រាជធានីភ្នំពេញ ៖ រថយន្តកាមរីបាឡែនមួយគ្រឿងបើកបុកម៉ូតូហុងដាឌ្រីមសេ១២៥ មួយគ្រឿងបណ្តាលឱ្យរបួសធ្ងន់មនុស្សពីរនាក់ ហើយរថយន្តបានព្យាយាមបើករត់គេចក៏បានទៅបុករឺុម៉កម៉ូតូមួយគ្រឿងទៀត របួសធ្ងន់មនុស្សម្នាក់ទៀត ត្រូវបានប្រជាពលរដ្ឋដេញចាប់បានស្វាគមន៍ម្នាក់មួយដៃម្នាក់មួយជើងឡើងទ្រមខ្លួន។
រាជធានីភ្នំពេញ ៖ រថយន្តកាមរីបាឡែនមួយគ្រឿងបើកបុកម៉ូតូហុងដាឌ្រីមសេ១២៥ មួយគ្រឿងបណ្តាលឱ្យរបួសធ្ងន់មនុស្សពីរនាក់ ហើយរថយន្តបានព្យាយាមបើករត់គេចក៏បានទៅបុករឺុម៉កម៉ូតូមួយគ្រឿងទៀតបណ្តាលឱ្យរបួសធ្ងន់មនុស្សម្នាក់ទៀត ហើយត្រូវបានប្រជាពលរដ្ឋដេញចាប់បានស្វាគមន៍ម្នាក់មួយដៃម្នាក់មួយជើងឡើងទ្រមខ្លួន។ ហេតុការណ៍នេះកើតឡើងកាលពីវេលាម៉ោង ១០និងង៣០នាទីយប់ ថ្ងៃទី១ តុលា ២០១៤ នៅផ្លូវកម្ពុជាក្រោមកែង និងផ្លូវម៉ៅសេទុង ស្ថិតក្នុងសង្កាត់ផ្សារដេប៉ូ២ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តកាមរីបាឡែន ពណ៌កណ្តុរល្មេះ មួយគ្រឿង ពាក់ស្លាកលេខភ្នំពេញ2R-1190 បើកបរដោយបុរសម្នាក់យ៉ាងលឿន តាមផ្លូវកម្ពុជាក្រោម ក្នុងទិសដៅពីលិចទៅកើត ខណៈមកដល់ចំណុចកើតហេតុក៏បានបុកម៉ូតូ ហុងដាសេ១២៥ ពណ៌ខ្មៅមួយគ្រឿង ពាក់ស្លាកលេខបាត់ដំបង 1Q-6269 ជិះដោយបុរសនារី២នាក់ នៅផ្លូវម៉ៅសេទុង ក្នុងទិសដៅពិជើងទៅត្បូងយ៉ាងពេញទំហឹង បណ្តាលឱ្យម៉ូតូដួលកៀបជាប់ក្រោមរថយន្ត ចំណែកអ្នកជិះខ្ទាតចេញពីម៉ូតូបោកទៅលើផ្លូវបណ្តាលឱ្យរបួសធ្ងន់ទាំងពីរនាក់ ។ បន្ទាប់ពីបើករថយន្តបុកគេហើយ រថយន្តមិនបានឈប់នោះទេ គឺរិតតែបន្ថែមល្បឿនបើកទៅមុខទាំងកៀបម៉ូតូនៅខាងក្រោមរថយន្ត រហូតគេចខ្លួនដល់ផ្លូវលេខ១៣៤ ក៏បានធ្លាក់ម៉ូតូចេញពីក្រោមរថយន្ត ហើយបានព្យាយាមបើករត់គេច ក៏បានជ្រុលទៅបុកបុរសបើករឺុម៉កម៉ូតូពណ៌ក្រហម មួយគ្រឿង ណាក់ស្លាកលេខកណ្តាល1k-3618 បណ្តាលឱ្យបុរសអ្នកបើករបួសធ្ងន់ ។
អ្នកបើកបររថយន្តត្រូវបានប្រជាពលរដ្ឋចាប់បានស្វាគមន៍ម្នាក់មួយដៃ និងមួយជើងឡើងទ្រមខ្លួនពេលនោះសមត្ថកិច្ចមកដល់បានអន្តរាគមន៍យកជនបង្ក និងរថយន្ត ម៉ូតូទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នាតាមផ្លូវច្បាប់ ។
ចែករំលែកព័តមាននេះ