រាជធានីភ្នំពេញ ៖ បុរសចំណាស់ម្នាក់ស្រវឹងស្រាជោកជាំបើកម៉ូតូបញ្រ្ចាសទិសដៅចរាចរណ៍ ហើយជ្រុលទៅបុកចំពីមុខរថយន្តកូរ៉េ បណ្តាលឱ្យដួលម៉ូតូរបួសក្បាលជង្គង់ ក៏មានកំហឹងក្រោយវាយកញ្ចក់រថយន្តកូរ៉េមុខរថយន្តកូរ៉េ បែកខ្ចាយរួចបង់លុយឱ្យម្ចាស់រថយន្ត៥០ដុល្លារដើម្បីបញ្ចប់រឿង ។ ហេតុការណ៍នេះកើតឡើងកាលពីម៉ោង៨និង៣០នាទី យប់ ថ្ងៃទី ០៨ តុលា ២០១៤ នៅចំណុចមុខតុលាការកំពូល តាមបណ្តោយផ្លូវព្រះសុធារស ស្ថិតក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានពីកន្លែងកើតហេតុបានឱ្យដឹងថានៅមុនពេលកើតហេតុគេឃើញបុរសចំណាស់ស្រវឹងស្រាជោកជាំម្នាក់ជិះម៉ូតូវីវ៉ា ពណ៌ខ្មៅ មួយគ្រឿង ពាក់ស្លាកលេខភ្នំពេញ1BF-5022 ធ្វើដំណើរតាមផ្លូវព្រះសុធារសក្នុងទិសដៅពីជើងទៅត្បូង (បញ្រ្ចាសទិសដៅចរាចរណ៍) ស្របពេលនោះក៏មានរថយន្ត កូរ៉េដឹកទឹកកក អនាម័យមួយគ្រឿង ពណ៌ស ពាក់ស្លាកលេខភ្នំពេញ 2F-9483 បើកក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏បានវ៉ាក់អឺគ្នាជាមួយម៉ូតូវីវ៉ាដែលបើកខុសទិសដៅចរាចរណ៍ ពេលនោះតៃកុងរថយន្តបានចាប់ហ្រ្វាំងទាំងបង្ខំ ហើយម៉ូតូក៏បានបុកចំពីមុខរថយន្តពេញទំហឹង បណ្តាលធ្លាក់កាងរថយន្តខាង មុខនិងដួលម៉ូតូរបួសជង្គង់បុរសចំណាស់ ។ បន្ទាប់ពីជួបគ្រោះថ្នាក់ចរាចរណ៍រងរបួសហើយនោះបុរសចំណាស់ខាងលើបានបញ្ចេញកំហឹង ដោយក្រោកមកវាយកញ្ចក់មុខរបស់រថយន្តកូរ៉េ បែកខ្ចាយនិងចង់វាយបុរសបើករថយន្តផងដែរ ។
ក្រោយពេលកើតហេតុសមត្ថកិច្ចបានចុះមកពិនិត្យកន្លែងកើតហេតុក៏បានពិនិត្យឃើញថាបុរសចំណាស់ជាអ្នកខុស ហើយក៏បានចេញសំណងឱ្យទៅម្ចាស់រថយន្តចំនួន៥០ដុល្លារដើម្បីបញ្ចប់រឿងនៅនឹងកន្លែងកើតហេតុ ។
ចែករំលែកព័តមាននេះ