រាជធានីភ្នំពេញ ៖ ការចាប់អារម្មណ៍របស់តារាសិល្បៈជាច្រើននិយមចំណាយប្រាក់រាប់រយដុល្លារ ដើម្បីទៅកែសម្ជស្សឲ្យឃើញស្អាតមា នហុងស៊ុយ អ្នកនាង ខៀវ សុខារ៉ាវី ដែលងាកមកសម្តែងសិល្បៈវិញនោះ មិនបានបង្ហាញ ឬប្រថុយជាមួយនឹងការកែខៃ ច្នៃមុខមាត់ឲ្យប្រសើរជាងនេះឡើយ ទោះជាតារារូបនេះ យល់ថា ផ្ទៃមុខនៅមានចន្លោះខ្វះខាតក៏ដោយ។ អ្នកនាងស្រលាញ់អ្វីដែលជាធម្មជាតិបានមកពីកំណើតម្តាយផ្តល់ឲ្យ ព្រោះមិនប្រថុយជាមួយការយកម្ជុលចាក់ដោតផ្ទៃមុខបានឡើយ ពិតជាខ្លាចប៉ះពាល់ពេលចាក់ទៅ។
បើទោះជាសម័យឥឡូវ វិស័យខាងកែសម្ជស្សកាន់តែមានលក្ខណៈជឿនលឿន ពូកែ និងអាចមានការជឿទុកចិត្តបាន រហូតមានអ្នកសម្បូរប្រាក់ហ៊ានចំណាយយករូបរាងកាយទៅជូនគ្រូពេទ្យកែសម្ជស្សឲ្យផូរផង់ថែមទៀតផង។ ក្នុងសង្គមសិល្បៈខ្មែរសម័យថ្ងៃនេះ បញ្ហាកែសម្ជស្សសព្វថ្ងៃក៏ តារាចម្រៀង តារាសម្តែងជាច្រើន ត្រូវបាននាំ គ្នាទៅកែច្នៃមុខមាត់ច្រើនគួរសម ខ្លះហោះឆ្លងដល់ក្រៅប្រទេសក៏ឃើញមាន ក្នុងនោះតារាប្រុសមួយចំនួនក៏ផ្អើលលេងមុខមាត់ខ្លាំងជាងតារាស្រីទៅទៀត មកពីគិតថា ធ្វើមុខមាត់មានហុងស៊ុយជួយលើកស្ទួយមុខមាត់ទីផ្សារសិល្បៈ។ ចំពោះបញ្ហាកែសម្ជស្សនេះដែលតារាមួយចំនួនគិតថា ជាភាពនាំឲ្យស្រស់សោភា អ្នកផងតាមគយគន់ សម្រាប់អ្នកផលិតករភាយន្តក៏ដូចជាអ្នកដឹកនាំកម្មវិធីសិល្បៈមួយចំនួន បែរជាត្អូញត្អែរថា តារាស្អាតៗមុខធម្មជាតិ ឥឡូវពិបាករកណាស់ គេនាំគ្នាទៅឲ្យពេទ្យចាក់ដោតមុខខុសទ្រង់ទ្រាយអស់ហើយ មិនដូចតារាសម្តែងជំនាន់លោកទេព រិន្ទដារ៉ូ, អម្ពរ ទេវី, សុខ ស្រីមុំ នោះទេ ចង់យកមកថតតួអ្វីក៏ល្អ មុខមាត់ស្អាតៗណាស់ខុសពីឥឡូវទៅជានាំគ្នាកែអស់ ខ្លះយកមុខទៅជាអក្សរ V តាមគេឯងអស់ ។ ម្ល៉ោះហើយទើបតួសម្តែងខ្លះ ដែលមិនទាន់ដាច់ចិត្តយកមុខមាត់ឲ្យពេទ្យវះកាត់ មើលទៅស្អាត ហើយច្រើនតែទទួលបានការហៅថតមិនថា កុន ឬឃោសនាផលិតផលប្រេង ម្ស៉ៅ ឲ្យក្រុមហ៊ុនផ្សេងៗមិនដាច់សូ ព្រោះក្រុមហ៊ុនខ្លះ គេរើសមុខមាត់តួណាស់ ឲ្យតែមើលទៅឃើញតួនោះកែសម្ជស្ស គេគ្រវីក្បាល និងអត់ហៅថតទេ ទោះល្បីក៏ដោយ សុខចិត្តហៅតួថ្មីអត់ល្បីវិញ។
សម្រាប់អ្នកនាង ខៀវ សុខារ៉ាវី តារាសម្តែងមានរូបសម្រស់ស្រស់សោភា និងស្ថិតក្នុងស្ថានភាពមុខមាត់បែបធម្មជាតិ មិនទាន់ត្រូវបានយកទៅប៉ះប៉ូវត្រង់ណា បានបញ្ជាក់ពីមូលហេតុនេះថា «ខ្ញុំក៏យល់ឃើញថា មុខមាត់ខ្លួនឯង ដូចជានៅស្ទើរផ្នែកខ្លះនៅលើផ្ទៃមុខដែរ ។ ប៉ុន្តែពេលដែលមើលឃើញពីគុណវិបត្តិនៃផ្នែកអ្នករងគ្រោះ ដោយរឿងកែសម្ជស្សតាមរយៈការបង្ហាញក្នុងសង្គមហ្វេសប៊ុក មានបញ្ហាមកនាងពិតជាខ្លាចចំពោះបញ្ហាសម្ជស្សនេះខ្លះដែរ និងមិនហ៊ានទៅជួបពេទ្យកែសម្ជស្សឡើយ ។ អ៊ីចឹងហើយ ទើបបានជាមុខមាត់របស់នាងនៅតែដដែល គ្រាន់តែយើងប្រើផលិតផលឲ្យត្រូវស្បែកមុខ ស្បែកខ្លួននោះជាការស្រេច បើឲ្យពេទ្យយកម្ជុលវះកាត់មុខ វះច្រមុះ ពិតជាខ្លាច និងអាណិតរូបសម្បត្តិធម្មជាតិដែលម្តាយចែកឲ្យ អត់ប្រថុយនោះទេ» ។ សុខារ៉ាវី បន្តថា ការពិតអ្នកកែសម្ជស្សពិតជាមិនខុសទេ ប្រសិនបើចេះរកកន្លែងដែលជឿទុកចិត្ត មិនមានអ្វីកើតឡើងទៅថ្ងៃក្រោយ ព្រោះផ្នែកវិទ្យាសម្ជស្សនេះ ក៏មានការពេញនិយម ពេទ្យក៏មានជំនាញ គ្រាន់យើងត្រូវការយល់ដឹងពីកន្លែងណាដែលធ្វើទៅល្អ ឬទៅរកពេទ្យណាមានជំនាញវិជ្ជាជីវៈច្បាស់លាស់ នោះពិតជាមិនអីនោះទេ ទើបមានអ្នកនៅតែកែច្នៃ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ