ខេត្តកំពង់ឆ្នាំង ៖ ជនសង្ស័យ២នាក់ ម្នាក់ជាអ្នកលួច និងម្នាក់ទៀតជាអ្នកទិញគោ ត្រូវបានម្ចាស់គោនិងសមត្ថកិច្ចស្រាវជ្រាវចាប់ខ្លួនបាន នៅវេលាម៉ោង ១០និង៣០នាទីព្រឹក ថ្ងៃទី០១ តុលា នៅលំនៅឋានរបស់ជនសង្ស័យទាំង២នាក់នេះស្ថិតក្នុងស្រុកកំពង់ត្រឡាច ។
លោក ហ៊ុន វាសនា អធិការនគរបាលស្រុកកំពង់ត្រឡាចបាននិយាយថា ជនសង្ស័យទាំង២នាក់ម្នាក់មានឈ្មោះ យ៉ោប លាស់ អាយុ៣០ឆ្នាំ មានទីលំនៅភូមិខ្នាយកកោះ ឃុំសែប ស្រុកកំពង់ត្រឡាច ជាអ្នកលួចគោ និងម្នាក់ទៀតឈ្មោះ យ៉ោម ស្លេះ អាយុ៣៥ឆ្នាំ មានទៅលំនៅភូមិជ្រលងកៃស្នា ឃុំឈូកស ស្រុកកំពង់ត្រឡាច ជាអ្នកទិញគោ ទាំង២នាក់ជនជាតិអិុស្លាមដូចគ្នា ។ លោកបន្តថា នៅវេលាម៉ោងប្រមាណជាង៩យប់ ថ្ងៃទី៣០ កញ្ញា ឈ្មោះ យ៉ោប លាស់ បានទៅលួចគោមួយក្បាលជារបស់ឈ្មោះ លាស់ ទាំ អាយុ៤៥ឆ្នាំ ដែលនៅភូមិខ្នាយកកោះជាមួយគ្នា ហើយបានយកទៅលក់ឱ្យឈ្មោះ យ៉ោម ស្លេះ នៅភូមិជ្រលងកៃស្នា ក្នុងតម្លៃ១លាន៦៥ម៉ឺនរៀល តែឱ្យបាន១លាន៤៥ម៉ឺនរៀល នៅខ្វះ២០ម៉ឺនសិន ។ នៅយប់នោះ ក្រោយពីប្រគល់លុយ ប្រគល់គោ ទៅវិញទៅមក នៅចំក្បាលថ្នល់សែប ឃុំតាជេសរួចហើយ ឈ្មោះ យ៉ោម ស្លេះ បានដឹកគោ យកទៅទុកនៅព្រះវិហារអិុស្លាមមួយកន្លែងនោះក្នុងភូមិស្រែអ៊ុក ឃុំតាំងក្រសាំង ស្រុកទឹកផុស ដែលជាព្រះវិហារមួយ ត្រូវបានអង្គការសាសនាអិុស្លាមផ្តល់ប្រាក់ប្រមូលទិញគោសម្រាប់កាប់ក្នុងពេលបុណ្យប្រពៃណីខ្មែរអិុស្លាមក្នុងពេលខាងមុខនេះ ។
លោកឱ្យដឹងទៀតថា លុះព្រឹកឡើងថ្ងៃទី០១ តុលា ម្ចាស់គោដឹងថាបាត់គោ ក៏បានសហការជាមួយមន្ត្រីនគរបាលដើររកគោ ដល់ស្រុកទឹកផុស ហើយបានប្រទះឃើញគោគេចងទុកនៅជិតវិហារអិុស្លាមនោះ ក៏ប្តឹងប៉ូលិសឱ្យស្រាវជ្រាវចាប់ខ្លួនបានអ្នកទិញនិងអ្នកលួច នៅស្រុកកំពង់ត្រឡាចតែម្តង។
នៅចំពោះមុខសមត្ថកិច្ច ជនសង្ស័យឈ្មោះ យ៉ោម ស្លេះ បានសារភាពថា ខ្លួនពិតជាបានទិញគោពីឈ្មោះ យ៉ោប លាស់ ដោយណាត់ជួបប្រគល់លុយនៅក្បាលថ្នល់សែប ហើយខ្លួនបានដឹកយកទៅទុកនៅស្រុកទឹកផុសមែន ។ ចំណែកឈ្មោះ យ៉ោម លាស់ វិញបានឆ្លើយបដិសេធថា ខ្លួនមិនបានលួចនិងមិនដឹងអ្វីទាំងអស់ ៕
ចែករំលែកព័តមាននេះ