ខេត្តត្បូងឃ្មុំ ៖ អ្នកបើកបររថយន្តក្រឡុកស៊ីម៉ងត៍ក្រុមហ៊ុនBHL ម្នាក់ឈ្មោះ ហោ គន់ ភេទប្រុស អាយុ៣៥ឆ្នាំ នៅភូមិម្កាក់ ឃុំកណ្តោលជ្រុំ ស្រុកពញាក្រែក ខេត្តត្បូងឃ្មុំ ត្រូវបានសមត្ថកិច្ចចាប់បញ្ជូនមកកាន់សលាដំបូងខេត្ត នារសៀលថ្ងៃទី៣០ កញ្ញា ២០១៤ ដោយចោទប្រកាន់ពីបទលួចបូមប្រេងម៉ាស៊ូតចំណុះ៥លីត្រ ស្មើនឹង១៥.០០០ រៀលតែប៉ុណ្ណោះ ។
លោកអនុសេនីយ៍ឯកឡុង សារិន អធិការរងនគរបាលស្រុកត្បូងឃ្មុំ ទទួលផែនយុត្តិធម៌បានឲ្យដឹងថា ក្នុងប្រតិបត្តិការស្រាវជ្រាវស៊ើបអង្កេតរបស់កម្លាំងសមត្ថកិច្ច កាលពីវេលាម៉ោង២និង១៥នាទីរសៀលថ្ងៃទី២៨ កញ្ញា កន្លងទៅ ។ ជនសង្ស័យជាអ្នកបើកបររថយន្តឈ្មោះ គន់ បានបើករថយន្តក្រឡុកស៊ីម៉ងត៍១គ្រឿងឆ្ពោះទៅកាន់ការដ្ឋានសំណង់មួយកន្លែង ស្ថិតនៅភូមិត្រពាំងផ្លុង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ហើយបានធ្វើសកម្មភាពលួចបូមយកប្រេងឥន្ធនៈ ពីក្នុងធុងប្រេងរថយន្តអស់៥លីត្រសម្រាប់យកទៅទុកលក់ ។
លោកអនុសេនីយ៏ឯក ឡុង សារិន អធិការរងនគរបាលស្រុកត្បូងឃ្មុំ បានប្រាប់បន្តថា ក្នុងពេលដែលកំពុងតែធ្វើសកម្មភាពបូមយកប្រេងនោះត្រូវបានលោក ថា ស៊ីណេត អាយុ៣៧ឆ្នាំ រស់នៅភូមិព្រះផ្តៅ ឃុំត្រពាំងផ្លុង សុ្រកពញាក្រែក ជាមេការផែស្ងួត មានទីតាំងនៅច្រកត្រពាំងផ្លុង ជាប់ព្រំដែនវៀតណាមឃើញក៏ បានរាយការណ៍តាមទូរស័ព្ទដល់ក្រុមហ៊ុន BHL ដែលមានទីតាំងនៅភូមិទួលវិហារ ឃុំជីរោទ៍ទី២ស្រុកត្បូងឃ្មុំ ។ បន្ទាប់មកលោក មល ឌីណា តំណាងឲ្យក្រុមហ៊ុនបានដាក់ពាក្យបណ្តឹង នៅអធិការដ្ឋាននគរបាលស្រុកត្បូងឃ្មុំ ជួយអន្តរាគមន៍តាមចាប់អ្នកបើកបររថយន្តខាងលើ នាល្ងាចថ្ងៃដដែល(២៨កញ្ញា ) លោកវរសេនីយ៍ត្រី សួស ស៊ាងលី អធិការនគរបាលស្រុកត្បូងឃ្មុំ បានចាត់ឲ្យប៉ុស្តិ៍រដ្ឋបាលឃុំជីរោទ៍ទី២ ចុះទៅធ្វើការឃាត់ខ្លួនដល់កន្លែងធ្វើការនៅភូមិទួលវិហារ ដកហូតបានប្រេងម៉ាស៊ូតចំណុះ៥លីត្រ ដាក់នៅក្នុងប៊ីដុងប្រេងឆារ ។
ជនសង្ស័យឈ្មោះ ហោ គន់ ឆ្លើយថា កន្លងមករូបគេធ្លាប់បានលួចបូមប្រេងម៉ាស៊្សុតពីក្នុងធុងរថយន្តរបស់ខ្លួនម្តងបាន៥លីត្រ នៅពេលដែលសន្សំបាន១០លីត្រ យកទៅលក់ម្តងបានលុយចំនួន៣ម៉ឺនរៀល ហើយលើកចុងក្រោយថ្ងៃទី២៨ កញ្ញា ២០១៤ ពេលដែលលួចបូមបាន៥លីត្រ សម្រាប់យកទុកលក់ស្របពេលមកដល់កន្លែងក្រុមហ៊ុនវិញ ត្រូវបានសមត្ថកិច្ចឃាត់ខ្លួនតែម្តង ។
ព័ត៌លម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ