រាជធានីភ្នំពេញ ៖ ក្មេងប្រុស២នាក់បានស្លាប់ជាបន្តបន្ទាប់ ដោយសារឧប្បត្តិហេតុគ្រោះថ្នាក់ចរាចរណ៍ក្នុងថ្ងៃតែមួយ ដាច់ដោយឡែកពីគ្នា ដោយម្នាក់ត្រូវរថយន្តដឹកទឹកសុទ្ធបុកនិងកិន ចំណែកម្នាក់ទៀត ត្រូវបានរ៉ឺម៉កម៉ូតូដឹកធុងហ្គាស់បុកនិងកិនដែរ។
ករណីទី១កើតឡើង កាលពីវេលាម៉ោង៩និង១០នាទីព្រឹក ថ្ងៃទី០១ តុលា នៅលើកំណាត់ផ្លូវជាតិលេខ២ ត្រង់ចំណុចកន្លែងលក់អុស ដែលមានទីតាំងស្ថិតនៅ ក្នុងភូមិក្រាំងស្វាយ សង្កាត់ព្រែកកំពឹស ខណ្ឌដង្កោ។ ក្មេងប្រុសរងគ្រោះឈ្មោះ រិន ណារ៉ុង អាយុ២ឆ្នាំ មានឪពុកឈ្មោះ រិន ម៉ាប់ អាយុ៤០ឆ្នាំ មានទីលំនៅក្នុងភូមិកើតហេតុខាងលើ ។ ចំណែករថយន្តបង្កម៉ាកគា ពណ៌ខៀវ ពាក់ស្លាកលេខភ្នំពេញ 2C-3253 ជារថយន្តដឹកទឹកសុទ្ធ ក្រុមហ៊ុនណាសូកា បើកបរដោយបុរសម្នាក់ ឈ្មោះកប កឹប អាយុ២៤ឆ្នាំ មានទីលំនៅក្នុងភូមិកណ្ដោស ឃុំពត់ស ស្រុកបាទី ខេត្តតាកែវ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តបង្កបានបើកបរដឹកទឹកសុទ្ធទៅដាក់ឲ្យបុរសជាឪពុកក្មេងប្រុសរងគ្រោះខាងលើនោះ បន្ទាប់ពីដាក់ទឹកសុទ្ធដបធំចំនួន៦ដបរួច រថយន្តនោះបានបើកបន្តដំណើរទៅមុខទៀត ហើយមិនបានដឹងថាក្មេងប្រុសរងគ្រោះលេងនៅខាងមុខរថយន្តនោះទេ ។ ពេលនោះក៏បានបុកនិងកិន បណ្ដាលឲ្យបែកក្បាលស្លាប់ភ្លាមនៅនឹងកន្លែងតែម្ដង ក្រោយពេលកើតហេតុ រថយន្តនិងអ្នកបើកបរ ត្រូវបានឃាត់នាំយកទៅកាន់ការិយាល័យចរាចរផ្លូវគោករាជធានីភ្នំពេញ រង់ចាំការដោះស្រាយតាមផ្លូវច្បាប់នៅពេលក្រោយទៀត។
ដោយឡែកករណីទី២ បានកើតឡើងកាលពីវេលាម៉ោង១០និង១៥នាទីព្រឹកថ្ងៃទី០១ តុលា នៅតាមផ្លូវបេតុង ស្ថិតក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ បង្កឡើងដោយរ៉ឺុំម៉កម៉ូតូដឹកហ្គាស១គ្រឿង បើកបរដោយយុវជនម្នាក់មិនស្គាល់ឈ្មោះ និងត្រូវបានប្រជាពលរដ្ឋឃាត់ខ្លួនប្រគល់ឲ្យប៉ូលិសចាត់ការតាមច្បាប់ ។ ក្មេងប្រុសរងគ្រោះឈ្មោះអ៊ុក ភក្ដី អាយុ៥ឆ្នាំ មានឪពុកឈ្មោះអ៊ុក សុផាន អាយុ៣៦ឆ្នាំ និងម្ដាយឈ្មោះសន វណ្ណី អាយុ៣២ឆ្នាំ រស់នៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ