ខេត្តបន្ទាយមានជ័យ ៖ ជាលើកទី២ហើយក្នុងស្រុកព្រះនេត្រព្រះ ដែលកើតមានហេតុការណ៍គ្រោះថ្នាក់ចរាចរណ៍ដ៏សាហាវនិងគួរឱ្យរន្ធត់ គឺដងខ្លួនមនុស្សត្រូវដាច់ជាច្រើនកំណាត់ ដែលពីមុនជាជនជាតិឥណ្ឌាលក់មុងភួយ និងលើកនេះករណីគ្រោះថ្នាក់ចរាចរណ៍ដូចគ្នានេះដែរ បានធ្វើឱ្យបុរសម្នាក់ត្រូវដាច់ខ្លួនជាច្រើនកំណាត់ ដោយសាររថយន្តកាមរីបុកអ្នកជិះម៉ូតូ កាលពីវេលាម៉ោង១១និង៤៥នាទីព្រឹក ថ្ងៃទី១៩ តុលា លើកំណាត់ផ្លូវជាតិលេខ៦ ខាងកើតភូមិភ្នំលៀបចម្ងាយ៥០០ម៉ែត្រ ស្ថិតក្នុងឃុំភ្នំលៀប ស្រុកព្រះនេត្រព្រះ ។
លោកអនុសេនីយ៍ត្រី ភ្លឹង វិចិត្រ នាយផ្នែកសណ្តាប់ធ្នាប់ចរាចរណ៍នៃអធិការដ្ឋាននគរបាលស្រុកព្រះនេត្រព្រះ បានឱ្យដឹងថា ជនរងគ្រោះឈ្មោះ ឌិន ជុន អាយុ៤៩ឆ្នាំ រស់នៅភូមិព្រីងកោង ឃុំបុស្បូវ ស្រុកព្រះនេត្រព្រះ ជិះម៉ូតូហុងដាឌ្រីមសេ១២៥ ស៊េរី២០១១ ពណ៌ខ្មៅ ពាក់ស្លាកលេខសៀមរាប 1L-4869 ។ រីឯរថយន្តកាមរីពណ៌ទឹកប៊ិក ពាក់ស្លាកលេខសៀមរាប 2A-6961 មិនស្គាល់ឈ្មោះអ្នកបើកបរ ព្រោះបន្ទាប់ពីកើតហេតុភ្លាមរត់គេចខ្លួនបាត់ ។ តាមសម្តីសាក្សីដែលឃើញហេតុការណ៍បានប្រាប់ថា ដំបូងជនរងគ្រោះជិះម៉ូតូទិសដៅពីកើតទៅលិច ក្នុងសភាពរេពេញផ្លូវមិនដឹងថា គាត់ស្រវឹងឬកើតរោគអ្វីទេ ។ ពេលនោះ មានរថយន្តកាមរី១គ្រឿង បើកបរបញ្ច្រាសទិសគ្នា ស្រាប់តែបុកម៉ូតូយ៉ាងពេញទំហឹងបណ្តាលឱ្យអ្នកបើកបរម៉ូតូដាច់១កំណាត់ខ្លួនត្រឹមចង្កេះទើរជាប់លើដំបូលរថយន្ត និង១កំណាត់ចង្កេះមកក្រោមដាច់រាយប៉ាយលើថ្នល់គួរឱ្យរន្ធត់បំផុត ចំណែកម៉ូតូនិងរថយន្តកៀបជាប់គ្នា ។
បន្ទាប់ពីកើតហេតុ រថយន្តនិងម៉ូតូត្រូវបានស្ទូចយកមករក្សាទុកនៅអធិការដ្ឋាននគរបាលស្រុកព្រះនេត្រព្រះ ។ ចំណែកបំណែកសពត្រូវក្រុមគ្រួសារប្រមូលយកទៅធ្វើបុណ្យតាមប្រពៃណី ។
ខេត្តកំពង់ស្ពឺ ៖ បុរស២នាក់ត្រូវស្លាប់ក្នុងហេតុការណ៍គ្រោះថ្នាក់ចរាចរណ៍នៅភូមិសាស្ត្រផ្សេងគ្នាដែលម្នាក់ស្លាប់គួរឱ្យរន្ធត់ ខណៈរថយន្តកុងតឺន័រកិនពីលើដាច់ខ្លួនកាលពីវេលាម៉ោង៨និង៣០នាទីយប់ថ្ងៃទី១៦ តុលា នៅចំណុចភូមិញ សង្កាត់កណ្ដោលដុំ ក្រុងច្បារមន ។ ជនរងគ្រោះដែលស្លាប់ឈ្មោះរិទ្ធ អាយុ២៣ឆ្នាំ មានស្រុកកំណើតនៅស្រុកស្វាយជ្រំ ខេត្តស្វាយរៀង បច្ចុប្បន្នមកស្នាក់នៅធ្វើកម្មករសំណង់នៅភូមិព្រៃស្លឹក សង្កាត់ច្បារមន ក្រុងច្បារមន ត្រូវរថយន្តកិនដាច់ខ្លួនគួរឱ្យញាក់សាច់ ។ ចំណែកអ្នករួមដំណើរម្នាក់ទៀតឈ្មោះចិន សាវន ភេទប្រុស អាយុ២៤ឆ្នាំ មានស្រុកកំណើតនៅភូមិបន្លាស្អិត ឃុំក្រោលគោ ស្រុកស្វាយជ្រំ ខេត្តស្វាយរៀង រងរបួសស្រាល ។ ទាំងពីរនាក់ជិះម៉ូតូសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ1CA-7500 ។
ប្រភពពីសាក្សីនៅជិតកន្លែងកើតហេតុបាននិយាយថា គេបានឃើញជនរងគ្រោះទាំងពីរនាក់ជិះម៉ូតូតាមផ្លូវជាតិលេខ៤ក្នុងទិសដៅពីលិចទៅកើតចេញពីហូបអាហារហើយបំណងត្រឡប់មកកន្លែងការដ្ឋានវិញ លុះមកដល់ចំណុចកើតហេតុស្រាប់តែមានរថយន្តកុងតឺន័រមិនចាំស្លាកលេខមួយគ្រឿងបើកបុកពីក្រោយពេញទំហឹងខ្ទាតបុរសបើកម៉ូតូចូលក្រោមរថយន្តក៏កិនដាច់ខ្លួនជាពីរកំណាត់ត្រឹមចង្កេះ ចំណែកអ្នករួមដំណើរខ្ទាតចេញផុតរងរបួសស្រាល ។ ក្រោយបង្កហេតុរថយន្តកុងតឺន័រនោះបានបន្ថែមល្បឿនបើករត់ទៅទិសខាងកើតបាត់ស្រមោល ។ សពត្រូវសមត្ថកិច្ចយកទៅតម្កល់នៅមន្ទីរពេទ្យខេត្ត ចំណែកម៉ូតូជនរងគ្រោះសមត្ថកិច្ចយកទៅរក្សាទុកនៅការិយាល័យនគរបាលចរាចរណ៍រង់ចាំឱ្យក្រុមគ្រួសារមកបំពេញបែបបទទទួលយកទៅវិញ ។
ក្នុងហេតុការណ៍ដាច់ដោយឡែកមួយទៀតនៅឯខេត្តពោធិ៍សាត់ បុរសម្នាក់ក៏ត្រូវរថយន្តមិនស្គាល់ម៉ាកកិនបែកក្បាលស្លាប់ហើយរថយន្តបើករត់បាត់ ។ ហេតុការណ៍គ្រោះថ្នាក់នេះបានកើតឡើងលើកំណាត់ផ្លូវជាតិលេខ៥ ចំណុចភូមិត្រពាំងរំដេញឃុំក្បាលត្រាច ស្រុកក្រគរ កាលពីវេលាម៉ោង២រំលងអាធ្រាត្រ ឈានចូលថ្ងៃទី១៦ តុលា ។ លោក ខៀវ សុខា នាយរងប៉ុស្តិ៍រដ្ឋបាលក្បាលត្រាច បានឲ្យដឹងថា ជនរងគ្រោះត្រូវរថយន្តកិនចំក្បាលធ្លាយខួរស្លាប់លើថ្នល់ ដំបូងពុំមានអ្នកណាស្គាល់អត្តសញ្ញាណទេ លុះព្រឹកឡើងទើបក្រុមគ្រួសារសាច់ញាតិដែលបាត់សមាជិកឃើញគេបង្ហោះតាមហ្វេសប៊ុក និងស្ដាប់ឮតាមវិទ្យុABC ក៏នាំគ្នាទៅមើលឃើញភិនភាគរូបរាងនិងសម្លៀកបំពាក់ទើបដឹងថា ជនរងគ្រោះឈ្មោះឱ ឈាន ភេទប្រុស អាយុ៣២ឆ្នាំ ជាមនុស្សវិកលចរិតរស់នៅភូមិអន្លង់ក្រាយ ឃុំអូរតាប៉ោង ស្រុកបាកាន ដែលបានដើរបាត់ពីផ្ទះប៉ុន្មានថ្ងៃមកហើយ ។ លោកនាយរងប៉ុស្ដិ៍បានឲ្យដឹងទៀតថា រថយន្តដែលកិននោះអាចជារថយន្តធុនធំប៉ុន្តែមិនស្គាល់ម៉ាកទេ ព្រោះពេលយប់គ្មានមនុស្សណាម្នាក់បានឃើញហេតុការណ៍ ធ្វើដំណើរពីកើតទៅលិចព្រោះជនរងគ្រោះដេកស្លាប់នៅលើគំនូសផ្លូវ ។
ក្រោយពីស្គាល់អត្តសញ្ញាណសមត្ថកិច្ចបានប្រគល់សពឲ្យទៅសាច់ញាតិក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋាននៃសពដែលស្ថិតនៅភូមិអន្លង់ក្រាយ ឃុំអូរតាប៉ោង ស្រុកបាកាន ។ ចំណែករថយន្តបង្កគ្រោះថ្នាក់សមត្ថកិច្ចកំពុងទំនាក់ទំនងគ្នាស្រាវជ្រាវរកយកមកទទួលខុសត្រូវចំពោះច្បាប់ ៕
ចែករំលែកព័តមាននេះ