ខេត្តបាត់ដំបង ៖ បុរសម្នាក់ត្រូវជនមិនស្គាល់មុខចូលទៅកាច់សោលួចយកម៉ូតូស៊េរីទំនើបមួយគ្រឿងដែលទើបនឹងទិញ រួចជិះគេចខ្លួនបាត់ ខណៈពេលកំពុងផឹកស៊ីសប្បាយជាមួយមិត្តភក្ដិនៅក្នុងអាហារដ្ធានមួយកន្លែង នៅក្នុងភូមិប៉ោយយង់ ឃុំតាពួង ស្រុកថ្មគោល កាលពីវេលាម៉ោង៨យប់ ថ្ងៃទី២៩ កញ្ញា ប៉ុន្តែសំណាងល្អត្រូវកម្លាំងជំនាញរបស់ការិយាល័យព្រហ្មទណ្ឌកំរិតធ្ងន់នៃស្នងការដ្ឋានខេត្តស្ទាក់យកម៉ូតូនោះបានមកវិញ ខណៈជនប្រព្រឹត្តបានរត់រួចខ្លួន។
មន្ត្រីការិយាល័យព្រហ្មទណ្ឌកំរិតធ្ងន់និយាយថា ម៉ូតូនោះត្រូវជនម្នាក់ជិះយកទៅលក់នៅស្ដង់ទិញលក់ម៉ូតូម្ដុំផ្សារថ្មី ក្រុងបាត់ដំបង កាលពីរសៀលថ្ងៃទី៣០ កញ្ញា ក្នុងតំលៃ៨០០ដុល្លារ។ ប៉ុន្តែដោយគ្មានឯកសារបញ្ជាក់ និងលក់ក្នុងតំលៃថោកគួរឲ្យសង្ស័យ ទើបអ្នកទិញរាយការណ៍ប្រាប់សមត្ថកិច្ចជំនាញឲ្យចុះទៅពិនិត្យ តែត្រូវជននោះជិះម៉ូតូគេចពេលឃើញសមត្ថកិច្ច រហូតជិតដល់ចំការដូងស្ថិតក្នុងភូមិ១៣មករា សង្កាត់ព្រែកព្រះស្ដេច ទើបត្រូវសមត្ថកិច្ចស្ទាក់យកម៉ូតូបានមកវិញ រីឯជនសង្ស័យបានរត់គេចខ្លួនបាត់។
មន្ត្រីដដែលថា ក្រោយពីយកបានម៉ូតូ និងធ្វើការស្រាវជ្រាវទើបដឹងថា ម៉ូតូនេះត្រូវជនដៃដល់លួចយកមកពីស្រុកថ្មគោល ដែលមានម្ចាស់ឈ្មោះគង់ គឹមស៊ីន ភេទប្រុសអាយុ២៨ឆ្នាំ នៅភូមិនិគមក្រៅ ឃុំជ្រោយស្ដៅ ស្រុកថ្មគោល។ ម៉ូតូនោះម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខបាត់ដំបង 1S-0813៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ