ពួកជីហាដនៃក្រុមរដ្ឋអ៊ិស្លាម ទោះរងការវាយប្រហារតាមអាកាសរបស់សហរដ្ឋអាមេរិក និងសម្ព័ន្ធមិត្តបានវាយរុលចូលមកដល់កៀកទីក្រុងអុីនអាល់អារ៉ាប់ ជាទីក្រុងឃើតស៊ីរីទី៣ នៅតាមព្រំដែនជាមួយតួកគី ពេលដែលក្រុងអង់ការ៉ាពិនិត្យពីការចូលរួមខាងយោធារបស់ខ្លួនក្នុងក្រុមចម្រុះប្រឆាំងក្រុមរដ្ឋអ៊ិស្លាមនេះ ។
ពួកជីហាដនៃក្រុមរដ្ឋអ៊ិស្លាម ទោះរងការវាយប្រហារតាមអាកាសរបស់សហរដ្ឋអាមេរិក និងសម្ព័ន្ធមិត្តបានវាយរុលចូលមកដល់កៀកទីក្រុងអុីនអាល់អារ៉ាប់ ជាទីក្រុងឃើតស៊ីរីទី៣ នៅតាមព្រំដែនជាមួយតួកគី ពេលដែលក្រុងអង់ការ៉ាពិនិត្យពីការចូលរួមខាងយោធារបស់ខ្លួនក្នុងក្រុមចម្រុះប្រឆាំងក្រុមរដ្ឋអ៊ិស្លាមនេះ ។
យោងតាមអង្គការសិទ្ធិមនុស្សស៊ីរី OSDH ថា ពួកយុទ្ធជនក្រុមជ្រុលនិយម កាលពីថ្ងៃទី២៩ កញ្ញា ស្ថិតនៅចម្ងាយត្រឹម៥គីឡូម៉ែត្របុ៉ណ្ណោះពីទីក្រុងយុទ្ធសាស្ត្រនេះ ដែលភាសាឃើតហៅទីក្រុងកូបានេ ។ ជាលើកដំបូង គ្រាប់រុ៉ក្កែតទាំងឡាយបានធ្លាក់នៅកណ្តាលទីក្រុងនោះ ។
អង្គការ OSDH បន្តថា គ្រាប់រុ៉ក្កែតប្រមាណជា១៥គ្រាប់ត្រូវពួកជីហាដបាញ់ដាក់កណ្តាលក្រុង បណ្តាលឱ្យមនុស្សស្លាប់៣នាក់ ខណៈពួករដ្ឋអ៊ិស្លាមពីមុនមកពុំធ្លាប់រុលមកកៀកក្រុងខ្លាំងបែបនេះឡើយតាំងពីចាប់ផ្តើមការវាយលុកកាលពី២សប្តាហ៍មក ។ ប្រសិនបើពួកជីហាដវាយយកបានទីក្រុងនេះ នោះពួកគេអាចត្រួតត្រាដែនដីយ៉ាងវែងតាមបណ្តោយព្រំដែនស៊ីរី-តួកគី នាភាគខាងជើងស៊ីរី ។
ការវាយលុករបស់ពួករដ្ឋអ៊ិស្លាមលើទីក្រុងកូបានេ នាំឱ្យមានការរត់ភៀសខ្លួនរបស់ប្រជាជនយ៉ាងច្រើនដល់យ៉ាងតិច១៦០.០០០នាក់ចូលប្រទេសតួកគី ។ពួកជីវពលឃើតតួកគីនៃគណបក្សពលករឃើតឌីស្ថាន PKK ពេលនេះបានងាកលើកគ្នាមកជួយជាកម្លាំងដល់ពួកយុទ្ធជនឃើតស៊ីរី ដែលកំពុងជាប់ការឡោមព័ទ្ធក្នុងទីក្រុងនេះ ។
ការគាបសង្កត់របស់ពួករដ្ឋអ៊ិស្លាមមិនអាចឱ្យតួកគីឱបដៃនៅស្ងៀមឡើយ ខណៈគ្រាប់ផ្លោងយ៉ាងតិច៣គ្រាប់ធ្លាក់លើដែនដីខ្លួនចាប់ពីថ្ងៃទី២៨ កញ្ញាមក ។ កងទ័ពតួកគីបានដាក់ពង្រាយរថក្រោះ៣៥គ្រឿងកាលពីថ្ងៃទី២៩ កញ្ញា នៅតាមព្រំដែនជាមួយស៊ីរី ក្រោយគ្រាប់ផ្លោង៣គ្រាប់ធ្លាក់ក្នុងដែនដីខ្លួនបណ្តាលឱ្យមនុស្ស៣នាក់ត្រូវរបួស ។ កងទ័ពតួកគីបានពង្រឹងវិធានការសន្តិសុខនៅតាមព្រំដែនជាប់ទីក្រុងកូបានេ ។
រដ្ឋាភិបាលតួកគីត្រូវដាក់នាថ្ងៃទី៣០ កញ្ញា នូវគម្រោងច្បាប់មួយអនុញ្ញាតឱ្យកងទ័ពរបស់ខ្លួនអាចធ្វើអន្តរាគមន៍នៅអុីរ៉ាក់ និងនៅស៊ីរី។ ប្រសិនបើសភាអនុម័តនាថ្ងៃទី២ តុលា នោះតួកគីនឹងហក់ចូលរួមក្នុងក្រុមចម្រុះអន្តរជាតិ នាំមុខដោយសហរដ្ឋអាមេរិក បន្ទាប់ពីការរារែកពីដំបូងមក ។
ក្រុងអង់ការ៉ាបានលើកហេតុផលពីការបដិសេធរបស់ខ្លួនមិនហក់ចូលធ្វើអន្តរាគមន៍ខាងយោធាពីភាពចាំបាច់ការពារជនជាតិខ្លួន៤០នាក់ ដែលជាប់ចំណាប់ខ្មាំងរបស់ក្រុមរដ្ឋអ៊ិស្លាមចាប់តាំងពីខែមិថុនាមក ក្រោយក្រុមនេះដណ្តើមត្រួតត្រាស្ថានកុងស៊ុលតួកគីនៅក្រុងមូ៉សស៊ុលមក ។
ក្រោយការដោះលែងចំណាប់ខ្មាំងទាំងនេះកាលពីថ្ងៃទី២០ កញ្ញា និងការធ្វើដំណើរនាពេលថ្មីៗនេះរបស់ប្រធានាធិបតីតួកគី លោកវីសេប តៃយីបអ័រដូហ្កាន ទៅកាន់សហរដ្ឋអាមេរិក តួកគីហាក់ប្រែប្រួលឥរិយាបថ ដោយលោកអ័រដូហ្កាន អះអាងកាលពីថ្ងៃទី២៨ កញ្ញាថា យើងពុំអាចស្ថិតនៅក្រៅការប្រយុទ្ធប្រឆាំងពួកជីហាដឡើយ ៕
ចែករំលែកព័តមាននេះ