សារព័ត៌មានក្រុងហ្សឺណែវ ប្រទេសស្វ៊ីស បានផ្សាយកាលពីពេលថ្មីៗនេះដោយយោងតាមរបាយការណ៍ប្រចាំឆ្នាំរបស់សហព័ន្ធកាកបាទក្រហម និងគ្រោះមហន្តរាយអន្តរជាតិ (IFRC) ស្តីពីគ្រោះធម្មជាតិ កាលពីឆ្នាំមុនថា បានសម្លាប់មនុស្សសរុប២២.៤៥២នាក់ ។ ក្នុងចំនួននោះអ្នករងគ្រោះដោយព្យុះ «ហៃយ៉ាន» ដែលវាយប្រហារទៅលើប្រទេសហ្វ៊ីលីពីន កាលពីខែវិច្ឆិកា ឆ្នាំ២០១៣ ចំនួន៧.៩៨៦នាក់ ។
ក្រៅពីនោះគ្រោះមហន្តរាយនៅរដ្ឋ Uttarakhand ភាគខាងជើងប្រទេសឥណ្ឌា ដែលអូសបន្លាយពេលជាច្រើនថ្ងៃ កាលពីខែមិថុនា ២០១៣ បើតាមតួលេខរបស់ IFRC បានកត់ត្រាមានអ្នកស្លាប់ចំនួន៦.០៥៤នាក់ ខណៈប្រជាជននៅលើពិភពលោក ដែលប្រឈមមុខនឹងគ្រោះធម្មជាតិស្ទើរតែពេញមួយឆ្នាំ មានចំនួនខ្ពស់ជិត១០០លាននាក់ ។ ចំណែកការខូចខាតដោយគ្រោះធម្មជាតិគិតជាប្រាក់ប្រហែល១១៩.០០០លានដុល្លារ ។
តួលេខចំនួនអ្នកស្លាប់កាលពីឆ្នាំ២០១៣ចាត់ទុកថា មានកម្រិតទាប បើគិតជាមធ្យមនៃឆ្នាំ២០០៤ដល់២០១៣ ដោយក្នុងមួយឆ្នាំ មានអ្នកស្លាប់ចំនួន៩៧.៩៥៤នាក់ ។ កាលពីខែធ្នូ២០០៤ រញ្ជួយដី និងស៊ូណាមិនៅមហាសមុទ្រឥណ្ឌាសម្លាប់មនុស្សចំនួន១៥ប្រទេស អស់ប្រហែល២៤២.៨២៤នាក់ ៕
ចែករំលែកព័តមាននេះ