ខេត្តសៀមរាប ៖ សមត្ថកិច្ចចម្រុះដឹកនាំដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តបានធ្វើការឃាត់ខ្លួន ប៉ូលិសសេដ្ឋកិច្ចក្រសួងមហាផ្ទៃ ចំនួន៦នាក់យកមកសួរនាំនៅបញ្ជាការដ្ឋានកងរាជអាវុធហត្ថខេត្ត បន្ទាប់ពីមានសេចក្តីរាយការណ៍ពីប្រជានេសាទថា មានករណីសមត្ថកិច្ចមួយក្រុមបានដើរប្រមូលលុយយ៉ាងសន្ធឹកសន្ធាប់ ជាថ្នូរនឹងការមិនបង្ក្រាប ទើបសមត្ថកិច្ចចម្រុះធ្វើការតាមដាន និងឈានទៅដល់ការឃាត់ខ្លួនតែម្តង ។
នៅក្នុងប្រត្តិបត្តិការឃាត់ខ្លួនប៉ូលិសសេដ្ឋកិច្ចក្រសួងមហាផ្ទៃបានធ្វើឡើងនៅវេលាម៉ោងប្រមាណជា១១ថ្ងៃត្រង់ ថ្ងៃទី០១ ខែតុលា ឆ្នាំ២០១៤ ស្ថិតក្នុងតំបន់ទន្លេសាប នៅចំណុចភូមិសាស្រ្តកងមាស ភូមិមាត់ខ្លារ ឃុំអន្លង់សំណរ ស្រុកជីក្រែ ខេត្តសៀមរាប ជាប់ព្រំប្រទល់ខេត្តកំពង់ធំ ។
លោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តបានឲ្យដឹងថាបញ្ហានេះលោកសុំមិនធ្វើអត្ថាធិប្បាយទេនៅពេលនេះ ព្រោះសមត្ថកិច្ចកងរាជអាវុធហត្ថខេត្តកំពុងធ្វើការសួរនាំឲ្យបានលម្អិតសិន ហើយខាង លោកក៏កំពុងរងចាំរបាយការណ៍ពីប៉េអ៊ឹមមកវិញ ។ ចំណែក លោក អ៊ុំ អមរា ស្នងការរងខេត្ត ក៏បានប្រាប់ស្រដៀងគ្នាផងដែរ លោកបញ្ជាក់ថា នេះជារឿងធំណាស់ ដូច្នេះសមត្ថកិច្ច ត្រូវការពេលវេលាច្រើនទៀតដើម្បីស៊ើបអង្កេតលើជនទាំងនេះ ហើយបើចង់បានព័ត៌មានលម្អិតនោះសួរទៅខាងប៉េអ៊ឹមទៅ ។
តាមប្រភពពីប្រជានេសាទបានប្រាប់អ្នកយកព័ត៌មានថា ជនទាំងអស់នេះបានដើរប្រមូលលុយពីក្រុមអ្នករកស៊ីនេសាទនៅតំបន់ទន្លេសាបក្នុងភូមិសាស្រ្តចំនួន៥ខេត្ត ដោយពួកគេទាមទារលុយពីអ្នកនេសាទច្រើនពេក ទើបប្រជានេសាទរាយការណ៍ទៅសមត្ថកិច្ចតែម្តង ។ ប្រភពបន្តទៀតថា នៅថ្ងៃទី៣០ ខែកញ្ញាកន្លងទៅនេះមានករណីឃាត់ទូកនេសាទមួយ ហើយក្រុមប៉ូលិសសេដ្ឋកិច្ចក្រសួងខាងលើនេះទំនងជាសុំគោលការជំនាញឲ្យចាប់ ប៉ុន្តែត្រូវចរចាគ្នាវិញជាថ្នូរនឹងការដោះលែង។
ជុំវិញទៅនឹងករណីខាងលើនេះដែរ សមត្ថកិច្ចអាវុធហត្ថខេត្តនៅមិនទាន់ទំលាយពីឈ្មោះរបស់ប៉ូលិសសេដ្ឋកិច្ចក្រសួងមហាផ្ទៃ និងសំណុំរឿងនេះបាននៅឡើយទេ ព្រោះសមត្ថកិច្ចជំនាញកំពុងសួរនាំឲ្យលម្អិត ។
ព័ត៌មានលម្អិតកោះសន្តិភាពនិងផ្សាយជូនបន្តទៀតនៅពេលក្រោយ ពេលដែលសមត្ថកិច្ចបានបង្ហាញសំណុំរឿង។
ចែករំលែកព័តមាននេះ