ខេត្តកំពង់ធំ ៖ បច្ចុប្បន្ននេះល្បែងកន្ទុយលេខ និងវង់បៀនៅក្នុងផ្សារទាំង២ក្នុងក្រុងស្ទឹងសែន ខេត្តកំពង់ធំ កំពុងតែធ្វើឲ្យជះឥទ្ធិពលដ៏អាក្រក់បំផុតដល់គោលនយោបាយភូមិ-ឃុំ មានសុវត្ថិភាពទាំង០៩ចំណុចរបស់ក្រសួងមហាផ្ទៃ ចំណែកអាជ្ញាធរ និងសមត្ថិកិច្ច សង្ងំស្ងៀមមិនធ្វើការបង្ក្រាប ខ្លាចបែកឆ្នាំងបាយ។
ល្បែងស៊ីសង(បៀ) និង កន្ទុយលេខ ជាច្រើនកន្លែង ត្រូវបានគេនាំគ្នាលេង ថែមទាំងដាក់លក់យ៉ាងអនាធិបតេយ្យ ក្នុងផ្សារទាំង២ក្នុងក្រុងស្ទឹងសែនគឺផក្សាកំពង់ធំ និងផ្សាស្ទឹងសែន (ហៅផ្សារចាស់) ដោយគ្មានខ្លាចក្រែងរអែងច្បាប់អ្វីបន្តិចនោះទេ។ ល្បែងទាំងអស់នេះប្រព្រឹត្តទៅបាននោះក៏ដោយសារតែសមត្ថកិច្ច និងអាជ្ញាធរមានការឃុបឃិតគ្នាបើកដៃឲ្យដែរ ដែលមានកូនកញ្ច្រែងជាច្រើននាក់ដើរកត់នៅក្នុងផ្សារទាំង២ និងនៅតាមផ្ទះ ប្រមូលលុយរាប់ម៉ឺនដុល្លាក្នុង១ថ្ងៃៗ ដែលទង្វើរទាំងនេះហាក់បីដូចជាផ្គើនចំពោះមុខច្បាប់ ។
លោក វ៉ាន់ វិបុល មេប៉ុស្តិ៍កំពង់ធំប្រាប់ថា កន្លងមកល្បែងស៊ីសងលោកធ្លាប់បានហៅមេកន្ទុយលេមកធ្វើកិច្ចសន្យានិងផ្តិតមេដៃឲ្យបញ្ឈប់ តែនៅតែមិនរាងចាលនៅពេលដែលឃើញសមត្ថកិច្ចប៉ូលិសទៅ មេកន្ទុយលេខយកសៀវភៅលាក់ទុកក្នុងកាបូបបាត់អស់ ចំណែកលោកមេប៉ុស្តិ៍សង្កាត់កំពង់ក្របៅ ប្រាប់ថា លោកមិនបានឃុបឃិតជាមួយទេ ។
គួរបញ្ជាក់ថា ឈ្មោះមេឆ្នោតនៅក្នុងផ្សារកំពង់ធំ និងផ្សារស្ទឹងសែន កំពុងធ្វើសកម្មភាពលក់ឲ្យ ឈ្មោះ អ៊ឹង ទានឈា ភេទស្រី រស់នៅភូមិទី៥ សង្កាត់កំពង់ធំ និងឈ្មោះ ឃឹម ស្រេង ជួលផ្ទះនៅជិតស្ពានត្បូងចាម ស្ថិតក្នុងភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន ប្រហែលជាលោកមេប៉ុស្តិ៍ លោកចៅសង្កាត់និងលោកអធិការបានសើមមាត់សើមកខ្លះ ហើយមើលទៅបានជាសង្ងំស្ងៀមយ៉ាងដូច្នេះ ?
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ