រាជធានីភ្នំពេញ ៖ សាលាដំបូងរាជធានីភ្នំពេញ ថ្ងៃទី២៩ កញ្ញា បានសវនាការអសាធារណៈអស់រយៈពេលជាច្រើនម៉ោងលើសំណុំរឿងនាង អូ រស្មី អតីតតារាចម្រៀង ប៉ុន្តែប្រធានក្រុមប្រឹក្សានៃអង្គជំនុំជម្រះបានលើកពេលប្រកាសសាលក្រមសំណុំរឿងនេះ ទៅខែតុុលាវិញ និងមិនបានកំណត់ថ្ងៃច្បាស់លាស់នោះទេ ។ មុននេះ មានការកំណត់យកថ្ងៃទី២១ សីហា បើកសវនាការលើអតីតតារាចម្រៀងនាង អូ រស្មី ដែលជាប់ចោទក្នុងសំណុំរឿងអូសទាញពេស្យាចារកុមារ តែត្រូវបានលើកពេលដោយមិនកំណត់ ហើយនាងអូ រស្មី ដែលអនុរក្សពន្ធនាគារនាំខ្លួនមកបន្ទប់សវនាការ ក៏បាននាំត្រទ្បប់ទៅវិញ ។
មន្ត្រីនៅសាលាដំបូងរាជធានីភ្នំពេញនិយាយថា មិនមានរឿងអ្វីដែលធ្វើឱ្យសវនាការត្រូវលើកពេលទេ ប៉ុន្តែដោយសារតែការបើកសវនាការនេះ គឺចុងម៉ោងទៅហើយ ព្រោះមានសវនាការសំណុំរឿង៣ មុនពេលបើកសវនាការលើនាង អូ រស្មី ។ លុះដល់ម៉ោងសម្រាកទៅហើយ គឺមិនអាចបន្តសវនាការថ្មីទៀតបាន ក៏ត្រូវពន្យារពេល តែមិនបានដឹងថា ថ្ងៃណានឹងបន្តសវនាការនេះទេ ។ នៅចំពោះមុខសមត្ថកិច្ច នាង អូ រស្មី បានបដិសេធរាល់ការចោទប្រកាន់នេះ ដោយអះអាងថា នោះជាគម្រោងការរបស់អ្នកស្រី តាំង ឆៃមុនី្ន ដែលគាត់មានបញ្ហារឿងផ្សេងជាមួយនាង ទើបរៀបចំឱ្យសមត្ថកិច្ចចាប់ខ្លួននាង ។
ទោះបីជាបែបណា តំណាងអយ្យការសាលាដំបូងរាជធានីភ្នំពេញ លោកខៀវ ផល្លា ព្រះរាជអាជ្ញារង នៅព្រឹកថ្ងៃទី២០ មករា បានសម្រេចធ្វើការចោទប្រកាន់តារាចម្រៀងកូន១ នាង អូ រស្មី អាយុ៣៦ឆ្នាំ ជាផ្លូវការដែលមានចំនួន២បទល្មើសគឺ៖
១-បទល្មើសជួញដូរមនុស្សដោយមានគោលដៅ តាមមាត្រា១០ ។ ២-បទល្មើសសញ្ចារកម្មដែលមានស្ថានទម្ងន់ទោសតាមមាត្រា២៨ នៃច្បាប់ស្តីពីការបង្ក្រាបអំពើជួញដូរមនុស្ស និងធ្វើអាជីវកម្មផ្លូវភេទ និងឃុំខ្លួននាង អូ រស្មី នៅពន្ធនាគារព្រៃសជាបណ្តោះអាសន្នតាំងពីពេលនោះមក ៕
ចែករំលែកព័តមាននេះ