រាជធានីភ្នំពេញ ៖ រដ្ឋមន្រ្តីក្រសួងធម្មការនិងសាសនា លោក មិន ឃិន បានមានប្រសាសន៍ថា ” ទីតំាងវិទ្យាស្ថានពុទ្ឋសាសនបណ្ឌិត្យ មិនមានការលក់ ដោះដូរ ឬ ការរុះរើនោះទេ ” ។
លោករដ្ឋមន្រ្តីមានប្រសាសន៍បែបនេះនៅរសៀលថ្ងៃទី០៩ តុលា ២០១៤ នៅវិមានរដ្ឋសភាក្នុងឱកាសដែលលោក មិន ឃិន បានដឹកនំាមន្រ្តីជាន់ខ្ពស់ក្រសួងធម្មការចូលទៅឆ្លើយបំភ្លឺផ្ទាល់មាត់ចំពោះមុខគណៈកម្មការអប់រំ យុវជន កីឡា ធម្មការ កិច្ចការសាសនា វប្បធ៌ម និងទេសចរណ៍នៃរដ្ឋសភា ។ បើតាមលោករដ្ឋមន្រ្តី ដីមួយផ្នែកដែលក្រុមហ៊ុនណាហ្កាវើល កំពុងបើកការដ្ឋានសាងសង់នោះ មានកិច្ចសន្យាខ្ចី ដោយក្រសួងមិនបានទទួលកម្រៃនោះទេ ហើយពេលនេះក្រសួងធម្មការបានបញ្ជាឲ្យក្រុមហ៊ុនណាហ្កាវើលរុះរើវិញហើយ ។
គួរបញ្ជាក់ថា ការឆ្លើយបំភ្លឺផ្ទាល់មាត់របស់រដ្ឋមន្រ្តីក្រសួងធម្មការនិងសាសនា ចំពោះមុខគណៈកម្មការទី៧នៃរដ្ឋសភានារសៀលនេះ បានធ្វើឡើងបន្ទាប់ពីមានការលើកឡើង និងក្តីបារម្ភរបស់ប្រជាពលរដ្ឋនិងព្រះសង្ឃមួយចំនួនជុំវិញការដ្ឋានសំណង់របស់ក្រុមហ៊ុនណាហ្កាវើល នៅលើទីតំាងវិទ្យាស្ថានពុទ្ឋសាសនបណ្ឌិត្យ ស្ថិតនៅក្បែរសួនច្បារសម្តេចតេជោ ហ៊ុន សែន និងវិមានរដ្ឋសភា ក្នុងសង្កាត់ទន្លេបាសាក់ ខណ្ឌចំការមន ថាទំនងជាក្រសួងធម្មការដោះដូរ ឬលក់ទីតំាងវិទ្យាស្ថាននេះ ៕
ចែករំលែកព័តមាននេះ