាទីនេសវិញ មុននឹងឡើងសង្វៀនប្រកួតម្តងទៀត គេចាំបាច់ត្រូវតែធ្វើការព្យាបាលឱ្យជាសះស្បើយនូវរបួសដៃឆ្វេងព្រមទាំងត្រូវវះកាត់ក្បាលជង្គង់ផងដែរ ។
គេបាននិយាយថា ៖ «របួសដៃឆ្វេងខ្ញុំជាសះស្បើយស្ទើរទាំងស្រុងហើយ ប៉ុន្តែវាឈឺចាប់បន្តិចបន្តួចប៉ុណ្ណោះ នេះក៏ព្រោះតែខ្ញុំបាក់ឆ្អឹងពីរកន្លែង ។ ចំណែកក្បាលជង្គង់វិញ ក៏មានសភាពល្អច្រើនហើយដែរ ពោលគឺក្រោយការវះកាត់មួយលើកកាលពីថ្ងៃទី១២ ខែវិច្ឆិកា ឆ្នាំ២០១២» ។
ម៉ាទីនេស និយាយថា ខ្លួនសង្ឃឹមថា បញ្ហារបួសនៅសេសសល់នឹងជាសះស្បើយអាចប្រកួតបានជាថ្មីម្តងទៀត ។ គេបញ្ជាក់ថា ៖ «ចាប់ពីពេលនេះទៅ ការត្រៀមខ្លួនរបស់ខ្ញុំ គឺរួចរាល់ ។ ពេលនេះ ខ្ញុំមានអាយុជិត៤០ឆ្នាំហើយ ដូច្នេះបើនិយាយពីការវះកាត់ គឺពិតជាមិនដូចកាលពីអាយុ២០ឆ្នាំទេ» ។
សូមបញ្ជាក់ថា ម៉ាទីនេស មានឯតទគ្គកម្មប្រកួតឈ្នះ៥១លើក ចាញ់៣ ស្មើ២ និងធ្លាប់ផ្តួលដៃគូឱ្យសន្លប់ចំនួន២៨លើក ។ ប្រកួតលើកចុងក្រោយកាលពីថ្ងៃទី៧ ខែមិថុនា ឆ្នាំនេះ នៅសង្វៀន Madison Square Garden សហរដ្ឋអាមេរិក ចាញ់កីឡាករព័រតូរីកូ Miguel Cotto ក្នុងទឹកទី១០ បាត់បង់ខ្សែក្រវាត់ស្ថាប័ន WBC ក្នុងប្រភេទទម្ងន់ Middleweight ៕
ចែករំលែកព័តមាននេះ