រដ្ឋាភិបាលជបុ៉នប្រកាសកាលពីថ្ងៃទី២០ តុលា ថា នឹងបញ្ជូនមន្ត្រីមួយក្រុមទៅកាន់កូរ៉េខាងជើងដើម្បីប្រមូលព័ត៌មាននៃការស្រាវជ្រាវរបស់ក្រុងព្យុងយ៉ាងលើវាសនារបស់ជនជាតិជបុ៉នជាច្រើននាក់ ដែលត្រូវចាប់ពង្រត់ដោយរដ្ឋាភិបាលកូរ៉េខាងជើងចាប់តាំងពីច្រើនទសវត្សមកហើយ ។
លោកយូ៉ស៊ីហុីដ ស៊ូហ្គា អគ្គលេខាធិការនៃរដ្ឋាភិបាលជបុ៉នប្រកាសក្នុងសន្និសីទសារព័ត៌មានមួយថា មន្ត្រីមួយក្រុមក្នុងនោះរួមមានលោកជូនីជី ថារ៉ា អគ្គនាយកកិច្ចការអាស៊ី និងអូសេអានី នៃក្រសួងមហាផ្ទៃជបុ៉នផងនឹងត្រូវបញ្ជូនទៅកូរ៉េខាងជើង ។ លោកបន្តថា កាលបរិច្ឆេទនៃទស្សនកិច្ចនេះនៅពុំទាន់កំណត់នៅឡើយ ។កូរ៉េខាងជើងកាលពីខែឧសភាកន្លងមកនេះបានយល់ព្រមបង្កើតក្រុមស្រាវជ្រាវកម្រិតខ្ពស់មួយ ដើម្បីតាមស្វែងរកបណ្តាជនជាតិជបុ៉នដែលរបបកូរ៉េខាងជើងចាប់ពង្រត់កាលពីទសវត្សឆ្នាំ១៩៧០ និង១៩៨០ ។
ជាថ្នូរវិញ ជបុ៉នប្រកាសពីការលុបចោលទណ្ឌកម្មជាឯកតោភាគីមួយផ្នែកប្រឆាំងកូរ៉េខាងជើង តែបញ្ជាក់ថា ទណ្ឌកម្មទាំងនោះអាចត្រូវដាក់ជាថ្មី ប្រសិនបើជបុ៉នពិនិត្យឃើញថា ការសើុបអង្កេតរបស់ក្រុងព្យុងយ៉ាងគ្រាន់តែចង់ឱ្យចំណេញពេលវេលានោះ ។
យោងតាមកិច្ចព្រមព្រៀងរវាងក្រុងតូក្យូ និងក្រុងព្យុងយ៉ាងថា កូរ៉េខាងជើងត្រូវចេញផ្សាយរបាយការណ៍ដំបូងរបស់ខ្លួនពីការស្រាវជ្រាវរវាងដំណាច់រដូវក្តៅ និងដើមរដូវស្លឹកឈើជ្រុះនេះ ក៏បុ៉ន្តែក្រុងព្យុងយ៉ាងប្រកាសកាលពីខែមុនថា ការស្រាវជ្រាវនៅពុំទាន់មានការរីកចម្រើនគ្រប់គ្រាន់នៅឡើយ ៕
ចែករំលែកព័តមាននេះ