រាជធានីភ្នំពេញ ៖ កងកម្លាំងអង្គភាពង៧០ចំនួន២នាក់ រួមជាមួយមិត្តភក្តិម្នាក់ទៀតនាំគ្នាចុះពីលើម៉ូតូដេញវាយមន្រ្តីប៉ូលិសម្នាក់ដោយមិនដឹងមូលហេតុ ប៉ុន្តែត្រូវបានមន្រ្តីប៉ូលិសដកកាំភ្លើងការពារខ្លួន ធ្វើឱ្យកងកម្លាំងអង្គភាពង៧០ចំនួន២នាក់ រួមជាមួយមិត្តភក្តិម្នាក់ទៀតនោះរត់ឡើងម៉ូតូជិះគេចខ្លួនទាំងព្រលឹងចុងសក់ហើយត្រូវបានកម្លាំងសមត្ថកិច្ចប៉ូលិសខណ្ឌដង្កោ ស្ទាក់ចាប់បានទាំង៣នាក់ ។ ហេតុការណ៍នេះកើតឡើងកាលពីវេលាម៉ោង៧ និង ៤០នាទីយប់ ថ្ងៃទី ១ តុលា ២០១៤ នៅលើកំណាត់ផ្លូវជាតិលេខ៣ ស្ថិតក្នុងភូមិពងទឹក សង្កាត់ពងទឹក ខណ្ឌដង្កោ ។
ក្រុមជនបង្កវាយប៉ូលិសមិនដឹងមូលហេតុនោះ មានទី១.ឈ្មោះ សួន មុត ភេទប្រុស អាយុ២៤ឆ្នាំ ជាកម្លាំងកងអង្គភាពង៧០ ,ទី២. ឈ្មោះ ផល្លី ហ៊ួ ភេទប្រុស អាយុ២០ឆ្នាំ ជាកម្លាំងកងអង្គភាពង៧០ ។ទាំងពីរនាក់ស្នាក់នៅក្នុងអង្គភាពង៧០ ចំណែកជនទី៣.ឈ្មោះ ម៉ូរ៉ា ភេទប្រុស អាយុ២៩ឆ្នាំ ស្នាក់នៅផ្ទះជួលនៅម្តុំផ្លូវវេង ស្រេង ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានមុនពេលកើតហេតុបានឱ្យដឹងថា នៅមុនពេលកើតកម្លាំងកងអង្គភាពង៧០ចំនួន២នាក់ រួមជាមួយមិត្តភក្តិម្នាក់ទៀត បានជិះម៉ូតូស្មាសវី មួយគ្រឿង ពណ៌ខ្មៅ ពាក់ស្លាកលេខកំពង់ធំ 1F-5330 ចេញមកពីផឹកស៊ី ដោយធ្វើដំណើរតាមផ្លូវជាតិលេខ៣ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ក៏បានស្ទាក់ម៉ូតូ ម៉ាកយ៉ាម៉ាហាស៊ីរូស មួយគ្រឿង ដែលជិះដោយរមន្រ្តីប៉ូលិសម្នាក់ ធ្វើដំណើរតាមផ្លូវជាតិលេខ៣ ក្នុងទិសដៅពីជើងទៅត្បូង ហើយនាំគ្នាចុះពីលើម៉ូតូដេញវាយមន្រ្តីប៉ូលិសម្នាក់នោះ ប៉ុន្តែវាយមិនបានដោយប៉ូលិសរូបនោះបានដកកាំភ្លើងការពារខ្លួន ។ បន្ទាប់ពីដកកាំភ្លើងការពារខ្លួនហើយនោះមន្រ្តីប៉ូលិស រូបនោះបាននិយាយថា<< កុំចូលមក តែហ៊ានចូលមកប្រយ៉ាត់ខ្ញុំបាញ់ >> គ្រាន់តែឭដូច្នេះកងកម្លាំងអង្គភាពង៧០ចំនួន២នាក់ រួមជាមួយមិត្តភក្តិម្នាក់ទៀតនោះបានរត់ឡើងម៉ូតូជិះគេចខ្លួនទាំងព្រលឹងចុងសក់។ ខណៈជិះម៉ូតូគេចខ្លួនមកដល់ចំណុចផ្លូវ៣០ម៉ែត្រ ក៏ត្រូវបានកម្លាំងសមត្ថកិច្ចប៉ូលិសខណ្ឌដង្កោ ស្ទាក់ចាប់បានទាំង៣នាក់ បញ្ជូនទៅកាន់ប៉ុស្តិ៍នគរបាលរដ្ឋបាលពងទឹក ។
ក្រោយពេលឃាត់ខ្លួនគេឃើញថ្នាក់លើនៅកងអង្គភាពង៧០បានមកធ្វើការសម្របសម្រួលគ្នាជាមួយភាគីខាងប៉ូលិសដែលត្រូវមនុស្ស៣នាក់ឃាត់ខ្លួនខាងលើដេញវាយ ដោយកងអង្គភាពង៧០សុំយកកងកម្លាំងអង្គភាពង៧០ទាំង២នាក់នេះទៅធ្វើការអប់រំនៅក្នុងអង្គភាពង៧០។
ចែករំលែកព័តមាននេះ