ខ្ចីដៃសម្លាប់មនុស្ស
ប៉ាទ្រីសៀ អាល់លែនសុន កើតក្នុងគ្រួសារមួយដែលឪពុកម្តាយលែងលះគ្នា និងមានគ្រួសារថ្មី រៀងៗខ្លួន ទុកកូនស្រីតូចឱ្យជីដូនខាងម្តាយ និងម្តាយមីងចិញ្ចឹមបីបាច់ ។ នាងជាក្មេងស្រីស្អាតតាំងពីតូច ។ ដោយសារជីដូន និងម្តាយមីងអាណិតនាងកំព្រីកំព្រាខំចិញ្ចឹមដោយទឹកចិត្តស្រទ្បាញ់អស់ពីពោះពីពង់ ទំយើគ្រប់យ៉ាងចង់បានអីបានហ្នឹង ជាហេតុនាំឱ្យនាងបានចិត្តហ៊ានធ្វើ អ្វីៗតាមចិត្តខ្លួន ។
រៀនចប់បឋមសិក្សាក៏ឈប់រៀន ហើយមានប្តីពេលអាយុទើបតែ១៥ឆ្នាំ ។ ប្តីនាងជានាយទាហានថ្នាក់ទាប មានទ្រព្យសម្បត្តិល្មមតែរស់សមរម្យប៉ុណ្ណោះ ។ ពួកគេរស់នៅជាមួយគ្នាមានកូន៣នាក់ ។ បន្ទាប់ពីបានកូន៣នាក់ ប៉ាទ្រីសៀ ចាប់ផ្តើមកើតគំនិតពុំស្កប់ស្កល់នឹងទ្រព្យសម្បត្តិដែលកំពុងមាន ព្រោះមើលទៅអ្នកខ្លះឃើញចាញ់គេឆ្ងាយពេក ។ ហេតុនេះនាងបេ្តជ្ញាលែងលះគ្នាទាល់តែបាន ដោយប្រគល់កូនទាំង៣នាក់ ឱ្យប្តីចិញ្ចឹមម្នាក់ឯង ឯខ្លួនឯងស្វែងរកប្រុសថ្មីដែលមានទ្រព្យសម្បត្តិហូរហៀរ ។
ថ្វីបើមានកូន៣នាក់ក្តី តែប៉ាទ្រីសៀនៅតែមានសម្រស់ស្រស់ស្អាតជាង ស្រីៗក្នុងតំបន់ មិនពិបាកក្នុងការទាក់ប្រុសឱ្យសមនឹងចិត្តចង់បានរបស់ខ្លួនទ្បើយ ។ ហេតុនេះក្រោយលែងលះប្តីមុនបាន២ឆ្នាំ ប៉ាទ្រីសៀ ក៏ទាក់បានប្រុសដែលខ្លួនត្រូវការ ។ ក្នុងក្លឹបប្រណាំងសេះ ប៉ាទ្រីសៀ បានជួប ថម អាល់លែនសុខ កូនប្រុសអ្នកមានស្តុក ។ ថមមិនត្រឹមតែជាកូនអ្នកមានធំប៉ុណ្ណោះទេ ថែមទាំងមានចំណូលចិត្តមើលការប្រណាំងសេះដូចប៉ាទ្រីសៀដែរ ព្រមទាំងមានសេះប្រណាំងផ្ទាល់ខ្លួនមួយក្បាលយ៉ាងស្អាតទៀត ។ ជាមួយភាពប៉ិនប្រសប់ទាក់ប្រុស ប៉ាទ្រីសៀ មិនពិបាកក្នុងការធ្វើឱ្យថមឈ្លក់វង្វេង និងហ៊ានធ្វើ អ្វីៗគ្រប់យ៉ាងដើម្បីខ្លួនទ្បើយ ។ បញ្ហានៅត្រង់ថា ថមមានប្រពន្ធ ហើយឪពុកម្តាយថមស្រទ្បាញ់កូនប្រសាស្រីយ៉ាងខ្លាំង ប្រឆាំងដាច់ខាតអត់ឱ្យថមលែងលះប្រពន្ធ ។
ប៉ុន្តែថ្វីបើមានអាយុតិចជាងប៉ាទ្រីសៀដល់ទៅ៥ឆ្នាំ តែដោយត្រូវសម្រស់និងល្បិចប៉ិនប្រសប់របស់ប៉ាទ្រីសៀ ធ្វើឱ្យវង្វេងវង្វាន់ ថមអត់ខ្ចីស្តាប់ឪពុកម្តាយទេ ជម្នះលែងប្រពន្ធចោលទាល់តែបាន ហើយទៅរកប៉ាទ្រីសៀភ្លាម ។ ប្រការនេះធ្វើឱ្យការទាក់ទងរវាងថមនិងឪពុកម្តាយតឹងតែងខ្លាំង រហូតត្រូវឪពុកម្តាយកាត់ផ្តាច់ការផ្គត់ផ្គង់គ្រប់យ៉ាង ថែមទាំងបណ្តេញចេញពីផ្ទះទៀត ។ ទោះដូច្នេះក្តីក៏មិនអាចធ្វើឱ្យថមផ្លាស់ប្តូរអ្វីបាន ព្រោះគេងប់នឹងប៉ាទ្រីសៀខ្លាំងពេកទៅហើយ ។ ថមចាប់ផ្តើមប្រើឈ្មោះគ្រួសារទៅខ្ចីប្រាក់មិត្តភក្តិ និងដៃគូរកស៊ីរបស់គ្រួសារ ខណៈគ្រួសារអត់ដឹងអ្វីសូម្បីបន្តិច ។ គេខ្ចីប្រាក់រហូតដល់អាចទិញបានកសិដ្ឋានមួយទំហំ២ហិកតា នៅហ្សកហ្ស៊ី ហើយចាត់ចែងពិធីរៀបអាពាហ៍ពិពាហ៍យ៉ាងឧទ្បារិកនៅកសិដ្ឋាននោះ ។
អ្វីគ្រប់យ៉ាងហាក់ដូចសមតាមបំណងប្រាថ្នាសម្រាប់ប៉ាទ្រីសៀ តែបែរជាអាក្រក់សម្រាប់ថម ព្រោះជំពាក់បំណុលគេច្រើន ណាមួយមិត្តភក្តិ និងដៃគូរកស៊ីរបស់គ្រួសារដឹងរឿងខ្លួនទាស់គ្នាជាមួយឪពុកម្តាយរហូតដល់ត្រូវបណ្តេញចេញពីផ្ទះ គេលែងឱ្យខ្ចីប្រាក់ទៀត នាំដល់ជីវភាពជួបការលំបាកសម្រាប់២នាក់ដែលដឹងតែដើរលេងសប្បាយ ។ ស្របគ្នានោះ ចាប់ផ្តើមមានពាក្យចចាមអារ៉ាមជាច្រើន ហើរចូលត្រចៀកឪពុកម្តាយថមផង ហើរចូលត្រចៀកថមផង ។ ឪពុកម្តាយថមឮពាក្យគម្រាម និងឮព័ត៌មានថា ថមចង់សម្លាប់ពួកគាត់ចោល ។ ចំណែកថមឮព័ត៌មានថា ឪពុកម្តាយចង់ជួលមនុស្សឱ្យបាញ់សម្លាប់ខ្លួនចោលដែរ ។ មិនតែប៉ុណ្ណោះឪពុកម្តាយថមប្តឹងប៉ូលិសថា បាត់កាំភ្លើងមួយដើម សង្ស័យថមជាអ្នកលួច ប៉ុន្តែប៉ូលិសឆែកឆេរមើលសព្វគ្រប់អត់ឃើញកាំភ្លើងដែលបាត់នោះនៅផ្ទះថមទេ ។ ទន្ទឹមគ្នានេះ សភាពការណ៍ដែលកំពុងតែអាក្រក់ ស្រាប់តែមានរឿងអាក្រក់មួយទៀតកើតទ្បើង គឺ សុខៗសេះប្រណាំងរបស់ថមពុំដឹងជាអ្នកណាលួចចាញ់ងាប់ស្តូក ធ្វើឱ្យថមគិតថាឪពុកម្តាយខ្លួនចង់បំផ្លិចបំផ្លាញខ្លួនឱ្យរលត់រលាយ ។
ទំនាស់ និងការសង្ស័យគ្នាចេះតែបន្តតឹងតែងខ្លាំងទ្បើង នាំដល់ឪពុកម្តាយថមបង្ហើរពាក្យថា ពួកគាត់នឹងធ្វើបណ្តាំមរតកប្រគល់ទ្រព្យសម្បត្តិទាំងអស់ឱ្យប្រពន្ធមុនរបស់ថម ចំណែកថមទោះប៉ុនចុងក្រចកក៏ពួកគាត់មិនឱ្យដែរ ។ ឮពាក្យនេះប៉ាទ្រីសៀ តូចចិត្តណាស់ ព្រោះយល់ថាទ្រព្យសម្បត្តិដ៏មហាសាលទាំងនោះ ត្រូវតែធ្លាក់មកលើដៃខ្លួន ។ ថ្ងៃមួយ ថមមកដល់ផ្ទះឃើញប៉ាទ្រីសៀមានភាពភិតភ័យស្លេកស្លាំង កំពុងពួនក្នុងបន្ទប់ ។ លុះសួរថា មានរឿងអី ប៉ាទ្រីសៀឆ្លើយថាមុននេះបន្តិច លោក Waltes ដែលជាឪពុករបស់ថមបានមកដល់ផ្ទះ ពេលមកដល់ឃើញនាងនៅម្នាក់ឯងក៏ស្នើសុំនាងទ្បើងគ្រែជាមួយគ្នា ។ នាងនិយាយទៀតថា ដល់ដំណាក់កាលនេះហើយ បើមិនដោះស្រាយផ្តាច់ព្រ័ត្រទេ សភាពការណ៍កាន់តែអាក្រក់មិនខាន ។ ថមមិនដឹងល្បិចរបស់ស្រីលោភលន់ ឮនិយាយដូច្នេះក៏មានអារម្មណ៍ត្រូវបំពារបំពានធ្ងន់បំផុត ត្រូវតែដោះស្រាយផ្តាច់ព្រ័ត្រនៅពេលនេះ ដូចការចង់បានរបស់ប៉ាទ្រីសៀ ។
មែន! ស្អែកទ្បើងអ្នកផងផ្អើលគិលឃើញប្តីប្រពន្ធលោក Waltes ត្រូវបាញ់ស្លាប់ក្នុងផ្ទះ ។ រាងកាយ២នាក់ប្តីប្រពន្ធមានស្នាមគ្រាប់បាញ់ត្រូវច្រើនកន្លែងដូចគ្នា ។ ដោយដឹងច្បាស់ថម និងឪពុកម្តាយខ្លួនចងគំនុំគ្នាយូរហើយ ប៉ូលិសក៏ទៅចាប់ថមតែម្តង មិនបាច់ស្រាវជ្រាវរកជនដៃដល់ពិតប្រាកដណាទៀតទេ ។ ដំបូងថមប្រកែកញ៉ាញថា ខ្លួនអត់បានប្រព្រឹត្ត លុះក្រោយមកដឹងថា មិនអាចរួចខ្លួនក៏សារភាពថា ស្នាដៃខ្លួនមែន តែខ្លួនគ្រាន់តែបាញ់ការពារខ្លួនប៉ុណ្ណោះ ដឹងអីត្រូវពួកគាត់ស្លាប់យ៉ាងនេះ ។ គេនិយាយថា ឪពុករបស់គេបាញ់រះមកលើរូបគេមុន ពេលគេចូលផ្ទះក្នុងបំណងសួរនាំឱ្យដឹងរឿងហេតុច្បាស់ ។ ពេលនោះ គេបាញ់ព្រមានទៅវិញដើម្បីបញ្ឈប់សកម្មភាពឪពុក ហើយក៏មិននឹកស្មានថា ម្តាយនៅឈរក្បែរនោះដែរ ធ្វើឱ្យគ្រាប់បាញ់ព្រមាននោះ ត្រូវពួកគាត់ទាំង២នាក់ក្នុងពេលតែមួយ ។ ប៉ុន្តែតុលាការយល់ថា យកកាំភ្លើងជាប់ខ្លួនពេលទៅផ្ទះឪពុកម្តាយដែលមានទំនាស់គ្នា គឺមានចេតនាចាញ់សម្លាប់មនុស្សច្រើនជាង ដើម្បីបាញ់ការពារខ្លួន ។ ហេតុនេះ ថមត្រូវតុលាការវិនិច្ឆ័យដាក់ពន្ធនាគារអស់មួយជីវិត ។
ពេលវេលាដែលថមត្រូវចាប់ខ្លួន គឺពេលដែលថមនិងប៉ាទ្រីសៀ ទើបតែរស់នៅល្អូកល្អិនជាមួយគ្នាបាន២ខែ ។ ឥទ្បូវថែមជាប់គុកធ្វើឱ្យប៉ាទ្រីសៀឈឺចាប់រកអ្វីបៀបផ្ទឹមពុំបាន ។ ថ្ងៃមួយខណៈទៅសួរសុខទុក្ខប្តីក្នុងពន្ធនាគារ ប៉ាទ្រីសៀប្រគល់សំបុត្រមួយឱ្យថម ។ សេចក្តីសំបុត្រនិយាយថា «យើងទាំង២នាក់មិនអាចរស់នៅដោយអត់គ្នាបានទេ ដូច្នេះយើងទាំង២នាក់គួរតែធ្វើអត្តឃាតដើម្បីកុំឱ្យបែកគ្នាទៀត» ។ ថមពិចារណាយ៉ាងច្រើន ហើយកាន់តែកើតចិត្តស្រទ្បាញ់ប៉ាទ្រីសៀខ្លាំងជាងមុន តែគ្មានសេចក្តីក្លាហានគ្រប់គ្រាន់ក្នុងការសម្លាប់ខ្លួន ។ ប៉ាទ្រីសៀក៏ដូចគ្នា ព្រោះនាងកំពុងគិតឃើញល្បិចមួយក្នុងការលេបយកទ្រព្យសម្បត្តិរបស់ត្រកូលអាល់លែនសុនឱ្យទាល់តែបាន ។
ចិត្តលោភលន់គ្មានព្រំដែន
ក្រោយពេលថមជាប់ពន្ធនាគារបានមួយរយៈ ប៉ាទ្រីសៀទទួលយកជីតា និងជីដូនរបស់ថមមកនៅផ្ទះជាមួយ ដើម្បីមើលថែពួកគាត់ ។ ស្រីពិសពុលម្នាក់នេះ ពូកែណាស់ខាងនិយាយឱ្យគេជឿលើខ្លួន ហេតុនេះលោកតា Papaw និងលោកយាយ Nona យល់ព្រមនៅជាមួយនាងឱ្យនាងបម្រើបីបាច់ ព្រោះគិតថាថ្វីបើចៅប្រុសជាប់ពន្ធនាគារ តែប៉ាទ្រីសៀនៅតែជាចៅប្រសាស្រីចិត្តបានគួរឱ្យសរសើរណាស់ ។
ប៉ាទ្រីសៀសម្តែងល្ខោនមើលថែ ចាស់ៗទាំង២នាក់បានយ៉ាងល្អឥតខ្ចោះ ធ្វើឱ្យលោកតានិងលោកយាយមានអារម្មណ៍កក់ក្តៅទ្បើងវិញ បន្ទាប់ពីបាត់បង់កូនប្រុសនិងកូនប្រសាស្រី ហើយចៅប្រុសតែមួយគត់ក៏ត្រូវជាប់គុកទៀត ។ ប៉ាទ្រីសៀឧស្សាហ៍និយាយជាមួយពួកគាត់ថា ថ្វីបើថមជាប់ពន្ធនាគារ តែថមជាចៅតែម្នាក់គត់របស់ពួកគាត់ ដូច្នេះមានតែថមម្នាក់ប៉ុណ្ណោះដែលត្រូវបានទទួលមរតកទ្រព្យសម្បត្តិទាំងអស់របស់ត្រកូលអាល់លែនសុន ។ សម្តីនេះធ្វើឱ្យលោកតានិងលោកយាយពេញចិត្តយ៉ាងខ្លាំង ថែមទាំងសរសើរប៉ាទ្រីសៀនិយាយត្រឹមត្រូវទៀតផង ។ ហេតុនេះ ថ្ងៃមួយពួកគាត់ហៅមេធាវីរបស់ពួកគាត់ទៅកែបណ្តាំមរតក ដោយកែឈ្មោះកូនប្រុសនិងកូនប្រសាស្រី ដែលស្លាប់ទៅហើយនោះ មកជាឈ្មោះថម និងប៉ាទ្រីសៀវិញ ។
អ្នកស្រី Jean Boggs ដែលជាកូនស្រីរបស់លោកតា Papaw និងលោកយាយ Nona នឹកអន់ចិត្តដែលឪពុកម្តាយខ្លួនជឿតាមការលួងលោមរបស់ប៉ាទ្រីសៀ យល់ព្រមទៅរស់នៅជាមួយនាង ព្រោះអ្នកស្រីគិតឃើញថា ប៉ាទ្រីសៀមានចិត្តកាចសាហាវណាស់ មិនមែនជាស្រីល្អទេ ប្រហែលជាកំពុងចិញ្ចឹមផែនការអាក្រក់អ្វីម្យ៉ាងហើយ តែពួកគាត់អត់ជឿកូនស្រីខ្លួនឯង ជម្នះទៅនៅជាមួយប៉ាទ្រីសៀទាល់តែបាន ។ តាំងពីឪពុកម្តាយទៅរស់នៅជាមួយប៉ាទ្រីសៀ អ្នកស្រីបុកពោះរាល់ថ្ងៃ ជាមួយអារម្មណ៍ហាក់ដូចឃើញគ្រោះថ្នាក់កំពុងក្រវែលតាមក្រោយឪពុកម្តាយ ។
មែន! ខណៈអ្នកស្រីចេះតែព្រួយបារម្ភដូច្នេះ ស្រាប់តែថ្ងៃមួយបានទទួលទូរស័ព្ទរបស់លោកតា Papaw ជាឪពុកប្រាប់ពីសុខភាពលោកយាយ Nona ដែល សុខៗមានការប្រែប្រួលខ្លាំងដើរលែងរួច ហើយមានទំនងវិវឌ្ឍទៅរកភាពអាក្រក់ទ្បើងយ៉ាងឆាប់រហ័សគួរឱ្យបារម្ភ ។ លោកតា Papaw ថែមទាំងនិយាយទៀតថា តាំងពីថ្ងៃមកនៅជាមួយប៉ាទ្រីសៀ ថ្វីបើបាននាងបីបាច់ថែរក្សាយ៉ាងល្អបំផុត តែសុខភាពគាត់អត់ល្អ ។ សង្ស័យមានរឿងអាក្រក់កើតទ្បើងចំពោះឪពុកម្តាយខ្លួន អ្នកស្រី Jean Boggs ប្រញាប់ប្រញាល់រាយការណ៍ប្រាប់សមត្ថកិច្ច ។ ភ្លាមនោះទាំងលោកតា Papaw ទាំងលោកយាយ Nona ត្រូវបានដឹកយកទៅពិនិត្យសុខភាព ហើយលទ្ធផលចេញមកបង្ហាញច្បាស់ថា ចាស់ៗទាំង២រូបនេះ មានជាតិពុល asen ក្នុងខ្លួនខ្ពស់ ។
ខណៈប៉ាទ្រីសៀខិតខំជួលមេធាវីពូកែមកជួយដោះបន្ទុកឱ្យរួចផុតពីការចោទប្រកាន់បំពុលសម្លាប់មនុស្ស ស្រាប់តែកូនស្រីរបស់នាងជាមួយប្តីមុន ដែលនាងទើបតែយកមកនៅជាមួយបានមួយរយៈចុងក្រោយនេះ ចេញមុខធ្វើសាក្សីនិយាយប្រាប់តុលាការថា ខ្លួនបានលួចមើលឃើញម្តាយបង់ថ្នាំពុលតិចតួចជារៀងរាល់ថ្ងៃក្នុងម្ហូប ដែលធ្វើជូនលោកតា លោកយាយហូប ។ នាងនិយាយទៀតថា នាងតូចចិត្តណាស់ដែលមានម្តាយជាមនុស្សចិត្តសាហាវដូចបិសាចអុីចឹង ។ ហេតុនេះ ប៉ាទ្រីសៀអស់ផ្លូវគេចកែក៏ត្រូវតុលាការសម្រេចដាក់ពន្ធនាគាររយៈពេល៨ឆ្នាំ ។ ប៉ុន្តែទោះដូច្នេះក្តី ក៏ប៉ាទ្រីសៀប្រើគ្រប់មធ្យោបាយជួយឱ្យខ្លួនឯងបានចេញពីពន្ធនាគារវិញ មុនកំណត់ទាល់តែបាន ហើយចាប់ផ្តើមកសាងជីវិតជាថ្មី ។ នាងមិនសុខចិត្តទេ ដែលឥទ្បូវសល់តែបាតដៃទទេ ខណៈក្នុងចិត្តចង់សោយសុខលើគំនរមាសប្រាក់មហាសាល ។ ចុងក្រោយនាងសំទ្បឹងឃើញប្តីប្រពន្ធចាស់មួយគូមានទ្រព្យសម្បត្តិច្រើនគួរសម ក៏បញ្ចុះបញ្ចូលឱ្យពួកគាត់ជួលនាងជួយបីបាច់ថែរក្សាក្នុងវ័យជរា ។
ទោះបីរកការងារបានធ្វើយ៉ាងនេះក្តី ក៏ប៉ាទ្រីសៀនៅតែលោភលន់ខំច្បាមយករកទ្រព្យសម្បត្តិតាមគ្រប់មធ្យោបាយ មិនយូរប៉ុន្មានលួចបំពុលប្តីប្រពន្ធចាស់នោះ ដោយថ្នាំពុល asen ទៀត ហើយក៏ត្រូវជាប់គុកទៀតជាលើកទី២ ។ ក្រោយមកក្នុងវ័យ៧០ឆ្នាំ ជាវ័យដែលអ្នកផងរស់ស្ងៀមសប្បាយជាមួយកូនចៅ និងខំថែទាំសុខភាពឱ្យល្អ ប៉ាទ្រីសៀបែរជាត្រូវចាប់ខ្លួនជាលើកទី៣ ពីបទលក់ដូរថ្នាំបន្ថយការឈឺចាប់ខុសច្បាប់រាប់ពាន់គ្រាប់ ។ ជីវិតរបស់ស្ត្រីលោភលន់គ្មានព្រំដែនបញ្ចប់ទៅវិញដូច្នេះឯង។ នេះជាកំណត់ត្រាគួរឱ្យភ្ញាក់ផ្អើលមួយសម្រាប់ជីវិតស្រីស្អាតម្នាក់ ៕
តាមឯកសារបរទេស
ចែករំលែកព័តមាននេះ