ខេត្តកណ្តាល ៖ នគរបាលប៉ុស្តិ៍រដ្ឋបាលឃុំដីឥដ្ឋ បានឃាត់ខ្លួនបុរសម្នាក់បញ្ជូនទៅអធិការដ្ឋាននគរបាលស្រុកកៀនស្វាយ កាលពីរសៀលថ្ងៃទី១៩ តុលា បន្ទាប់ពីទទួលបានពាក្យបណ្តឹងពីស្ត្រីម្នាក់ដែលប្តឹងចោទប្រកាន់ថា បានចាប់រំលោភរូបគាត់ កាលពីវេលាម៉ោង៨យប់ថ្ងៃទី១៨ តុលា នៅកៀនរបងអែបផ្លូវលំមួយកន្លែង ស្ថិតក្នុងភូមិពពាលខែ២ ឃុំដីឥដ្ឋ ស្រុកកៀនស្វាយ ខណៈពេលស្ត្រីរូបនេះត្រទ្បប់មកពីទិញថ្នាំពេទ្យវិញ ។
លោកអនុសេនីយ៍ទោ អ៊ុង ស៊ីទ្បាក់ នាយប៉់ុស្តិ៍នគរបាលរដ្ឋបាលដីឥដ្ឋបានឱ្យដឹងថា ជនដែលចាប់ខ្លួននោះឈ្មោះ ឆាត រ៉ា អាយុ៣៣ឆ្នាំ មានប្រពន្ធកូនហើយ រស់នៅក្នុងភូមិឃុំកើតហេតុខាងលើ ។ ចំណែកស្ត្រីរងគ្រោះអាយុ៤២ឆ្នាំ ជាកសិករមានប្តីនិងកូនចៅហើយដែរ ។ តាមស្ត្រីរងគ្រោះដែលមកប្តឹងសមត្ថកិច្ចបានឱ្យដឹងថា នៅថ្ងៃទី១៨ តុលានោះ វេលាម៉ោង៨យប់ រូបគាត់បានដើរមកទិញថ្នាំពេទ្យ នៅតាមបណ្តោយផ្លូវស្រែអំបិល ស្ថិតក្នុងភូមិឃុំខាងលើ ។
លុះពេលដើរត្រទ្បប់ទៅផ្ទះវិញបានប្រហែលជាង១០ម៉ែត្រ ក៏ជួបនឹងជនឈ្មោះ ឆាត រ៉ា ដើរចេញពីកូនរោងមួយសំដៅមករកគាត់ ហើយនិយាយពាក្យលួងលោមសុំស្រទ្បាញ់ ប៉ុន្តែគាត់ប្រកែកថា ស្រទ្បាញ់ស្អីគាត់មានប្តីមានកូននិងមានចៅហើយ ចំណែកអ្នកឯងក៏មានប្រពន្ធកូនដែរ ។ ពេលនិយាយរួចរូបគាត់ក៏បន្តដំណើរសំដៅទៅផ្ទះ ស្រាប់តែដើរបានបន្តិចជនឈ្មោះ ឆាត រ៉ា បានហក់មកចាប់រូបគាត់ផ្តួលទៅនឹងដី ហើយយកដៃច្របាច់.កគំរាមមិនឱ្យស្រែក ។ ទោះបីជាយ៉ាងណា រូបគាត់នៅតែរើបម្រះស្រែកឱ្យគេជួយ តែគ្មានអ្នកណាជួយនិងប្រឹងបម្រះរហូតអស់កម្លាំងស្រែកលែងរួច ក៏ត្រូវជននេះរំលោភរហូតបានសម្រេច ។ លុះព្រឹកទ្បើងថ្ងៃទី១៩ តុលា រូបគាត់ក៏មកដាក់ពាក្យបណ្តឹងនៅប៉ុស្តិ៍នគរបាល ។
លោកនាយប៉ុស្តិ៍បានឱ្យដឹងទៀតថា ក្រោយពីទទួលពាក្យបណ្តឹងភ្លាម រូបលោកបានឆ្លងយោបល់លោក ប៉ា សំអិត អធិការនគរបាលស្រុកកៀនស្វាយ ហើយលោកអធិការក៏បញ្ជាឱ្យរូបលោកដឹកនាំកម្លាំងចុះទៅឃាត់ខ្លួនជនឈ្មោះ ឆាត រ៉ា នារសៀលថ្ងៃទី១៩ តុលា និងបញ្ជូនមកអធិការដ្ឋាននគរបាលស្រុក ដើម្បីសាកសួរនិងកសាងសំណុំរឿងបញ្ជូនទៅស្នងការដ្ឋាននគរបាលខេត្ត ចាត់ការបន្តតាមផ្លូវច្បាប់ ៕
ចែករំលែកព័តមាននេះ