ខេត្តបាត់ដំបង ៖ នៅវេលាម៉ោង៦ល្ងាច ថ្ងៃទី១ តុលា ២០១៤ កម្លាំងការិយាល័យប្រឆាំងគ្រឿងញៀន និងកម្លាំងបង្ការបង្រ្កាបរបស់ស្នងការដ្ឋាននគរបាលខេត្តបាត់ដំបង បានចុះប្រតិបត្តិការបង្រ្កាបក្រុមជួញដូរគ្រឿងញៀនចំនួន៦នាក់ នៅលើកំណាត់ផ្លូវជាតិលេខ៥ ចំណុចខាងមុខខ្លោងទ្វារចូលវត្តកំនប់ ស្ថិតក្នុងភូមិពុកឆ្មារ ឃុំអន្លង់វិល ស្រុកសង្កែ ខេត្តបាត់ដំបង ។
នៅក្នុងប្រតិបត្តិការ ចុះបង្រ្កាបករណីជូញដូរគ្រឿងញៀននេះផងដែរ កម្លាំងសមត្ថកិច្ចបានធ្វើការឃាត់ខ្លួនបានមនុស្សចំនួន៦នាក់ ក្នុងនោះមានស្រី២នាក់ នៅក្នុងចំណោមជនសង្ស័យ៧នាក់ ដោយជនសង្ស័យម្នាក់រត់គេចខ្លួនរួច ។ ក្នុងនោះដែរកម្លាំងសមត្ថកិច្ចរឹបអូសបានរថយន្តរបស់ក្រុមជនសង្ស័យចំនួន២គ្រឿង មួយគ្រឿងម៉ាកឡិចស៊ីស GS-300 ពណ៌ស និងមួយគ្រឿងទៀតម៉ាកកាមរី កាលីហ្វនីញ៉ា ពាក់ស្លាកលេខភ្នំពេញ 2Z-6876 ពណ៌ប្រផេះ ។ ក្រៅពីនោះ កម្លាំងសមត្ថកិច្ចបានរកឃើញគ្រឿងញៀន ប្រភេទម៉ាទឹកកក ចំនួនពីរកញ្ចប់ធំ ។
តាមប្រភពព័ត៌មានពីសមត្ថកិច្ចដែលចុះបង្រ្កាបករណីជួញដូរគ្រឿងញៀនខាងលើ បានឱ្យដឹងថា មេខ្លោងជូញដូរគ្រឿងញៀនដែលឃាត់ខ្លួនបានមានឈ្មោះ ធារ៉ា រស់នៅក្នុងស្រុកឯកភ្នំ ខេត្តបាត់ដំបង ។ ប្រភពដដែលបានឱ្យដឹងថា គ្រឿងញៀនទាំងនេះ ត្រូវបានក្រុមជនសង្ស័យនាំយកមកពីរាជធានីភ្នំពេញ ចូលមកកាន់ខេត្តបាត់ដំបង ។
បច្ចុប្បន្នជនសង្ស័យប្រុស-ស្រីទាំង៦នាក់ ត្រូវបានសមត្ថកិច្ចបញ្ជូនខ្លួនមកកាន់ស្នងការដ្ឋានខេត្តបាត់ដំបង ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធីច្បាប់ ។
ចែករំលែកព័តមាននេះ