រាជធានីភ្នំពេញ ៖ ចៅក្រមតុលាការកំពូលបានបន្តបើកសវនាការកាត់ទោសអតីតស្នងការនគរបាលរាជធានីភ្នំពេញម្នាក់ដែលជាមនុស្សបែ្លកធ្លាក់ពីលើមេឃមក ពេលនេះជាឧក្រិដ្ឋជន ឈ្មោះហេង ពៅ និងបាននាំខ្លួនមកកាន់បន្ទប់សវនាការនៃតុលាការកំពូលចំនួន២ថ្ងៃជាប់គ្នាហើយ គឺថ្ងៃទី៣០ កញ្ញា និងថ្ងៃទី១ តុលា ដែលតាមគម្រោងសវនាការនេះមានរយៈពេល៣ថ្ងៃ ។
តុលាការកំពូល បានលើកយកសំណុំរឿងឃាតកម្មដែលជនជាប់ចោទរូបនេះ និងបក្សពួកមួយចំនួនទៀត ក្នុងនោះមានជនរងគ្រោះជាច្រើននាក់បានទទួលរងគ្រោះខ្លះពិការមួយជីវិត និងខ្លះទៀតស្លាប់បាត់បង់ជីវិត ។ ការបើកសវនាការនេះធ្វើឡើងបន្ទាប់ពីឧក្រិដ្ឋជន ហេង ពៅ បានប្តឹងសាទុក្ខប្រឆាំងនឹងការសម្រេចរបស់សាលាដំបូងរាជធានីភ្នំពេញ និងសាលាឧទ្ធរណ៍ដែលបានផ្ដន្ទាទោសរូបគាត់ដាក់គុកសរុប១០៤ឆ្នាំក្នុងពន្ធនាគាររួចទៅហើយ ។ ឧក្រិដ្ឋជន ហេង ពៅ ចង់និយាយថា អយុត្តិធម៌ណាស់ គាត់មានជីវិតតែមួយដាក់គុកគាត់ដល់ទៅជាង២ជីវិត ។ ពេលនេះគាត់មានអាយុជិត៦០ឆ្នាំទៅហើយ មានជីវិតណាជាប់ទៀត ព្រោះពេលស្លាប់ទៅមានតែនរកដែលទទួលគាត់ ។
សាលាដំបូងរាជធានីភ្នំពេញ បានចោទប្រកាន់ឈ្មោះហេង ពៅ ដោយយុត្តិធម៌ជាប់ពាក់ព័ន្ធនឹងការធ្វើឃាតលើលោក សុក សេដ្ឋាមុនី អតីតចៅក្រមសាលាដំបូងរាជធានីភ្នំពេញ ក្នុងឆ្នាំ២០០៣ ។ បន្ទាប់មកក៏មានបទចោទប្រកាន់ថាបានរួមគំនិតក្នុងការប៉ុនប៉ងសម្លាប់មន្ត្រីអគ្គិសនីសាខាចាក់អង្រែក្រោមម្នាក់ បន្ទាប់ពីជនរងគ្រោះត្រូវបានបាញ់ប្រហារឱ្យរងរបួសធ្ងន់ និងក្លាយជាជនពិការនៅតែលើរទេះរុញរហូតដល់បច្ចុប្បន្ន ។ នៅមានសំណុំរឿងក្ដីឃាតកម្មជាច្រើនទៀតត្រូវបានចង្អុលបង្ហាញថា ទាក់ទិននឹងការបញ្ជារបស់ហេង ពៅ ទាំងអស់ កាលគាត់នៅមានអំណាច «ដៃម្ខាងចាប់ដៃម្ខាងជួញ» បង្កើតក្រុមឃាតករដៃដល់បានមួយក្រុមកំពុងជាប់គុកជាមួយគ្នាសព្វថ្ងៃនេះ ។ នៅសល់ឃាតករដៃដល់ម្នាក់ទៀតឈ្មោះហេង វ៉េង បានរត់បាត់បន្ទាប់ពីចាប់ ហេង ពៅ ជាចៅហ្វាយ ។
ឃាតករម្នាក់ទៀតឈ្មោះហេង កៅ សុទ្ធតែជាសាច់ញាតិរបស់ ហេង ពៅ គេចបាត់រហូតថ្ងៃនេះ ៕
ចែករំលែកព័តមាននេះ