រាជធានីភ្នំពេញ ៖ ដោយមានការស្នើសុំជួបជុំគ្នានៅទីលានប្រជាធិបតេយ្យរបស់សមាគមគ្រូបង្រៀនកម្ពុជាឯករាជ្យ ដែលមានលោក រ៉ុង ឈុន ជាប្រធាន នៅថ្ងៃទី៥ តុលា កាលពីព្រឹកថ្ងៃទី៣០ កញ្ញា អាជ្ញាធររាជធានីភ្នំពេញ បានកោះអញ្ជើញតំណាងសមាគមនោះ ដើម្បីប្រជុំពិភាក្សាទាក់ទងនឹងគម្រោងនៃការជួបជុំនោះ ។ កិច្ចប្រជុំនោះធ្វើឡើងនៅសាលារាជធានីភ្នំពេញ ក្រោមអធិបតីភាពលោក ឃួង ស្រេង អភិបាលរងរាជធានីភ្នំពេញ ដោយមានការចូលរួមពីលោក ម៉ៃ សុភក្ត្រា តំណាងសមាគមគ្រូបង្រៀនកម្ពុជាឯករាជ្យ និងមន្ត្រីពាក់ព័ន្ធក្រោមឱវាទសាលារាជធានីភ្នំពេញមួយចំនួនទៀត ។
ជាលទ្ធផលចុងក្រោយនៃកិច្ចប្រជុំនោះអាជ្ញាធររាជធានីភ្នំពេញបានអនុញ្ញាតឲ្យសមាគមគ្រូបង្រៀនកម្ពុជាឯករាជ្យជួបជុំគ្រូបង្រៀនចំនួន២០០នាក់ នៅទីលានប្រជាធិបតេយ្យដើម្បីអបអរសាទរទិវាគ្រូបង្រៀនពិភពលោក ថ្ងៃទី៥ តុលា ២០១៤ តែបានហាមមិនឱ្យមានការហែក្បួននាំញត្តិយកទៅដាក់នៅក្រសួងអប់រំយុវជន និងកីឡា និងខុទ្ទកាល័យនាយករដ្ឋមន្ត្រីនោះទេ គឺអនុញ្ញាតឲ្យតែតំណាងមួយខេត្ត១នាក់សរុប២៥នាក់នាំញត្តិទៅដាក់បាន ដោយអាជ្ញាធរសំអាងថា ការធ្វើបែបនេះចៀសវាងការកកស្ទះចរាចរណ៍ ឬការងារសន្តិសុខសណ្តាប់ធ្នាប់ក្នុងរាជធានីភ្នំពេញ ។ ម្យ៉ាងទៀតចំនួនអ្នកចូលរួមបើតាមច្បាប់ក្រោម២០០នាក់ អាជ្ញាធររាជធានី-ខេត្តមានសិទ្ធិសម្រេចបើលើសពីនេះត្រូវសុំការអនុញ្ញាតពីក្រសួងមហាផ្ទៃជាមុនសិន ។
គួររំលឹកថា លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យកាលពីថ្ងៃទី១៨ កញ្ញា ២០១៤ បានដាក់លិខិតជូនដំណឹងទៅសាលារាជធានីភ្នំពេញដោយសុំរៀបចំពិធីអបអរសាទរទិវាគ្រូបង្រៀនពិភពលោកនាថ្ងៃទី៥តុលា នៅទីលានប្រជាធិបតេយ្យដោយមានតំណាងសមាគមគ្រូបង្រៀនមកពីតាមបណ្តារាជធានី-ខេត្តទូទាំងប្រទេសសរុប៦០០នាក់ និងមានការហែក្បួនយកញត្តិទៅដាក់នៅក្រសួងអប់រំ យុវជន និងកីឡា និងខុទ្ទកាល័យនាយករដ្ឋមន្ត្រីផងដែរ ។ លោក ម៉ៃ សុភក្ត្រា តំណាងសមាគមគ្រូបង្រៀនកម្ពុជាឯករាជ្យបានឲ្យដឹងថា សមាគមគ្រូបង្រៀនកម្ពុជាឯករាជ្យនឹងរៀបចំប្រារព្ធទិវាគ្រូបង្រៀនពិភពលោក នៅថ្ងៃទី៥ តុលា ចាប់ពីម៉ោង៨ព្រឹកតទៅ ដោយមានអ្នកចូលរួម៦០០នាក់ ក្នុងគោលបំណង លើកកម្ពស់គុណភាពអប់រំនិងទាមទារប្រាក់បៀវត្សដល់មន្ត្រីរាជការ និងគ្រូបង្រៀនចំនួន១លានរៀលផងដែរ ។
បើតាមការអះអាងពីមន្ត្រីសាលារាជធានីភ្នំពេញបានឲ្យដឹងថា ជាចុងក្រោយនៃកិច្ចប្រជុំខាងលើនេះ សាលារាជធានីភ្នំពេញអនុញ្ញាតឲ្យមានការជួបជុំនៅទីលានប្រជាធិបតេយ្យចំនួន២០០នាក់ និងមិនអនុញ្ញាតឲ្យមានការហែក្បួនទេ តែអនុញ្ញាតឲ្យមនុស្ស២៥នាក់តំណាងឲ្យសមាគមគ្រូបង្រៀនមកពីរាជធានី-ខេត្តទាំង២៥ ជិះម៉ូតូយកញត្តិទាមទារទៅដាក់នៅក្រសួងអប់រំ និងខុទ្ទកាល័យនាយករដ្ឋមន្ត្រីបាន ៕
ចែករំលែកព័តមាននេះ