កីឡាករអេស្ប៉ាញ រ៉ាហ្វាអែល ណាដាល់ បានចាប់ផ្តើមយុទ្ធនាការដណ្តើមយកពានជើងឯកកម្មវិធី Swiss Indoors ជាលើកទី១ របស់ខ្លួនជាមួយនឹងជ័យជម្នះលើកីឡាករអុីតាលី Simone Bolelli កាលពីថ្ងៃចន្ទទី២០ តុលា ។ ការប្រកួតក្នុងជុំទី១ នេះត្រូវបានរៀបចំធ្វើនៅទីក្រុង Basel ប្រទេសស្វ៊ីស ។
កីឡាករអេស្ប៉ាញ រ៉ាហ្វាអែល ណាដាល់ បានចាប់ផ្តើមយុទ្ធនាការដណ្តើមយកពានជើងឯកកម្មវិធី Swiss Indoors ជាលើកទី១ របស់ខ្លួនជាមួយនឹងជ័យជម្នះលើកីឡាករអុីតាលី Simone Bolelli កាលពីថ្ងៃចន្ទទី២០ តុលា ។ ការប្រកួតក្នុងជុំទី១ នេះត្រូវបានរៀបចំធ្វើនៅទីក្រុង Basel ប្រទេសស្វ៊ីស ។
ណាដាល់ បានប្រើអស់ពេល៧១នាទីយកឈ្នះ Bolelli ក្នុងលទ្ធផល៦-២ និង៦-២ឈានចូលដល់ជុំទី២ ដោយក្តីរីករាយ ។
ក្នុងនាមជាម្ចាស់ពានជើងឯកក្របខ័ណ្ឌធំ១៤ជំនាន់ កីឡាករវ័យ២៨ឆ្នាំរូបនេះចាំបាច់ត្រូវតែធ្វើឱ្យបានល្អបំផុតដ្បិតឱកាសចូលរួមក្នុងព្រឹត្តិការណ៍ដំណាច់ឆ្នាំ ATP World Tour Finals ដែលនឹងចូលមកដល់នាខែក្រោយរំពឹងទៅលើលទ្ធផលនៅទីនេះ និងនៅទីក្រុងប៉ារីសសប្តាហ៍ក្រោយ ។
នៅជុំបន្ទាប់ រូបគេគឺត្រូវជួបប្រកួតជាមួយកីឡាករបារាំង Pierre-Hugues Herbert ដែលបានបំបាក់មិត្តរួមជាតិ Edouard Roger-Vasselin ក្នុងលទ្ធផល៦-៣, ៦-៧ និង៧-៦ ។ ថ្លែងក្រោយពីទទួលបានជ័យជម្នះ កីឡាករលំដាប់ទី៣ ពិភពលោករូបនេះបានបញ្ជាក់ថា៖ «សម្រាប់ខ្ញុំ នេះជាជ័យជម្នះដ៏សំខាន់បំផុត ។ ការប្រកួតលើកនេះមិនមានកំហុសច្រើន រឹងមាំនិងល្អច្រើន ។ អ្វីដែលពិសេស គឺខ្ញុំរៀបចំខ្លួនជាមុនបានយ៉ាងល្អសម្រាប់ការជួបជាមួយកីឡាករ Bolelli លើកនេះ ។ ខ្ញុំត្រូវតែរក្សាទុកការប្រកួតជាមួយកីឡាករនេះក្នុងចិត្ត ។ បើទោះណា ខ្ញុំមិនទំនងជាអាចជួបប្រកួតជាមួយគេជាថ្មីទៀត ប៉ុន្តែខ្ញុំចាំបាច់ត្រូវដឹងពីបច្ចេកទេសរបស់គេ» ។ ណាដាល់ បានបន្ថែមថា ៖ «វាជារឿងប្រពៃបំផុតដែលបានមកប្រកួតនៅទីនេះក្រោយអវត្តមានអស់រយៈពេល១០ឆ្នាំ ហើយវាក៏ជាអារម្មណ៍ដ៏អស្ចារ្យមួយផងដែរ ។ ខ្ញុំនឹងធ្វើឱ្យបានល្អបំផុតសម្រាប់ជុំក្រោយៗដើម្បីទទួលបានឱកាសចូលប្រកួតក្នុងព្រឹត្តិការណ៍ដំណាច់ឆ្នាំនៅទីក្រុងឡុងដ៍» ។
គួរកត់សម្គាល់ថា សម្រាប់ណាដាល់ នេះគឺជាកម្មវិធីទី៣ ហើយដែលចេញមុខប្រកួតគិតចាប់តាំងពីពេលដែលរូបគេរងរបួសកដៃអំឡុងព្រឹត្តិការណ៍ធំ Wimbledon ។ ឡើងទៅជុំបន្ទាប់ក្នុងពេលជាមួយគ្នានោះផងដែរ គឺមានកីឡាករអាមេរិក Donald Young និងកីឡាករបែលហ្ស៊ិក David Goffin ជាដើម។ Young បានបំបាក់កីឡាករអាហ្សង់ទីន Carlos Berlocq ក្នុងលទ្ធផល៧-៦ និង៦-៤ ។ នៅជុំបន្ទាប់គេនឹងជួបជាមួយមិត្តរួមជាតិ Steve Johnson ឬ Milos Raonic ។ ឯ Goffin បានបំបាក់កីឡាករអូទ្រីស Dominic Thiem ក្នុងលទ្ធផល៧-៦ និង៦-៣ ។ នៅជុំបន្ទាប់គេនឹងប៉ះជាមួយកីឡាករក្រូអាស៊ី Ivan Ddig ឬកីឡាករម្ចាស់ផ្ទះ Marco Chiudinelli ៕
ចែករំលែកព័តមាននេះ