ប្រមុខប្រតិបត្តិក្រុងហុងកុងកាលពីថ្ងៃទី៣០ កញ្ញា អំពាវនាវដល់ចលនាស្និទ្ធលទ្ធិប្រជាធិបតេយ្យក្រុម OCCUPY CENTRAL បញ្ឈប់ជាបន្ទាន់នូវបាតុកម្មដែលធ្វើឱ្យស្ទះនាភាគកណ្តាលទីក្រុងនេះចាប់តាំងពី៣ថ្ងៃមកហើយ ។ លោក LEUNG CHUN YING ថ្លែងថា ពួកអ្នករៀបចំបាតុកម្មនិយាយជាច្រើនលើកថា ប្រសិនបើចលនារបស់ពួកគេក្លាយទៅជាពុំអាចត្រួតត្រាបាន នោះពួកគេនឹងអំពាវនាវឱ្យបញ្ចប់ ។
ពេលនេះខ្ញុំស្នើដល់ពួកគេឱ្យគោរពការសន្យា ហើយបញ្ឈប់ជាបន្ទាន់នូវយុទ្ធនាការរបស់ពួកគេ ។ លោកធ្វើសេចក្តីថ្លែង ការណ៍បែបនេះជាលើកដំបូង ក្រោយការប៉ះទង្គិចគ្នាកាលពីយប់ថ្ងៃទី២៨ កញ្ញា រវាងពួកបាតុករ និងប៉ូលិសដែលបុ៉នប៉ងបំបែកពួកបាតុករ ដោយប្រើឧស្ម័នបង្ហូរទឹកភ្នែក ។លោក CHAN KIN MAN សហស្ថាបនិករបស់ចលនា OCCUPY CENTRAL បានឆ្លើយតបវិញថា ប្រសិនបើលោក LEUNG CHUN YING ប្រកាសពីការលាលែងចេញពីតំណែងនោះបាតុកម្មនឹងបញ្ឈប់យ៉ាងហោចណាស់ ក៏បណ្តោះអាសន្នដែរ ។ កាលពីយប់ថ្ងៃទី២៩ កញ្ញា មនុស្សជាច្រើនពាន់នាក់ក្នុងនោះភាគច្រើនជានិស្សិត និងសិស្សវិទ្យាល័យបានប្រមូលផ្តុំគ្នាឯ ADMIRALTY មិនឆ្ងាយបុ៉ន្មានពីវិមានរដ្ឋាភិបាល ។
សារព័ត៌មានផ្លូវការចិនមួយកាលពីថ្ងៃទី២៩ កញ្ញា បានចេញបទអត្ថាធិប្បាយមួយថា បាតុកម្មស្និទ្ធលទ្ធិប្រជាធិបតេយ្យដែលកំពុងប្រព្រឹត្ត ទៅនៅក្រុងហុងកុង តាមពិតជាសកម្មភាពរបស់ពួកជ្រុលនិយមខាងនយោបាយ ។ បទអត្ថាធិប្បាយដែលមានការអនុញ្ញាតនេះធ្វើឡើង ខណៈអាជ្ញាធរធ្វើការត្រួតពិនិត្យលើបណ្តាបណ្តាញសង្គម រាល់ព័ត៌មានទាក់ទងនឹងបាតុកម្មនៅក្រុងហុងកុង ពិសេសការបញ្ជូនរូបភាពឱ្យគ្នាក្នុងបណ្តាញ INSTRAGRAM ។ កាសែតចិន GLOBAL TIMES ក្នុងបទអត្ថាធិប្បាយរបស់ខ្លួនសរសេរថា ពួកសកម្មជនរ៉ាឌីកាល់នឹងត្រូវទទួលបរាជ័យក្នុងសកម្មភាពរបស់ពួកគេ ដោយអះអាងថា បាតុកម្មនោះបំផ្លាញមុខមាត់របស់ក្រុងហុងកុង ។ បណ្តាក្រុមប្រឆាំងដឹងច្បាស់ថា គេមិនអាចផ្លាស់ប្តូរការសម្រេចចិត្តលើបែបបទនៃការបោះឆ្នោតឆ្នាំ២០១៧ ជ្រើសរើសអភិបាលក្រុងនេះឡើយ ៕
ចែករំលែកព័តមាននេះ