អ្នកនាំពាក្យម្នាក់របស់កងកម្លាំងឃើតរាយការណ៍ថា ពួកយុទ្ធជនឃើតដែលការពារក្រុងកូបានេស៊ីរី ទទួលបានអាវុធនិងគ្រាប់រំសេវយ៉ាងច្រើន ដោយសារការទម្លាក់តាមឆត្រយោងកាលពីយប់ថ្ងៃទី១៩ តុលា របស់យន្តហោះ១គ្រឿងនៃកងទ័ពអាមេរិក នៅជិតទីក្រុងនេះដែលឡោមព័ទ្ធវាយប្រហារដោយពួកជីហាដនៃក្រុមរដ្ឋអ៊ិស្លាម ។
ទីបញ្ជាការដ្ឋានកងទ័ពអាមេរិកគូសបញ្ជាក់នាពេលមុននេះបន្តិចថា យន្តហោះកាហ្គោ C-130 មួយគ្រឿងរបស់កងទ័ពអាកាស បានទម្លាក់អាវុធ គ្រាប់រំសេវ ព្រមទាំងសម្ភារពេទ្យផ្តល់ដោយអាជ្ញាធរឃើតអុីរ៉ាក់ សម្រាប់ជួយទ្រទ្រង់ដល់ការតស៊ូរបស់ពួកឃើតស៊ីរីប្រឆាំងពួករដ្ឋអ៊ិស្លាម ។
នេះជាលើកដំបូងដែលសហរដ្ឋអាមេរិកនិយាយពីការផ្តល់ជំនួយយោធាដល់ពួកយុទ្ធជនឃើត ដែលប្រទេសតួកគីពុំចង់ឱ្យឆ្លងកាត់ព្រំដែនរបស់ខ្លួន ។ រយៈពេលប៉ុន្មានថ្ងៃចុងក្រោយនេះ អាមេរិកបានបង្កើនការវាយប្រហារតាមអាកាសប្រឆាំងពួកជីហាដនៅក្រុងកូបានេ ។ ទីបញ្ជាការដ្ឋានយោធាអាមេរិកគូសបញ្ជាក់ថា ការវាយប្រហារតាមអាកាស១៣៥លើក សំដៅបណ្តាទីតាំងរបស់ពួករដ្ឋអ៊ិស្លាមនៅតំបន់ក្រុងកូបានេ ជាទីលាននៃការប្រយុទ្ធគ្នាយ៉ាងសាហាវកាលពីចុងសប្តាហ៍កន្លងមកនេះ ។
សភាពការណ៍សន្តិសុខនៅទីក្រុងកូបានេនៅតែផុយស្រួយដោយពួករដ្ឋអ៊ិស្លាមបន្តគំរាមកំហែងទីក្រុងនេះ ហើយពួកឃើតខំតស៊ូទប់ទល់ ។រដ្ឋាភិបាលតំបន់ឃើតឌីស្ថានអុីរ៉ាក់ ធ្លាប់ប្រកាសកាលពីសប្តាហ៍មុនថា បានផ្តល់ជំនួយយោធាជានិមិត្តរូបដល់ពួកយុទ្ធជនឃើតនៅក្រុងកូបានេ ក៏ប៉ុន្តែតួកគីដែលខ្លាចគ្រឿងសព្វាវុធផ្តល់ឱ្យពួកឃើត ផ្តល់ផលវិបាកទាំងឡាយដល់សភាពការណ៍នៅប្រទេសខ្លួននោះ បានបដិសេធមិនឱ្យដឹកឆ្លងកាត់ព្រំដែនខ្លួន ។
ពួកយុទ្ធជនឃើតដែលទទួលការទ្រទ្រង់តាមរយៈការវាយប្រហារតាមអាកាសរបស់ក្រុមចម្រុះអន្តរជាតិបានវាយទប់ទល់នាំឱ្យពួករដ្ឋអ៊ិស្លាមទទួលរងការខូចខាតធ្ងន់ធ្ងរ ។ យោងតាមអង្គការសិទ្ធិមនុស្សស៊ីរី OSDH ថា ក្រុមរដ្ឋអ៊ិស្លាមបាត់បង់យុទ្ធជន៣១នាក់ រវាងពីថ្ងៃទី១៨ មក១៩តុលា ក្នុងនោះ១៥នាក់ស្លាប់ដោយសារការវាយប្រហារតាមអាកាសរបស់អាមេរិក និងសម្ព័ន្ធមិត្តលើទីតាំងទាំងឡាយរបស់ពួកគេ ។ អង្គការសហប្រជាជាតិ ក៏រៀបរាប់ពីសាកសពរបស់ពួកជីហាដយ៉ាងតិច៧០នាក់ ដែលបញ្ជូនមកកាន់មន្ទីរពេទ្យមួយក្រោមការត្រួតត្រារបស់ពួកគេ នៅខេត្តរ៉ាការយៈពេល៤ថ្ងៃចុងក្រោយនេះ ។ យុទ្ធជនឃើត៧នាក់ក៏ត្រូវស្លាប់ដែរ ៕
ចែករំលែកព័តមាននេះ