រាជធានីភ្នំពេញ ៖ អស់រយៈពេលជាច្រើនឆ្នាំមកហើយ អតីតតារាភាពយន្តមានឈ្មោះល្បីល្បាញជំនាន់ទសវត្សទី៩០ អ្នកស្រីហុក លក្ខិណា បានកាត់ផ្តាច់ពីជីវិតសិល្បៈ ដែលជោកជាំដោយភាពជោគជ័យទៅផ្ញើកាយនៅលើទឹកដីដែនកោះអូស្ត្រាលី ។ ប្រភពពីមិត្តជិតដិតរបស់តារាភាពយន្តថ្ពាល់ខួច សម្រស់ស្អាត គួរឲ្យគយគន់ម្នាក់នេះ បានបញ្ជាក់ថា ហុក លក្ខិណា បានក្លាយជាមនុស្សសាមញ្ញម្នាក់ មិនចង់មានមុខនៅលើសិល្បៈទៀតទេ ក្រៅពីរស់នៅមើលថែកូន និងស្វាមីឲ្យមានសុភមង្គលតាមបែប ស្ត្រីជាមេគ្រួសារ នោះជាសេចក្តីសុខដែលអ្នកស្រីចង់បាន។
អ្នកស្រីហុក លក្ខិណា មិនដែលបានបង្ហាញវត្តមាន និងរូបសម្រស់ពិតជូនមហាជននៅស្រុកខ្មែរបានដឹងអំពីដំណើរវិវត្តន៍នៃរូបរាងកាយម្តងណាទេតាំងពីឃ្លាតឆ្ងាយ ពីមាតុភូមិកម្ពុជាអស់រយៈពេលជាច្រើនឆ្នាំមកនោះ។ អ្នកស្រីតែងតែត្រឡប់មកមាតុភូមិរបស់ខ្លួនជួបជុំបងប្អូន ឪពុក ម្តាយ បានប៉ុន្មានលើកដែរ ប៉ុន្តែធ្វើឡើងក្នុងសភាព ស្ងប់ស្ងាត់ សាមញ្ញធម្មតាប៉ុណ្ណោះ ថែមទាំងឆ្លៀតពេលធ្វើបុណ្យទានតាមភូមិស្រុកមួយចំនួនទៀតផង ។
មានទស្សនិកជនជាច្រើនដែលនៅចងចាំកេរ្តី៍ឈ្មោះតារាភាពយន្តល្បីល្បាញ និងមានជំនាញខាងរាំរបាំបុរាណខ្មែរដ៏ល្វតល្វន់ អ្នកស្រី ហុក លក្ខិណា ម្នាក់ៗ តែងតែចង់ ដឹងថាតើ ការចាកចេញទៅរស់នៅប្រទេសអូស្ត្រាលីអស់រយៈកាលរាប់ឆ្នាំមកនេះ ស្ថានភាពគ្រួសារ និងសេចក្តីសុខនៃវិថីជីវិតនៅលើដែនដីអាណាចក្រផ្សេងទទួលបាន លទ្ឋផលបែបណា ក្នុងនាមជាតារាធ្លាប់ទទួលបានការគាំទ្រពីសំណាក់មហាជនកាលពីនៅក្នុងស្រុកខ្មែរ ។
តាមប្រភពពីមិត្តជិតដិតម្នាក់ដែលទើបតែបានទៅកម្សាន្តជាលក្ខណៈគ្រួសារនៅប្រទេសអូស្ត្រាលី កាលពីពេលថ្មីៗនេះ និងបានជួបចៃដន្យជាមួយអតីតតារាភាពយន្ត ហុក លក្ខិណា បានបញ្ជាក់ពីដំណើរជីវិតមួយចំនួនរបស់ ហុក លក្ខិណា តាមរយៈអ្នកយកព័ត៌មានកោះសន្តិភាពថា « ហុក លក្ខិណា ពេលនេះមានវ័យជាង៤០ឆ្នាំហើយ តែរូបសម្រស់របស់គាត់នៅស្អាត តែស្អាតបែបមនុស្សចូលវ័យចំណាស់បន្តិច ពោលប្រែប្រួលជាងមុនតាមកាលវេលានោះឯង ។
ហុក លក្ខិណា គាត់បានប្រាប់ ថាអាជីពសិល្បៈ គឺបញ្ចប់ជាផ្លូវការហើយ ព្រោះតែអាយុច្រើន មិនស្អាតដូចនៅក្មេងកាលពីមុនទេ ពោលសុំនៅក្នុងនាមជាពលរដ្ឋធម្មតា ប៉ុន្តែរាល់សិល្បៈដែលមាននៅក្នុងប្រទេសកំណើត គឺនៅតែស្រលាញ់គាំទ្រ និងសរសើរពីភាពរីកច្រើនវិស័យសិល្បៈក៏ដូចជាភាពរីកចម្រើនរបស់ប្រទេសជាតិ » ។ ប្រភពដដែលបានបន្តឲ្យដឹងទៀតថា « ហុក លក្ខិណា បានចេញពីស្រុកខ្មែរឆ្នាំ១៩៩៧មកម្ល៉េះ ដោយសម្តែងនៅអូស្ត្រាលី រួចមកក៍បានជួបស្នេហាជាមួយបុរសខ្មែរ អាណិកជនរស់នៅទីនោះស្តីដណ្តឹងរស់នៅជាមួយគ្នាក្នុងនាមជាប្តីប្រពន្ឋរហូតមកដល់សព្វថ្ងៃបានកូន២នាក់ ប្រុស១ ស្រី១ ។
ស្វាមី ហុក លក្ខិណា ពីមុនជាអ្នករស់នៅប្រទេសញូវហ្សើរលែនទេ តែប្តូរមកនៅអូស្ត្រាលីចំពេល ហុក លក្ខិណា ទៅសម្តែងក៏បានចងក្រងស្នេហាតែម្តង ។ ជីវិតរបស់ ហុក លក្ខិណា រស់នៅប្រទេសគេមិនខុសពីបងប្អូនខ្មែរយើងដ៍ទៃទៀតដែរ គាត់ពីមុនលំបាកណាស់ មិនចេះអង់គ្លេសទេ ខំធ្វើការបម្រើគេតាំងពីមិនទាន់ចេះភាសារហូត អាចចេះចាំបានប្រើការយ៉ាងស្ទាត់ជំនាញ ។ ពេលនេះក្រៅពីភាសាអង់គ្លេសប្រើការបាន ហុក លក្ខិណា ចេះភាសាឡាវ ថៃ និង ចិន ទៀតផង ព្រោះកាលពីលំបាក សុទ្ឋតែធ្លាប់ទៅធ្វើការនៅតាមហាងបណ្តាជាតិសាសន៍ដ៍ទៃ ។
សព្វថ្ងៃ ហុក លក្ខិណា រស់នៅក្នុងផ្ទះវីឡាមួយដែលមានដីធ្លីធំគ្រាន់បើ អ្នកនាងធូរធារជីវភាពជាងមុនច្រើន មានផ្ទះជាកម្មសិទ្ឋិផ្ទាល់ខ្លួន ដោយផ្ទះនោះមានដីធំនៅមុខផ្ទះរបស់គាត់ដាំសុទ្ធតែបន្លែខ្មែរយើង ដូចជាត្រកួន ស្ពៃ ផ្កាស្នោ ពពាយ ស្ទើរតែមិននឹកស្មានថា គាត់អាចដាំបាន និងមិនភ្លេចរបស់ខ្មែរ ។ អ៊ីចឹងហើយបងប្អូនខ្មែរយើង ដែលដឹងថាផ្ទះហុក លក្ខិណាមានបន្លែខ្មែរ គឺគាត់តែងតែមកទិញ ឬមកសុំបេះបន្លែខ្មែរយើងមើលទៅបង្កើតភាពស្និទ្ធស្នាលណាស់។
ពេលនេះ ហុក លក្ខិណា មានហាងសំអាងការ និងរក្សាសម្រស់នៅអូស្ត្រាលី ឯស្វាមីមានមុខរបរជាអ្នករត់តាក់ស៊ី តែអ្នករត់តាក់ស៊ីស្រុកនោះមិនមែនបានមកដោយ ស្រួលនោះទេ បើអ្នកបានឈ្មោះ ឬសិទ្ឋិជាអ្នករត់តាក់ស៊ីទាល់តែស្គាល់ភូមិសាស្ត្រនៅទីនោះច្បាស់ គ្រប់ច្រក ទើបគេឲ្យហើយការទិញសិទ្ធិក៏មានតម្លៃថ្ងៃ ប៉ុន្តែស្វាមីលក្ខិណា គាត់ទទួលបានការផ្តល់សិទ្ធិនេះជាសិទ្ធិមួយកម្របាន ៕
ចែករំលែកព័តមាននេះ