រាជធានីភ្នំពេញ ៖ បុគ្គលិកសន្តិសុខឯកជនយីហោ (ស៊ីឃ្យូរីធី ខបភើរេសិន ខូអិលធីឌី) ម្នាក់បានស្រែករកកម្លាំងសមត្ថកិច្ចជួយអន្តរាគមន៍ដល់ពួកគាត់ផង បន្ទាប់ពីពួកគាត់ធ្វើការរយៈពេល១ខែកន្លះមកហើយ មិនត្រូវបានក្រុមហ៊ុនខាងលើនោះបើកប្រាក់ខែឲ្យទាល់តែសោះ លុះពេលពួកគាត់ទៅបើកបលុយ មិនត្រឹមតែមិនបានទេ ថែមទាំងត្រូវបានប្រធានក្រុមផ្នែកសន្តិសុខម្នាក់ប្រុងវាយទាត់ធាក់ បិទទ្វារបង្ខាំង និងស្រែចោទប្រកាន់ថា ចោរៗបង្កឲ្យមានការភ្ញាក់ផ្អើលថែមទៀត ។
ហេតុការណ៌នោះបានបង្កឲ្យមានការភ្ញាក់ផ្អើលឡើងកាលពីវេលាម៉ោង១ និង២០នាទីរសៀល ថ្ងៃទី០២ តុលា ២០១៤ នៅចំណុចក្រុមហ៊ុនសន្តិសុខ ស៊ីឃ្យូរីធី ខបភើរេសិន ខូអិលធីឌី ដែលមានទីតាំងស្ថិតនៅផ្ទះលេខ៣៧Fផ្លូវ លេខ១១២KG បុរីញូវថោន ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
ជនរងគ្រោះប្ដីឈ្មោះ ស៊ឹម វណ្ណៈ ងាយុ៣៦ឆ្នាំ និងប្រពន្ធឈ្មោះ លន់ ស៊ីនឿន អាយុ៣៤ឆ្នាំ មានស្រុកកំណើតនៅក្នុងភូមិកោះគ ឃុំរកាខ្ពស់ ស្រុកស្អាង ខេត្តកណ្ដាល បានស្នាក់នៅផ្ទះជួលក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ ដោយឡែកប្រធានក្រុមហ៊ុនសន្តិសុខនោះមិនត្រូវបានស្គាល់ឈ្មោះឡើយ ប៉ុន្តែប្រធានក្រុមផ្នែកម្នាក់ ដែលជាប់ចោទថាប្រុងវាយកូនចៅឯងនោះឈ្មោះ សួស សំណាង អាយុ៣៨ឆ្នាំ (រហស្សនាម០៧)ស្នាក់នៅក្នុងក្រុមហ៊ុនខាងលើនោះត្រូវសមត្ថកិច្ចឃាត់ខ្លួនបណ្តោះអាសន្ន ។
ស្ត្រីជាប្រពន្ធបានឲ្យដឹងថា ប្រាក់ខែដែលត្រូវប្រធានក្រុមហ៊ុនខាងលើបោកប្រាស់មិនព្រមបើកឲ្យនោះ មានរយៈពេល១ខែកន្លះមកហើយ គឺក្នុង១ខែ ត្រូវទទួលបាន១២០ដុល្លារ ។ អ្វីដែលគួរឲ្យមានការឈឺចាប់នោះ នៅពេលដែលពួកគាត់ទៅបើកប្រាក់ខែ ក្រុមហ៊ុននេះមិនព្របបើកឲ្យទេ មិនតែប៉ុណ្ណោះបានគំរាមកំហែង ប្រុងវាយតប់រាល់លើក ព្រមទាំងកុហកម្ដងថាចាំថ្ងៃនេះ ម្ដងថា ចាំថ្ងៃនោះ ជួនកាលពួកគាត់បានទៅអង្គុយចាំតាំងពីព្រឹករហូតដល់ល្ងាច ដាច់បាយដាច់ទឹកថែមទៀត ដែលមិនខុសពីទៅសុំទាននោះឡើយ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ