រាជធានីភ្នំពេញ ៖ លោក មិន ឃិន រដ្ឋមន្ត្រីក្រសួងធម្មការ និងសាសនា បានអញ្ជើញជាអធិបតីក្នុងពិធីបើកសិក្ខាសាលារយៈពេលពីរថ្ងៃស្តីពីតួនាទីព្រះពុទ្ធសាសនាពាក់ព័ន្ធនឹងអំពើហឹង្សាលើកុមារ នៅសណ្ឋាគារអ៊ឹមផើរៀល៍ រាជធានីភ្នំពេញ ដែលរៀបចំឡើងដោយអង្គការយូនីសេហ្វ និងមានមន្ត្រីសង្ឃជាច្រើនអង្គនិមន្តចូលរួម កាលពីថ្ងៃទី៣០ កញ្ញា ២០១៤។
ក្នុងឱកាសនោះលោក មិន ឃិន បានលើកឡើងថា មេដឹកនាំព្រះពុទ្ធសាសនាត្រូវជួយជម្រុញការផ្សព្វផ្សាយព្រះធម៌វិន័យព្រះពុទ្ធសាសនាស្តីពីការគាំពារកុមារ និងលុបបំបាត់រាល់ទម្រង់នៃការរើសអើង និងការប្រើអំពើហិង្សាលើកុមារតាមរយៈការបញ្ជ្រាបធម៌ព្រះសម្មាសម្ពុទ្ធដល់សហគមន៍។
លោក មិន ឃិន មានប្រសាសន៍បន្តទៀតថា ក្រសួងធម្មការ និងសាសនាជាស្ថាប័នរដ្ឋទទួលខុសត្រូវលើជំនឿសាសនារបស់ប្រជាពលរដ្ឋ ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខរាជរដ្ឋាភិបាល និងមានទស្សនៈទូលំទូលាយប្រកបដោយគតិបណ្ឌិតក្នុងការដឹកនាំជាតិបាននិងកំពុងធ្វើការអភិវឌ្ឍជាតិយ៉ាងយកចិត្តទុកដាក់ខ្ពស់ដើម្បីលើកកម្ពស់សីលធម៌របស់ប្រជាពលរដ្ឋកម្ពុជាសំដៅកាត់បន្ថយ និងឈានទៅរកការលុបបំបាត់អំពើហិង្សាលើកុមារ ជាពិសេសតាមរយៈការអប់រំរបស់ព្រះសង្ឃព្រះពុទ្ធសាសនាក្នុងគោលបំណងអប់រំទូន្មានមហាជនទូទៅឲ្យជៀសផុតពីគ្រឿងញាន ជំងឺអេដស៍ និងការប្រើប្រាស់អំពើហឹង្សាជាដើម៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ