យោងតាមការប្រកាសព័ត៌មានរបស់វេទិកាសង្គមសីុវិលមិនមែនរដ្ឋាភិបាលស្ដីពីកម្ពុជាបានឱ្យដឹងថា អង្គការសង្គមស៊ីវិល និងអង្គការមិនមែនរដ្ឋាភិបាលព្រមទាំងតំណាងសហគមន៍មកពីខេត្តមណ្ឌលគិរី រតនគិរី កំពង់ធំ កំពង់ស្ពឺ ស្ទឹងត្រែង ក្រចេះ នឹងជួបជុំគ្នាដើម្បីធ្វើសន្និសីទកាសែតមួយដែលរៀបចំដោយវេទិកានៃអង្គការមិនមែនរដ្ឋាភិបាលស្តីពីកម្ពុជា ដើម្បីសម្តែងកង្វល់របស់ពួកគេអំពីការកើនឡើងនៃការកាប់ឈើខុសច្បាប់ និងការបំផ្លាញធនធានធម្មជាតិ ដែលជាផលវិបាកពីការផ្តល់សម្បទានដីសេដ្ឋកិច្ច ។
ពួកគេបានអំពាវនាវនិងធ្វើសំណូមពរផងដែរសូមឲ្យអ្នកធ្វើសេចក្តីសម្រេចចិត្តយកចិត្តទុក ដាក់លើបញ្ហានិងរិះរកដំណោះស្រាយជាមួយអនុសាសន៍នានាដែលពួកគេជឿថានឹងជួយពង្រឹងការប្រតិបត្តិច្បាប់ និងធានាឲ្យបាននូវការគ្រប់គ្រងប្រកបដោយនិរន្តរភាពលើព្រៃឈើដែលនៅសល់របស់កម្ពុជា ។ តាំងពីឆ្នាំ២០១២ ដល់កំឡុងខែតុលា ឆ្នាំ ២០១៤មក មានករណីកាប់ឈើខុសច្បាប់និងការរត់ពន្ធឈើចំនួន៨១២លើកដែលត្រូវបានចុះផ្សាយដោយសារព័ត៌មានផ្សេងៗក្នុងស្រុក។ ក្នុងឆ្នាំ២០១៣គម្របព្រៃឈើត្រូវបានគេរកឃើញថាបានថយចុះរហូតដល់៤៦% ។ មានការកត់សសម្គាល់ថា ចាប់តាំងពីដើមឆ្នាំ២០១២ ការលាងសម្អាតឈើខុសច្បាប់បានបង្កើតឱ្យមានមន្ទិលសង្ស័យជាច្រើន ។
ជាក់ស្ដែងមួយក្នុងចំណោមរឿងបំផ្លាញឈើដ៏រង្គាល់គឺឈើប្រណីតចំនួនជាង៣.០០០កំណាត់ ដែលក្រុមឈ្មួញលាក់ទុកលើទីតាំងដីក្រុមហ៊ុនដាយណាមត្រូវប្រជាសហគមន៍ភូមិអន្ទ្រងសែនជ័យ ឃុំពូជ្រៃ ស្រុកពេជ្រាដា ខេត្តមណ្ឌលគិរី ធ្វើការបង្ក្រាបជំនួសមន្ត្រីជំនាញគ្រាដែរជំនួញព្រៃឈើប្រណីតកំពុងកើតមានពេញបន្ទុកស្របពេលសមត្ថកិច្ចពាក់ព័ន្ធគ្រប់ស្ថាប័នសម្ងំបិទភ្នែកដេកទាំងថ្ងៃ ។ ប្រជាសហគមន៍ភូមិអន្ទ្រងសែនជ័យបានឲ្យដឹងថា ឈើប្រណីតដែលពួកគាត់ចាប់នេះកាលពីថ្ងៃទី១៨ តុលា នោះមានចំនួន៣.២២១កំណាត់ ហើយបានរាយការណ៍ជូនមន្ត្រីជំនាញរួចហើយ ក៏ប៉ុន្តែរហូតមកដល់ថ្ងៃទី២០ តុលា គេនៅមិនទាន់ឃើញមានមន្ត្រីជំនាញចុះមកធ្វើការនៅឡើយទេ ។ តែទោះជាយ៉ាងណាពួកគាត់បានដាក់វេនគ្នា ដេកយាមលុះត្រាមានចំណាត់ការពី មន្ត្រីជំនាញទើបដកថយ ។
ប្រភពពីប្រជាពលរដ្ឋរស់នៅតំបន់នោះ បានអះអាងឲ្យដឹងថា ឈើប្រណិតខុសច្បាប់រាប់ពាន់កំណាត់ទាំងនោះ គឺក្រុមពួកឈ្មួញបានធ្វើសកម្មភាពដោយប្រើម៉ាស៊ីនយន្តអារកាត់រំលំ យកគ្រឿងចក្រឈូសផ្ដួល និងដឹកជញ្ជូនចេញពីក្នុងតំបន់ព្រៃអភិរក្សជីវចម្រុះសីមា និងដែនជំរកសត្វព្រៃភ្នំព្រេច(ដឹកតាមត្រាក់ទ័រ)។ ឈើប្រណីតខុសច្បាប់ខាងលើសុទ្ធសឹងជាប្រភេទឈើធ្នង់ ដែលមានទំហំមុខកាត់តូចធំមានប្រវែង វែងខ្លីនិងមានចំនួនរាប់ពាន់កំណាត់នោះ គឺត្រូវបានពួកឈ្មួញរកស៊ីឈើខុសច្បាប់ឈ្មោះណុប មានតួនាទីជាមេការក្រុមហ៊ុនដាយណាម និងជាមេឈ្មួញចាំប្រមូលទិញធំជាងគេនៅតំបន់នោះ ដោយឲ្យតម្លៃក្នុងមួយម៉ែត្រគូបចំនួន១លានរៀល ថែមទាំងបានគំរាមកំហែងប្រជាជននៅតំបន់នោះថា បើមិនលក់ឲ្យនិងចាប់យក ហើយបើព្រមលក់វិញគឺក្នុងមួយម៉ែត្រគូបតម្លៃ ១លានរៀល ។ នេះបើតាមការប្រាប់ឲ្យដឹងពីសំណាក់អ្នកស្រុក ។
លោក សំរ៉ង ឌីវិចិត្រ នាយកដែនជម្រកសត្វព្រៃភ្នំព្រេចបានឲ្យដឹងថា ជុំវិញព័ត៌មានខាងលើលោកបានឲ្យមន្ត្រីរបស់លោកចុះដល់ទីតាំងស្តុកឈើខុសច្បាប់នោះហើយ ។ ពេលនេះកំពុងសុំគោលការណ៍ខេត្តធ្វើការដឹកជញ្ជូនមករក្សាទុក ។ ចំពោះករណីឈើប្រណីតទាំងនោះជាប់ពាក់ព័ន្ធជាមួយក្រុមហ៊ុនដាយណាម ឬយ៉ាងណា លោកមិនទាន់ហ៊ានអះអាងទេ ព្រោះគំនរឈើទាំងនោះស្ថិតនៅក្រៅក្រុមហ៊ុន គឺនៅលើដីដែលមានទំនាស់ជាង៣000ហិកតានៅចំណុចនោះ ផងដែរ ។ ចំណែកលោកនួន សារ៉ន អភិបាលស្រុក ពេជ្រាដា បានឲ្យដឹងថា មន្ត្រីរបស់លោកកំពុងចុះទៅទីតាំងស្តុកឈើនោះហើយ។
ប្រភពក្រៅផ្លូវការពីក្រុមឈ្មួញរកស៊ីឈើបាននិយាយថា ចំនួនឈើប្រណីតដែលប្រជាពលរដ្ឋចាប់ប្រគល់ឲ្យសមត្ថកិច្ចនោះ ប្រសិនបើគេអាចនាំយកទៅលក់ដល់ទីផ្សារនៅប្រទេសវៀតណាមអាចមានតម្លៃដល់រាប់លានដុល្លារឯណោះ ៕
ចែករំលែកព័តមាននេះ