ខេត្តកណ្តាល ៖ បុរសអ្នកលក់ឆ្នាំង ខ្ទះម្នាក់ បានក្អួតឈាមដេកស្លាប់ក្នុងអង្រឹង នៅពេលមកសុំស្នាក់នៅក្នុងវត្តត្រពាំងឈូក ស្ថិតក្នុងភូមិព្រែក ឃុំព្រែកគយ ស្រុកស្អាង កាលពីយប់ថ្ងៃទី២៩ កញ្ញា បន្ទាប់ពីបុរសនេះបានដួលរមៀលធ្លាក់ពីលើកាំជណ្តើរ សាលាឆាន់ លុះនៅព្រឹកថ្ងៃទី៣០ កញ្ញា ទើបក្មួយរបស់ជនរងគ្រោះ ដែលមកសុំស្នាក់នៅជាមួយគ្នាបានដឹង ក៏មានការភ្ញាក់ផ្អើលឆោឡោឡើង រាយការណ៍ដល់អាជ្ញាធរ និងសមត្ថកិច្ចស្រុកស្អាង ។
មន្ត្រីនគរបាលស្រុកស្អាងដែលចុះទៅពិនិត្យ និងសាកសួរនៅកន្លែងកើតហេតុប្រាប់ឱ្យដឹងថា ជនរងគ្រោះដែលដេកក្អួតឈាមស្លាប់នៅក្នុងអង្រឹងមានឈ្មោះ កែវ ឌយ ភេទប្រុស អាយុ៤១ឆ្នាំ មុខរបរអ្នកលក់ឆ្នាំងខ្ទះ មានលំនៅភូមិកោះត្រាយ ឃុំកំពង់ស្វាយទងត្បូង ស្រុកកំពង់ត្រាច ខេត្តកំពត ។
នគរបាលបានដកស្រង់សម្តីសាក្សីដែលត្រូវជាក្មួយប្រុសបង្កើតជនរងគ្រោះឈ្មោះ ប៊ុន លាង ឱ្យដឹងថា នៅល្ងាចថ្ងៃទី២៩ កញ្ញា ជនរងគ្រោះនិងក្មួយជាអ្នកជិះកង់លក់ឆ្នាំង ខ្ទះ បានមកសុំព្រះសង្ឃវត្តត្រពាំងឈូកស្នាក់នៅមួយយប់ ដល់ម៉ោង៧និង៣០នាទីយប់ អ្នកទាំង២បានទិញស្រាថ្នាំមួយលីត្រផឹកពេលបាយ ។
ប្រភពបន្តថា ក្រោយពីផឹកស្រាហើយក៏បានចងអង្រឹងម្នាក់មួយដេកនៅលើសាលាឆាន់ លុះដល់ម៉ោង៩និង៣០នាទីយប់ថ្ងៃដដែល ជនរងគ្រោះបានងើបពីអង្រឹងដើរ ក៏បណ្តាលឱ្យដួលរមៀលតាមកាំជណ្តើរថ្ម ធ្លាក់មកដល់ដី បណ្តាលឱ្យមានស្នាមរលាត់ និងហើមជាច្រើនកន្លែង ។ ពេលនោះក្មួយឈ្មោះ ប៊ុន លាង ក៏បានទៅលើកជនរងគ្រេោះមកដេកក្នុងអង្រឹងវិញ លុះដល់ម៉ោង៥ព្រឹកថ្ងៃទី៣០ កញ្ញា ក្មួយជនរងគ្រោះងើបពីដេកក៏បានឃើញមានឈាមហូរប្រឡាក់អង្រឹងជនរងគ្រោះ ក៏ទៅហៅ តែជនរងគ្រោះស្លាប់បាត់ទៅហើយ ៕
ចែករំលែកព័តមាននេះ