កីឡាការិនីកូរ៉េខាងត្បូង Kyu Jung Baek បានក្លាយជាម្ចាស់ពានរបស់កម្មវិធី KEB-HanaBank Championship ដែលមានប្រាក់រង្វាន់សរុប២លានដុល្លារអាមេរិក ខណៈកាលពីថ្ងៃអាទិត្យ ទី១៩ ខែតុលា នាងបានផ្តួលគូប្រកួតសញ្ជាតិអាមេរិក Brittany Lincicome និងគូប្រកួតជាមិត្តរួមជាតិ In Gee Chun ក្នុងវគ្គកាត់សេចក្តីចុងក្រោយជាមួយនឹងពិន្ទុ បឺឌីនៅឡូទី១៨ មាន៥ប៉ា ។ ដូចជាឆ្នាំមុនដែរ ការប្រកួតដែលមានរយៈពេល៤ថ្ងៃនេះត្រូវបានរៀបចំធ្វើនៅទីលានវាយកូនគោល Sky 72 Golf Club Ocean Course ស្ថិតក្នុងទីក្រុង Incheon ប្រទេសកូរ៉េខាងត្បូង ។
Jung Baek ដែលបានបញ្ចប់ជុំផ្តាច់ព្រ័ត្រធ្វើបានពិន្ទុ ៥អាន់ឌ័រប៉ា ៦៧ ឆ្លងកាត់៤ជុំប្រកួតសម្រេចបានលទ្ធផលសរុប១០អាន់ឌ័រ ២៧៨ ទទួលបានពានជើងឯកយកមកគ្រប់គ្រងជាលើកទី៣ក្នុងរដូវកាល ។ ដោយឡែក គិតក្នុងសមាគម LPGA Tour វិញ វាទើបជាពានលើកដំបូងប៉ុណ្ណោះក្នុងអាជីពរបស់នាង ។
ជាមួយនឹងទឹកប្រាក់រង្វាន់៣០ម៉ឺនដុល្លារ កីឡាការិនីវ័យ១៩ឆ្នាំរូបនេះបានថ្លែងដោយក្តីរីករាយថា ៖ «ការប្រកួតរបស់ខ្ញុំពិតជាល្អខ្លាំងណាស់ ។ ខ្ញុំទទួលបានអារម្មណ៍កក់ក្តៅជាខ្លាំងកាលពីព្រឹក ប៉ុន្តែការចាប់ផ្តើមមិនសូវជាល្អប៉ុន្មានទេ ។ ទោះជាយ៉ាងណា ការព្យាយាមរបស់ខ្ញុំធ្វើបានសម្រេចនៅពេលបន្ទាប់មក ។ នេះជាពានដែលនាងខ្ញុំបានរង់ចាំជាយូរមកហើយ» ។
ចំណែកនាង Lincicome និងនាង Gee Chun ចំណាត់ថ្នាក់លេខ២ស្ទួនទទួលបានប្រាក់រង្វាន់ក្នុងម្នាក់ៗជាង១៨ម៉ឺនដុល្លារ ។
កីឡាការិនីអាមេរិក មីសែល វ៉ាយជើងឯកព្រឹត្តិការណ៍ U.S Women’s បញ្ចប់ការប្រកួត៤ជុំធ្វើបានលទ្ធផលសរុប៨អាន់ឌ័រ ២៨០ស្ថិតក្នុងចំណាត់ថ្នាក់លេខ៥ស្ទួនជាមួយនាង MatthewCatriona ស្ថិតនៅគម្លាត១ស្ត្រូកពីនាង Matthew Catriona ។
ឯនាង Amy Yang ជាកីឡាការិនីការពារជើងឯកបរាជ័យមិនអាចរក្សាពានរបស់ខ្លួនបន្តទៅមុខឡើយ ខណៈបញ្ចប់ក្នុងចំណាត់ថ្នាក់លេខ៤៦ស្ទួន ។ ផ្ទុយពីនេះ ជើងខ្លាំងមកពីន័រវែស Suzanne Petersen ដែលកំពុងព្យាយាមដណ្តើមយកពាន LPGA Tour ឱ្យបានជាលើកទី៣ បញ្ចប់ការប្រកួតក្នុងចំណាត់ថ្នាក់លេខ១២ជាមួយលទ្ធផលសរុប៥អាន់ឌ័រ២៨៣ ៕
ចែករំលែកព័តមាននេះ