រាជធានីភ្នំពេញ ៖ បន្ទប់ខុនដូរចំនួន០៣ផ្សេងគ្នាដែលជនសង្ស័យជួលស្នាក់នៅ ដើម្បីប្រព្រឹត្តបទល្មើសបើកលេងល្បែងស៊ីសងតាមប្រព័ន្ធអីុនធើណេត(អនឡាញ) និងជម្រិតទារប្រាក់តាមប្រព័ន្ធអ៊ីនធើរណេត ត្រូវបានកម្លាំងនគរបាលអគ្គនាយកដ្ឋានអន្តោប្រវេសន៍ធ្វើការចុះឆែកឆេរនិងបង្រ្កាប ដោយឃាត់ខ្លួនបានជនសង្ស័យជនជាតិកូរ៉េ ចំនួន៥នាក់ និងដកហូតបានគ្រឿងអេឡិចត្រូនិច និងកុំព្យូទ័រជាច្រើនគ្រឿង ។
ប្រតិបត្តិការនេះធ្វើឡើងកាលពីវេលាម៉ោង៥ល្ងាចថ្ងៃទី០១ តុលា ២០១៤ ដឹកនាំដោយលោកព្រះរាជអាជ្ញារង មាស ច័ន្ទពិសិដ្ឋ និងលោក ឧត្តមសេនីយ៍ទោ អ៊ុក សីលា ប្រធាននាយកដ្ឋានសើុបអង្កេតនិងអនុវត្តនីតិវិធី ចំណុះឱ្យអគ្គនាយកដ្ឋានអន្តោប្រវេសន៍ ដែលទីតាំងខុនដូរនោះទី១លេខ៦០ បន្ទប់លេខ៨០៥ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ឃាត់ខ្លួនបានជនសង្ស័យជនជាតិកូរ៉េចំនួន៣នាក់ ។ ទី២ ទីតាំងខុនដូរមរកតខ្មែរ បន្ទប់លេខ៥០១ អគារលេខ៣៨ ផ្លូវលេខ៣១៧ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ឃាត់ខ្លួនបានជនសង្ស័យជនជាតិកូរ៉េចំនួន៣នាក់ និងទីតាំងខុនដូរ Decathle Diamond បន្ទប់លេខ១០០៦ អគារលេខ១៥៨ ផ្លូវ១៣៥ ស្ថិតក្នុងសង្កាត់ទឹកល្អក់ទី២ ជនសង្ស័យដឹងខ្លួនរត់គេចខ្លួនអស់។ ទីតាំងខាងលើនេះជនសង្ស័យជួលស្នាក់នៅ ដើម្បីប្រព្រឹត្តបទល្មើសបើកលេងល្បែងស៊ីសងតាមប្រព័ន្ធអីុនធើណេត(អនឡាញ) និងជម្រិតទារប្រាក់តាមប្រព័ន្ធអីុនធើណេត ជួញដូរគ្រឿងញៀន និងស្នាក់នៅឆ្លងដែនខុសច្បាប់ ។
ដោយធ្វើការស្រាវជ្រាវកន្លងមក កម្លាំងនគរបាលអគ្គនាយកដ្ឋានអន្តោប្រវេសន៍ ក៏ឈានទៅឆ្មក់ឆែកឆេរនិងបង្រ្កាបទីតាំងខុនដូរខាងលើ ដោយឃាត់ខ្លួនបានជនសង្ស័យជនជាតិកូរ៉េចំនួន៥នាក់ បញ្ជូនទៅសាកសួរនៅអគ្គនាយកដ្ឋានអន្តោប្រវេសន៍ ។
ចែករំលែកព័តមាននេះ