លោកជំទាវភរិយាអភិបាលរាជធានីភ្នំពេញ ចែកអំណោយដល់សិស្សអក្ខរកម្មនៅខណ្ឌដូនពេញ
ដោយ ៖ អប្សរា
ថ្ងៃពុធ ទី៨ ខែកញ្ញា ឆ្នាំ២០១០ ម៉ោង ១៣:៤៤
ប៊ុនរី
បានរៀបចំពិធីចែកអំណោយដល់សិស្សអក្ខរកម្ម និងសិស្សក្រីក្រចំនួន១៧៥នាក់ក្រោមអធិបតីភាពលោកជំទាវជុំ សាមីន កែប ជុតិមា
រាជធានីភ្នំពេញ ៖ សាលាខណ្ឌដូនពេញ បានរៀបចំពិធីចែកអំណោយដល់សិស្សអក្ខរកម្ម និងសិស្សក្រីក្រចំនួន១៧៥នាក់ កាលពីព្រឹកថ្ងៃទី៨ កញ្ញា ២០១០ ក្រោមអធិបតីភាពលោកជំទាវជុំ សាមីន កែប ជុតិមា ប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍រាជធានីភ្នំពេញ និងមានការចូលរួមពីលោកសុខ សម្បត្តិ អភិបាលខណ្ឌដូនពេញ អភិបាលរង ចៅសង្កាត់ទាំង១១ ។
លោកអភិបាលខណ្ឌដូនពេញបានមានប្រសាសន៍ថា ខណ្ឌដូនពេញមានថ្នាក់អក្ខរកម្ម២កន្លែង ក្នុងនោះភូមិទី២ មានចំនួន៤ថ្នាក់ សិស្សអក្ខរកម្មចំនួន៩៧នាក់ និងភូមិទី២២ មានមួយថ្នាក់ សិស្សអក្ខរកម្មចំនួន២៧នាក់ ហើយតាមបណ្តាសង្កាត់នីមួយៗមានសិស្សក្រីក្រចំនួន៥នាក់សរុបចំនួន១៧៥នាក់ ដែលត្រូវបានទទួលអំណោយនៅថ្ងៃនេះ ។
ខណ្ឌដូនពេញជាខណ្ឌមួយស្ថិតនៅចំកណ្តាលរាជធានីភ្នំពេញ ហើយជាខណ្ឌមានការរីកចំរើនអភិវឌ្ឍន៍លឿនគ្រាន់បើ តែទោះជាមានការរីកចំរើនយ៉ាងណាក្តី ក៏ស្ថានភាពក្រីក្ររបស់ប្រជាពលរដ្ឋនៅតែរុញច្រានឱ្យកុមារដល់អាយុចូលរៀនបែរជាខកខានពុំបានចូូលរៀនទៅវិញ ដោយមូលហេតុមានជីវភាពខ្វះខាតនៅក្នុងគ្រួសារ ។
ក្នុងពិធីចែកអំណោយនេះដែរ លោកជំទាវជុំ សាមីន កែប ជុតិមា បានថ្លែងថា ការអប់រំគឺជាកត្តាដ៏សំខាន់បំផុតដែលអាចរំដោះមនុស្សឱ្យរួចផុតចេញពីភាពក្រីក្រឆ្ពោះទៅរកមនុស្សដែលប្រកបដោយធនធាន មានចំណេះដឹង ចំណេះធ្វើ សីលធម៌ និងពលរដ្ឋដ៏ល្អ អាចចូលរួមចំណែកជួយអភិវឌ្ឍន៍សង្គមឱ្យមានការរីកចំរើនជាបន្តទៀត ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
