ខេត្តប៉ៃលិន ៖ ប្រជាពលរដ្ឋជាច្រើននាក់មកពីភូមិ-ឃុំផ្សេងៗគ្នា ក្នុងខេត្តប៉ៃលិន ប្រហែល២០នាក់ បានប្រមូលផ្តុំគ្នាផ្តិតមេដៃ ដើម្បីដាក់ពាក្យប្តឹងថៅកែឈើគ្រញូងម្នាក់ ឈ្មោះ រ៉ា និងមេខ្យល់ម្នាក់ទៀត ឈ្មោះ រី ដោយអ្នកទាំងពីរបានជួល និងនាំពួកគេទាំងអស់ឱ្យចូលទៅក្នុងទឹកដីថៃ ដើម្បីលី ស្ពាយឈើគ្រញូង ។ លុះពេលត្រឡប់មកដល់ទឹកដីខ្មែរវិញ អស់រយៈពេលជិត១ខែទៅហើយ មិនឃើញក្រុមឈ្មួញទាំងនេះ បើកប្រាក់ថ្លៃឈ្នួលដល់ពួកគេ ខណៈបានជួលក្រុមផ្សេងទៀតឱ្យទៅលីសែងឈើគ្រញូងជាធម្មតា ដែលពលរដ្ឋទាំងនោះភាគច្រើនសុទ្ធតែជាយុវជនក្មេងៗប៉ុណ្ណោះ ។
ហេតុការណ៍ប្រមូលផ្តុំគ្នាផ្តិតមរដៃប្តឹងថៅកែគ្រញូងនេះ បានធ្វើឡើងកាលពីល្ងាចថ្ងៃទី១៨ តុលា ២០១៤ នៅភូមិអូរបេង ឃុំស្ទឹងកាច់ ស្រុកសាលាក្រៅ ហើយបានយកពាក្យបណ្តឹងនេះ ទៅតម្កល់ទុកនៅសាលាខេត្តប៉ៃលិន នាព្រឹកថ្ងៃទី២០ តុលា ដើម្បីឱ្យអាជ្ញាធរជួយដឹងឮប៉ុណ្ណោះ ។
កម្មករម្នាក់ ដែលជាអ្នកលី ស្ពាយឈើគ្រញូងចេញពីទឹកដីថៃមកស្រុកខ្មែរតាមច្រកព្រំដែនបានច្រើនជាងគេ ឈ្មោះ វិល វ៉ាន់ឌី ភេទប្រុស អាយុ២២ឆ្នាំ រស់នៅភូមិអូរបេង ឃុំស្ទឹងកាច់ ស្រុកសាលាក្រៅ បានរៀបរាប់ថា រូបគេទៅស្ពាយឈើគ្រញូងនៅដីថៃ ជាច្រើនលើកច្រើនសារមកហើយ ដោយចូលទៅចំងាយប្រហែល២៥គីឡូម៉ែត្រពីព្រំដែនកម្ពុជា ហើយដើរចូលទៅទៅក្នុងអស់រយៈពេល១យប់១ថ្ងៃទើបដល់ទីនោះ ។ ប្រភពបន្តទៀតថា ពេលស្ពាយឈើគ្រញូងត្រឡប់មកទឹកដីខ្មែរវិញ ត្រូវចំណាយពេល២យប់ ២ថ្ងៃ ទើបមកដល់ព្រំដែនខ្មែរយើង ហើយមានមេខ្យល់នាំយកឈើទាំងនោះទៅលាក់ទុកនៅចំណុចព្រំដែន ចន្លោះបង្គោលឡាក់លេខ៦៦ និង៦៧ ចំណុចភ្នំបេង ភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ហើយមានខាងសមត្ថកិច្ចជួយសម្រួលឱ្យពួកគេផងដែរ ។
ប្រភពដដែលបានបន្តឱ្យដឹងទៀតថា មិនគួរណាមេឈ្មួញ ឬមេខ្យល់ បានបោកប្រាស់មិនឱ្យប្រាក់ឈ្នួលដល់ពួកគេនោះទេ ព្រោះការធ្វើដំណើរឆ្លងដែនខុសច្បាប់ទៅលីឈើញគ្រញូងនេះមាន ការលំបាកខ្លាំងណាស់ប្រថុយប្រថានដល់អាយុជីវិតថែមទៀតផង ដោយជួនកាលពេលជួបទាហ៊ាន ថៃ គេបានដេញបាញ់រត់ចែកជើងគ្នាពេញព្រៃ ហើយជួនកាលទៀតបានជួបនឹងសត្វសាហាវក៏មានដែរ លុះពេលយកមកដល់ទឹកដីខ្មែរ ថៅកែឬមេឈ្មួញឱ្យលុយបានត្រឹមតែ៣ដុល្លារក្នុង១គីឡូក្រាម ប៉ុណ្ណោះ ដោយជួនកាលទៀតនោះមេខ្យល់គេបំបាត់ភ្នែកជញ្ជីញ មិនត្រឹមតែប៉ុណ្ណោះចៅកែរមិនបើកប្រាកឱ្យទៀតផង ។
កម្មករលី ស្ពាយគ្រញូងបានបញ្ជាក់ទៀត ថា អ្នកដែលបើកដៃឱ្យពួកគេចូលទៅរកកាប់ឈើគ្រញូងនៅទឹកដីថៃនោះគឺជាសមត្ថកិច្ចមួយចំនួន ដែលនៅយាមការពារព្រំដែនតែម្តង ដោយអត់ស្គាល់ឈ្មោះនោះទេ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ