ម្ចាស់ខ្សែក្រវាត់ស្ថាប័ន IBF&WBA ប្រភេទទម្ងន់ Super-milddleweight ខាល ហ្វ្រច់ កាលពីពេលថ្មីៗនេះបានទាត់ចោលនូវលទ្ធភាពនៃជំនួបប្រកួតជាកីឡាករមិត្តរួមជាតិជេម ឌីហ្គេល ដោយអះអាងថា ឌីហ្គេលមិនមែនជាជនល្បីឈ្មោះនោះឡើយ ។
គេបានបញ្ជាក់ថា ៖ «ឌីហ្គេល មិនទាន់អាចជាជនដែលស្ថិតក្នុងកែវភ្នែកខ្ញុំនៅឡើយទេ។ អ្នករៀបចំការប្រកួតរបស់គេស្ទើរក្លាយជាស្មូមមកសុំការប្រកួតពីខ្ញុំ ប៉ុន្តែយ៉ាងណា ឌីហ្គេល មិនទាន់ក្លាយជាជនល្បីឈ្មោះនៅឡើយទេ ។ គេមិនទាន់បានផ្តួលកីឡាករណាម្នាក់ដែលជាស្ពានដើម្បីទទួលបានឱកាសជួបខ្ញុំនៅឡើយ។ កាន់តែយ៉ាប់ជាងនេះនោះ គឺធ្លាប់ចាញ់ក្រោមកណ្តាប់ដៃចច ហ្គ្រូវ» ។
ជាជំនួសមកវិញ កីឡាករប្រដាល់អង់គ្លេសរូបនេះបានជ្រើសយកការប្រកួតនៅឡាសវេហ្គាស សហរដ្ឋអាមេរិកដោយជួបជាមួយកីឡាករម៉ិកស៊ិក ជូលីអូ សេសាឆាវ៉ែស ។ កីឡាករវ័យ៣៧ឆ្នាំរូបនេះបានតាំងចិត្តសម្រេចឱ្យខាងតែបាននូវសុបិនរបស់ខ្លួនដើម្បីបន្ថែមអត្ថន័យដល់អាជីព ហើយថា ខ្លួននឹងចូលនិវត្តន៍ ប្រសិនជាការប្រកួតជាមួយឆាវ៉ែសនៅឡាសវេហ្គាសមិនអាចកើតឡើងបាន ។ គេបាននិយាយថា ៖ «មានលទ្ធភាពដ៏ពិតប្រាកដមួយដែលខ្ញុំនឹងត្រូវលាងដៃចេញពីពិភពគុន» ។
យ៉ាងណាក៏ដោយ ហ្វ្រច់ដែលបានយកឈ្នះកីឡាករមិត្តរួមជាតិចច ហ្គ្រូវនៅចំពោះមុខអ្នកគាំទ្រ៨ម៉ឺននាក់ក្នុងសង្វៀន Wembley កាលពីខែឧសភា នឹងបាត់បង់ខ្សែក្រវាត់ស្ថាប័ន IBF របស់ខ្លួនប្រសិនជាគេចវេះពីកីឡាករឌីហ្គេល ។ស្ថិតក្នុងអាជីពជាច្រើនឆ្នាំ ហ្វ្រច់មិនធ្លាប់បានប្រកួតនៅឡាសវេហ្គាសនោះទេ ។ ប៉ុន្តែ ការជួបជាមួយឆាវ៉ែស ម្ចាស់ស្ថាប័ន WBC ដែលចាញ់តែម្តងក្នុងចំនួនប្រកួត៥១លើក គឺពិតជាអាចបំពេញនូវមហិច្ឆតារបស់គេបាន ។
កីឡាកររូបនេះបានបន្តថា ៖ «ខ្ញុំរីករាយក្នុងការដាក់ឱ្យទំនេរនូវខ្សែក្រវាត់ស្ថាប័ន IBF។ នេះជាស្ពានដែលអាចប្រែក្លាយសុបិនរបស់ខ្ញុំឱ្យក្លាយជាការពិត ។ ខ្ញុំមិនចង់ចូលនិវត្តន៍មិនបានប្រកួតលើសង្វៀនលំដាប់ពិភពលោកនោះឡើយ» ។ គិតពីឆ្នាំ២០០២មក ហ្វ្រច់ បានយកឈ្នះការប្រកួត៣៣ក្នុងចំណោម៣៥លើក ប៉ុន្តែធ្លាប់ចាញ់ក្រោមកណ្តាប់ដៃកីឡាករអាមេរិក Andre Ward និងកីឡាករដាណឺម៉ាក Mikkel Kessler ៕
ចែករំលែកព័តមាននេះ