ខេត្តកំពង់ចាម ៖ ស្រ្តីជាម្តាយចិត្តទុរយសរួមនិងសាហាយប្រុសម្នាក់ ត្រូវបានសមត្ថកិច្ចចាប់បញ្ជូនទៅសាលាដំបូងខេត្តនារសៀលថ្ងៃទី ៣០ កញ្ញា ២០១៤ ដោយជាប់ចោទនាំកូនស្រីបង្កើតទើបតែអាយុ១០ឆ្នាំ ឲ្យទៅសាហាយរំលោភសេពសន្ថវៈ ដើម្បីបំពេញចំណង់កាមតណ្ណា ។
លោកឧត្តមសេនីយ៍ត្រី បែន រ័ត្ន ស្នងការនគរបាលខេត្ត មានប្រសាសន៍ឲ្យដឹងថា ជនសង្ស័យទាំង២នាក់នោះ មាន ១.ឈ្មោះ នៅ សារ៉ាន់ ភេទស្រី អាយុ៣៤ឆ្នាំ ស្នាក់នៅបន្ទប់ជួលភូមិបឹងកុកទី២ សង្កាត់បឹងកុក ក្រុងកំពង់ចាម ២.សាហាយឈ្មោះ សុខ មិន ភេទប្រុស អាយុ៣៤ឆ្នាំ ជនជាតិវៀតណាម នៅភូមិចុងថ្នល់ទី១ សង្កាត់បឹងកុក ក្រុងកំពង់ចាម ។
លោកឧត្តមសេនីយ៍ត្រី បែន រ័ត្ន ស្នងការនគរបាលខេត្តមានប្រសាសន៍បន្តថា ស្រ្តីសង្ស័យឈ្មោះសា រ៉ាន់ បាននាំកូនស្រីបង្កើតអាយុ១០ឆ្នាំ ទៅដើរលេងរហូតដល់វេលាម៉ោង២និង៣០នាទីរសៀល ថ្ងៃទី២៨ កញ្ញា ទើបនាំមកដាក់នៅមុខផ្ទះវិញ ឃើញចៅស្រីដើរសភាពសុខប្លែកពីធម្មតាគ្រានោះ ជីដូនបានសួរនាំត្រូវបានចៅស្រីបា្រប់ថា ម្តាយរបស់នាងយកទៅដល់ផ្ទះជួលមួយនៅភូមិបឹងកុកទី២ ឲ្យមនុស្ស៣នាក់ចាប់រំលោភ ។ ហើយរហូតដល់វេលាម៉ោង៦ល្ងាច ថ្ងៃទី២៨ កញ្ញា ប៉ុស្តិ៍នគរបាលរដ្ឋបាល សង្កាត់បឹងកុក បានទទួលពាក្យបណ្តឹងពីស្រ្តីចំណាស់ម្នាក់ឈ្មោះ លុយ ស៊ាងហាក់ អាយុ៥១ឆ្នាំ នៅភូមិចុងថ្នល់ទី១ សង្កាត់បឹងកុក បានប្តឹងពីអតីតកូនប្រសារស្រី ឈ្មោះ សា រ៉ាន់ ថា បានល្បួងចៅស្រី របស់គាត់ឈ្មោះ «គ.គ.ន » អាយុ១០ឆ្នាំ ទៅឲ្យគេចាប់រំលោភ ។
ក្រោយពីមានហេតុការណ៍នេះ កម្លាំងប៉ុស្តិ៍រដ្ឋបាលសង្កាត់បឹងកុក សហការជាមួយនឹងនគរបាលនៃអធិការដ្ឋាននគរបាលក្រុងកំពង់ចាម ចុះទៅនាំខ្លួនជនសង្ស័យទាំង២នាក់ខាងលើ មកកាន់អធិការដ្ឋាននគរបាលក្រុងកំពង់ចាមតែម្តង ។ លោកឧត្តមសេនីយ៍ត្រី បែន រ័ត្ន ស្នងការនគរបាលខេត្តបញ្ជាក់ថា ស្ត្រីជាម្តាយចិត្តអប្រិយនេះ កន្លងមក ធ្លាប់សមត្ថកិច្ចចាប់បញ្ជូនដាក់ពន្ធនាគារខេត្តរួមជាមួយនិងប្តឹដើម ហើយស្រ្តីឈ្មោះសារ៉ាន់ បានចេញមុន ចំណែកប្តីមិនទាន់ចេញនូវឡើយ បន្ទាប់មកស្រ្តីរូបនេះ លួចមានសាហាយជាមួយនឹងបុរសជនជាតិវៀតណាម ។ ហើយចុងក្រោយនេះ បានរៀបចំគម្រោងនាំកូនស្រីជាអនីតិជនទៅឲ្យសាហាយរំលោភទៅវិញ ។ ជនសង្ស័យទាំង២នាក់ ត្រូវបានបញ្ជូនទៅសាលាដំបូងខេត្ត នារសៀលថ្ងៃទី ៣០ កញ្ញា ដើម្បីចាត់ការតាមនីតិវិធីច្បាប់។
ចែករំលែកព័តមាននេះ