ខេត្តប៉ៃលិន ៖ បុរសម្នាក់យករថយន្តកាមរីស៊េរីឆ្នាំ៩៣ ចង្កូតស្តាំរបស់ខ្លួនមួយគ្រឿងទៅជួលឱ្យមិត្តភក្តិជិតដិតម្នាក់ ដើម្បីឱ្យរកស៊ីដឹកផ្លែឈើពីថៃមកស្រុកខ្មែរ ត្រង់ច្រកព្រំដែនខេត្តប៉ៃលិន លុះជួលមិនទាន់បាន១ខែផង ស្រាប់តែមិត្តភក្តិនោះយករថយន្តរបស់ខ្លួនទៅបញ្ចាំឱ្យបុរសម្នាក់ទៀត ដោយយកប្រាក់ចំនួន៥ម៉ឺនបាត (ប្រាក់ថៃ) ទៅចាយវាយលេងល្បែងកាស៊ីណូ និងស្រីញីអស់រលីង រួចរត់គេចខ្លួនបាត់ស្រមោល លុះក្រោយមក មានគេប្រទះឃើញរថយន្តចតទុកចោលនៅកន្លែងបញ្ចាំ ក៏ប្រាប់ម្ចាស់ឱ្យដាក់ពាក្យបណ្តឹងទៅប៉េអឹម ដើម្បីចុះទៅយកត្រឡប់មកផ្ទះវិញ ។
ការចុះទៅយករថយន្តនេះកើតឡើងកាលពីវេលាម៉ោង១១ និង៣០នាទីព្រឹកថ្ងៃទី២៩ កញ្ញា ២០១៤ ស្ថិតនៅភូមិដីថ្មី ឃុំស្ទឹងកាច់ ស្រុកសាលាក្រៅ ។
ប្រភពបានឱ្យដឹងថា ម្ចាស់រថយន្តឈ្មោះជុំ សំណាង ភេទប្រុស អាយុ៣៥ឆ្នាំ មានប្រពន្ធឈ្មោះឈឿន ស្រីណុច អាយុ២៩ឆ្នាំ រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន ដោយមានរថយន្តម៉ាកកាមរីពណ៌ខ្មៅ ស៊េរីឆ្នាំ៩៣ ចង្កូតស្តាំ ពាក់ស្លាកលេខ បាត់ដំបង 2A-2956 ។ ចំណែកអ្នកជួលរថយន្តឈ្មោះស៊ីណា ភេទប្រុស អាយុប្រហែល៤០ឆ្នាំ រស់នៅភូមិបឹងព្រលឹត ឃុំស្ទឹងកាច់ ស្រុកសាលាក្រៅ រីឯអ្នកទទួលបញ្ចាំឈ្មោះហែម ចន្ថា ភេទប្រុស អាយុ៥៥ឆ្នាំ រស់នៅភូមិកើតហេតុខាងលើ ។
ប្រភពពីម្ចាស់រថយន្តបានរៀបរាប់ឱ្យដឹងថា មុនពេលកើតហេតុ រូបគេបានជួលរថយន្តកាមរីនោះឱ្យទៅមិត្តភក្តិស្គាល់គ្នាជិតដិតម្នាក់ ឈ្មោះស៊ីណា ក្នុងតម្លៃ១ខែចំនួន៩០ម៉ឺនរៀល ដោយជួលតាំងពីថ្ងៃទី០៥ កញ្ញា ២០១៤ ។ ហើយមានធ្វើកិច្ចសន្យា និងមានសាក្សីផ្តិតមេដៃដឹងឮត្រឹមត្រូវ ។
ប្រភពបន្តទៀតថា មុនដំបូងជនសង្ស័យនោះបានបង់ប្រាក់នៅដើមខែចំនួនពាក់កណ្តាលដោយសន្យាថា នៅចុងខែបង់ជូនម្ចាស់រថយន្តបន្តទៀតគ្រប់ចំនួន ។ លុះក្រោយមកជិតដល់ចុងខែ ម្ចាស់រថយន្តបានទាក់ទងទៅអ្នកជួលតាមទូរស័ព្ទគេឆ្លើយប្រាប់ថា កំពុងដឹកអីវ៉ាន់នៅស្រុកសំពៅលូន ខេត្តបាត់ដំបង ។ ម្ចាស់រថយន្តក៏មិនចាប់អាម្មណ៍នោះដែរ ព្រោះអត់ធ្លាប់ឃើញរថយន្តរបស់ខ្លួនត្រូវគេបើកបរនៅក្នុងខេត្តប៉ៃលិនទេ តាំងពីមិត្តភក្តិជួលរួចមក ។ ស្រាប់តែមានមិត្តភក្តិម្នាក់ទៀត ឃើញរថយន្តរបស់គេចតទុកចោលនៅក្រោមដើមក្រខុបហាលភ្លៀង ហាលខ្យល់ ដោយយកទៅបញ្ចាំឱ្យបុរសម្នាក់ទៀតឈ្មោះហែម ចន្ថា ហើយក៏លួចសួរនាំម្ចាស់រថយន្តថា រូបគេពិតជាយករថយន្តទៅបញ្ចាំមែនឬអត់ ។
ពេលនោះម្ចាស់ភ្ញាក់ខ្លួនព្រើត ដោយមិនជឿគេនិយាយ ហើយប្រាប់ថា ជួលឱ្យមិត្តភក្តិជិត១ខែមកហើយ លុះឮដូច្នេះ ក៏ខ្ចីរថយន្តប្អូនទៅសង្កេតមើល ទើបឃើញដូចអ្វីដែលគេប្រាប់មែន លុះនៅព្រឹកថ្ងៃទី២៩ កញ្ញា បានដាក់ពាក្យបណ្តឹងទៅកងរាជអាវុធហត្ថខេត្តឱ្យចុះទៅសួរនាំ និងយករថយន្តរបស់ខ្លួនត្រឡប់មកផ្ទះវិញ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ