ខេត្តកំពត ៖ សពស្ត្រី២នាក់ត្រូវបានអាជ្ញាធរខេត្តគៀងយ៉ាង ដឹកឆ្លងកាត់តាមច្រកទ្វារអន្តរជាតិព្រែកចាក ប្រគល់ឱ្យក្រុមគ្រួសារនិងអាជ្ញាធរខ្មែរ កាលពីព្រឹកថ្ងៃទី១៨ តុលា ។ គ្រោះថ្នាក់រហូតដល់ស្លាប់ស្ត្រី២នាក់នេះ បានកើតទ្បើងនៅក្នុងសមុទ្រ ខណៈទៅនេសាទត្រីនៅចំណុចជិតកោះសេះ ក្នុងដែនសមុទ្រខ្មែរ ហើយត្រូវទូកនេសាទវៀតណាមបុក រីឯបុរសជាប្តីត្រូវបានអ្នកនេសាទវៀតណាមជួយសង្គ្រោះភ្លាមៗ ។
ទាក់ទិននឹងការបុកនេះ មិនមានរបាយការណ៍ណាមួយប្រាប់ឱ្យដឹងថា បានកើតទ្បើងបែបណាទេ ដោយគ្រាន់តែដឹងថា ទូកនេសាទខ្មែរបានចតដាក់លបក្តាម ស្រាប់តែមានការបុកនេះកើតទ្បើងតែម្តង ។ ហេតុការណ៍នេះ បានកើតទ្បើងកាលពីវេលាម៉ោងប្រហែល១រំលងអធ្រាត្រឈានចូលថ្ងៃទី១៦ តុលា ។ ស្ត្រីទាំង២នាក់ដែលស្លាប់នៅកណ្តាលសមុទ្រនេះ ម្នាក់ឈ្មោះ អូវ សុខុន អាយុ៥០ឆ្នាំ និងម្នាក់ទៀតជាប្អូនឈ្មោះ អូវ ឃន អាយុ៣៩ឆ្នាំ ។ រីឯបុរសឈ្មោះ រេម រ៉េន អាយុ៥១ឆ្នាំ ជាប្តីស្ត្រីឈ្មោះ អូវ សុខុន ត្រូវបានទូកវៀតណាមជួយសង្គ្រោះទាន់ពេលវេលា ។ អ្នកស្លាប់ទាំង២នាក់ រស់នៅភូមិកោះក្រស្នា ឃុំឫស្សីស្រុកខាងលិច ស្រុកកំពង់ត្រាច ។
លោក ចាន់ ភក្តី នាយស្តីទីប៉ុស្តិ៍នគរបាលឃុំឫស្សីស្រុកខាងលិច មានប្រសាសន៍ថា អាជ្ញាធរវៀតណាមនៅព្រឹកថ្ងៃទី១៨ តុលា បានដឹកសពស្ត្រី២នាក់ ជាបងប្អូនបង្កើតនឹងគ្នានេះ ប្រគល់ឱ្យអាជ្ញាធរកម្ពុជា ។ ឧប្បត្តិហេតុគ្រោះថ្នាក់ កើតទ្បើងកាលពីវេលារំលងអធ្រាត្រឈានចូលថ្ងៃទី១៦ តុលា ប៉ុន្តែសពស្ត្រីទាំង២នាក់ អាជ្ញាធរវៀតណាមរកមិនឃើញ ទើបតែនៅវេលាម៉ោង៤ល្ងាច ថ្ងៃទី១៧ តុលា ទើបប្រទះឃើញសពអណ្តែតទឹក ក៏ដឹកយកមកប្រគល់ឱ្យអាជ្ញាធរកម្ពុជា និងក្រុមគ្រួសារជនរងគ្រោះ ។
ជាមួយនឹងការដឹកសពមកប្រគល់ឱ្យនេះដែរ អាជ្ញាធរខេត្តគៀងយ៉ាង ក៏បានឧបត្ថម្ភដល់គ្រួសារសពទាំង២នាក់ ចំនួន៣០០លានដុង ដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ