រាជធានីភ្នំពេញ ៖ សាឡង់បូមខ្សាច់ជាច្រើនគ្រឿង ដែលប្រភពច្បាស់ការណ៍បានផ្តល់ព័ត៌មានមកថា ជាអាជីវកម្មរបស់កូនមន្ត្រីក្នុងជួររដ្ឋាភិបាលកំពុងធ្វើសកម្មភាពបូមយ៉ាងទ្រហឹងអឺងកងទាំងយប់ទាំងថ្ងៃ នៅលើដងទន្លេបាសាក់ ស្ថិតក្នុងភូមិសាស្ត្រសង្កាត់ព្រែកថ្មី ខណ្ឌច្បារអំពៅ ដោយគ្មានច្បាប់អនុញ្ញា និងបង្កឱ្យប៉ះពាលបរិស្ថានរស់នៅរបស់អ្នកស្រុក ពិសេសគឺយប់អធ្រាត្រ ។
ជាមួយគ្នានោះដែរ ដេប៉ូខ្សាច់ជាច្រើនកន្លែង នៅក្នុងភូមិសាស្ត្រភូមិព្រែកថ្មី សង្កាត់ព្រែកថ្មី ដែលសាឡង់បូមខ្សាច់ខាងលើ បូមយកមកស្តុប ដើម្បីចែកចាយលក់បន្ត ត្រូវបានអ្នកស្រុក ក៏ដូចជាអ្នកដំណើរនានាធ្លាប់ដាក់ពាក្យប្តឹងទៅសាលាសង្កាត់ព្រែកថ្មី ដោយសារដេប៉ូខ្សាច់ទាំងនោះ មិនប្រើប្រាស់បច្ចេកទេសដឹកជញ្ចូនឱ្យបានត្រឹមត្រូវ ជាហេតុធ្វើឱ្យដីខ្សាច់ស្រក់ដក់លើទ្រូងផ្លូវ ធ្វើឱ្យអ្នកដំណើរជួបការលំបាកជាច្រើនលើកមកហើយ ប៉ុន្តែលោកចៅសង្កាត់ និងលោកអភិបាលខណ្ឌច្បារអំពៅ មិនចាត់ការជូនពួកគាត់ឡើយ ។ រីឯបញ្ហាសាឡង់បូមខ្សាច់វិញ គឺធ្វើសកម្មភាពបូមយ៉ាងទ្រហឹងអឺងកងពេញផ្ទៃទន្លេ បង្កឱ្យបាក់ច្រាំងប៉ះពាល់ដល់លំនៅឋានរបស់ពួកគាត់ ក៏ដូចជាស្នូរម៉ាស៊ីនពេលយប់អធ្រាត្រឡើង ប៉ះពាល់ដល់ដំណេករបស់អ្នកស្រុក ដែលក្រុមឈ្មួញទាំងនោះ មិនបានគិតអំពីបញ្ហាទាំងអស់នេះឡើយ គឺពួកគេគិតតែពីប្រយោជន៍ផ្ទាល់ខ្លួនប៉ុណ្ណោះ។
តាមរយៈកោះសន្តិភាពអ្នកស្រុកសង្ឈឹមថា លោកអភិបាលរាជធានីភ្នំពេញនឹងជួយមានវិធានការចំពោះភាពអនាធិបតេយ្យរបស់ក្រុមឈ្មួញខាងលើនេះ ដើម្បី ឆ្លើយតបនឹងបណ្តឹងរបស់ប្រជាពលរដ្ឋ ដែលប្តឹងទៅអាជ្ញាធរមូលដ្ឋានហើយគ្មានចំណាត់ការជូនពួកគាត់ ។
ចែករំលែកព័តមាននេះ