ខេត្តសៀមរាប ៖ ដើមី្បអនុវត្តឲ្យកាន់តែមានប្រសិទ្ធភាព នូវបទបញ្ជាលេខ០១បប របស់រាជរដ្ឋាភិបាលកម្ពុជា និង ដោយការយកចិត្តទុកដាក់ខ្ពស់ជាប្រចំាពីរបស់លោក ឃឹម ប៊ុនសុង អភិបាលនៃគណៈអភិបាលខេត្ត និង ជាប្រធានគណៈបញ្ជាការឯកភាពរដ្ឋបាលខេត្ត និង លោកឧត្តមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមផងនោះ នៅពេលយប់ថ្ងៃទី៣០ ខែកញ្ញា និង ថ្ងៃទី០១ តុលា ឆ្នាំ២០១៤ ក្រោមការសម្របសម្រួលដឹកនាំដោយ លោក សំរឹទ្ធ សុខុន ព្រះរាជអាជ្ញារងសាលាដំបូងខេត្តសៀមរាប និង លោកវរសេនីយ៍ឯក ស្រី យូរ៉ា មេបញ្ជាការរងនៃទីបញ្ជាការដ្ឋានកងរាជអាវុធហត្ថខេត្តសៀមរាប និងជាប្រធានមន្ទីរស្រាវជ្រាវនិងយុត្តិធម៌បានបញ្ជាដឹកនាំកម្លាំងកងរាជអាវុធហត្ថខេត្ត សហការជាមួយខ័ណ្ឌរដ្ឋបាលជលផលខេត្តសៀមរាបដែលមានវត្តមានរបស់លោក ព្រឹន សាវិន នាយខ័ណ្ឌរដ្ឋបាលជលផល និង អាជ្ញាធរស្រុកជីក្រែងបានចុះធ្វើប្រតិបត្តិការបង្រ្កាបបទល្មើសនេសាទ ក្រោមស្បៃរាត្រី នៅលើផ្ទៃជលសាបឹងទន្លេសាប ក្នុងភូមិសាស្ត្រ ភូមិមាត់ខ្លា ឃុំអន្លង់សំណ ស្រុកជីក្រែង ខេត្តសៀមរាប ជាប់ព្រំប្រទល់ខេត្តកំពង់ធំ ក្នុងនោះដោយបានប្រើប្រាស់នូវមធ្យោបាយជាកាណូតចំនួន ០៥ គ្រឿង មានកម្លាំង២៥នាក់ ចែកជាពីរមុខព្រួញ ។
ក្នុងសកម្មភាពការចុះបង្រ្កាបបទល្មើសនេសាទនេះកម្លាំងសមត្ថកិច្ចចម្រុះ បានធ្វើការបង្រ្កាបនូវឧបករណ៍ឆ្នុក ដែលប្រជានេសាទកំពុងប្រើប្រាស់នូវអំពូលភ្លើងពណ៌ ដើមី្បទាក់ទាញត្រីគ្រប់ប្រភេទ ទាំងតូចទាំងធំហើយដែលជាឧបករណ៍ត្រូវរដ្ឋាភិបាលបានហាមឃាត់ ដែលធ្វើឲ្យភ្លឺពេញផ្ទៃទឹកបឹងទន្លេសាប ប្រៀបបានជាទីក្រុងទៅហើយនោះនៅចំណុចតំបន់មាត់ខ្លា ។ នៅក្នុងយប់ថ្ងៃទី៣០ ខែកញ្ញា នោះដែរ កម្លាំងកងរាជអាវុធហត្ថខេត្តបានធ្វើការ បំផ្លាញនូវឧបករណ៍ឆ្នុក បានចំនួន២០កន្លែង និង ដកហូតបាននូវអាគុយចំនួន០៤គ្រឿងអំពូលភ្លើងម៉ែត្រពណ៌ ចំនួន០៤អំពូល ចម្រឹង៨០ដើម ខ្សែនីឡុងប្រវែង៣ពាន់ម៉ែត្រ ។
នៅក្នុងយប់នោះដែរ ក៏មានការរេរាំងពីមេភូមិនិងប៉ូលិសប៉ុស្តិ៍ប្រចាំភូមិមាត់ខ្លាដោយពួកគាត់បានទទួលដំណឹងថា មានចោរចូលមកលាក់ខ្លួននៅក្នុងតំបន់ព្រៃលិចទឹកក្នុងភូមិសាស្ត្រពួកគាត់ ។ ក៏ប៉ុន្តែទង្វើរដែលពួកគាត់លើកឡើងបែបនេះគឺពួកគាត់ផ្តល់ឱកាសឲ្យក្រុមជនល្មើស នាំគ្នាកាត់ពន្លិចឧបករណ៍ឆ្នុកទាំងនោះចូលទៅក្នុងទឹក ធ្វើឲ្យកម្លាំងសមត្ថកិច្ចរកទីតាំងនិងបទល្មើសលែងឃើញតាមពិតអ្នកដែលទៅរាយការណ៍នោះគឺក្រុមជនល្មើសដែលលបលួចដាក់ឧបករណ៍ ឆ្នុកដែលកម្លាំងសមត្ថកិច្ចយើងបានធ្វើការកាប់បំផ្លាញនិងដកហូតយកនោះទេ ។
លុះនៅព្រឹកថ្ងៃទី០១ ខែតុលា ឆ្នាំ២០១៤នោះដែរ កម្លាំងសមត្ថកិច្ចបានចុះប្រតិបត្តិការបន្ត ដើម្បីកាប់បំផ្លាញនូវឧបករណ៍ (បរ )បានចំនួន១៥កន្លែង នៅតំបន់មាត់ខ្លា ដោយធ្វើការដកហូតយកបាននូវ មាត់បរ ចំនួន៣២មាត់ និងប្រលែងត្រីគ្រប់ប្រភេទចូលបឹងធម្មជាតិវិញបានចំនួន៥០០គក្រ ព្រមទាំងបានរក្សាទុកឧបករណ៍ករទាំងនោះនៅស្នាក់ការអាវុធហត្ថកំពុងភ្លុក ដើមី្បរៀបចំដុតបំផ្លាញចោលផងដែរ ។
ចែករំលែកព័តមាននេះ