រាជធានីភ្នំពេញ ៖ ជនសង្ស័យមុខសញ្ញាប្លន់ម៉ូតូម្នាក់ ត្រូវបានម្ចាស់ម៉ូតូប្រទះឃើញតាមផ្លូវក៏បានចាប់ឃាត់ខ្លួនប្រគល់ទៅឱ្យសមត្ថកិច្ចប៉ុស្តិ៍នគរបាលរដ្ឋបាលនិរោធ ដើម្បីបញ្ជូនបន្តទៅប៉ុស្តិ៍នគរបាលរដ្ឋបាលបឹងកេងមួយ ដែលជាកន្លែងដែលជនរងគ្រោះដាក់ពាក្យបណ្តឹង ធ្វើការដោះស្រាយតាមនិតិវិធី ។ ជនសង្ស័យត្រូវបានឃាត់ខ្លួននៅម៉ោង៧យប់ ថ្ងៃទី១៩ តុលា ២០១៤ នៅចំណុចផ្លូវបេតុងកោះនរា ស្ថិតក្នុងភូមិឬស្សី សង្កាត់និរោធ ខណ្ឌច្បារអំពៅ ។
ជនសង្ស័យមានឈ្មោះ យ៉ៅ ហុិន ភេទប្រុស អាយុ២០ឆ្នាំ មុខរបរកម្មករសំណង់ ចំណែកជនរងគ្រោះដែរជាម្ចាស់ម៉ូតូមានឈ្មោះ អឹុម ឌី ភេទប្រុស អាយុ២១ឆ្នាំ ស្នាក់នៅផ្ទះលេខ០៤៧ ផ្លូវរទេះភ្លើង សង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានបានឱ្យដឹងថា មុននិងឈានដល់ការឃាត់ខ្លួនជនសង្ស័យខាងលើនេះ គឺនៅវេលាម៉ោង២និង ៣០នាទីរសៀល ថ្ងៃទី១៩ តុលា ២០១៤ ជនរងគ្រោះដែរជាម្ចាស់ម៉ូតូបានប្រទះឃើញជនសង្ស័យខាងលើនៅចំណុចផ្លូវបេតុង កោះនរា ខណៈដែលជនរងគ្រោះរត់ម៉ូតូឌុបកាត់ទីនោះ ។ បន្ទាប់ពីប្រទះឃើញជនសង្ស័យហើយនោះ បុរសរងគ្រោះក៏បានឃ្លំមើលដំណើររបស់ជនសង្ស័យ និងបានធ្វើសេចក្តីរាយការណ៍ឱ្យសមត្ថកិច្ចដឹងឮផងដែរ ។ ខណៈពេលដែលជនសង្ស័យធ្វើដំណើរត្រឡប់មកវិញ ក៏ធ្វើការចាប់ឃាត់ខ្លួនប្រគល់ឱ្យនគរបាលប៉ុស្តិ៍នគរបាលរដ្ឋបាលនិរោធ តែម្តង បន្ទាប់មកក៏បានបញ្ជូនជនសង្ស័យទៅប៉ុស្តិ៍នគរបាលរដ្ឋបាលបឹងកេងកង១ ព្រោះជាកន្លែងដែលជនរងគ្រោះបានដាក់បណ្តឹង ដើម្បីធ្វើការដោះស្រាយតាមនិតិវិធីច្បាប់ ។
គួររំលឹកផងដែរថា កាលវេលាម៉ោង ១២ អាធ្រាត្រ ថ្ងៃទី ១៨ សីហា ២០១៤ ជនរងគ្រោះនិងមិត្តភក្តិពីរនាក់ទៀតបានជិះម៉ូតូហុងដាឌ្រីម សេ១២៥ មួយគ្រឿងពណ៌ខ្មៅពាក់ស្លាកលេខភ្នំពេញ1P-7431 ឌុបគ្នាដើរលេងខណៈពេលកំពុងតែធ្វើដំណើរនោះក៏ជួបជាមួយក្រុមជនសង្ស័យមួយក្រុមជិះម៉ូតូ៣ ទៅ៤គ្រឿង ដែលក្នុងដៃប្រដាប់ទៅដោយដាវសាំម៉ូរៃ បានដេញកាប់ក្រុមជនរងគ្រោះប្លន់យកម៉ូតូគេចខ្លួនដោយសុវត្តិភាពតែម្តង ។
ចែករំលែកព័តមាននេះ