តបតាមការអញ្ជើញរបស់គណៈកម្មការរៀបចំពិព័រណ៍ទេសចរណ៍អន្តរជាតិ JATA Tourism EXPO ប្រទេសជប៉ុន លោកថោង ខុន រដ្ឋមន្ត្រីក្រសួងទេសចរណ៍បានដឹកនាំប្រតិភូក្រសួងទេសចរណ៍ និងផ្នែកឯកជនទៅចូលរួមក្នុងពិព័រណ៍ខាងលើដែលត្រូវបានរៀបចំពីថ្ងៃទី២៤ ដល់ថ្ងៃទី២៨ កញ្ញា ឆ្នាំ២០១៤ នៅទីក្រុងតូក្យូ ។
តាមប្រសាសន៍លោករដ្ឋមន្ត្រីក្រសួងទេសចរណ៍ពេលត្រឡប់មកកម្ពុជាវិញ កាលពីថ្ងៃទី២៨ កញ្ញា បានអះអាងថា អំឡុងពេលនៃការចូលរួមក្នុងពិរព័ណ៍អន្តរជាតិនោះ យើងបានផ្សព្វផ្សាយយ៉ាងច្រើនអំពីសក្តានុពលភាពនៃវិស័យទេសចរណ៍នៅកម្ពុជាដើម្បីជាការទាក់ទាញទាំងអ្នកវិនិយោគនិងភ្ញៀវទេសចរមកសម្រាកកំសាន្តនៅកម្ពុជាកាន់តែច្រើនថែមទៀត ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងថា គណៈប្រតិភូកម្ពុជាទទួលបានកិត្តិយសខ្លាំងណាស់ គ្រាដែលលោកត្រូវបានអញ្ជើញឡើងកាត់ខ្សែបូរួមគ្នាដើម្បីបើកសម្ពោធនិងដំណើរការពិព័រណ JATA Tourism EXPO Japan 2014 ដោយមានការយាងចូលរួមជាអធិបតីភាព របស់ព្រះអង្គម្ចាស់ AKishino រួមទាំងឥស្សរជនល្បីៗ ប្រធានសហព័ន្ធទេសចរណ៍និងផ្នែកឯកជនប្រមាណជាង១០០០នាក់ ។
លោករដ្ឋមន្ត្រីបានបញ្ជាក់ថា ក្រៅពីការចូលរួមស្តាប់បទឧទ្ទេសនាមរបស់លោកអគ្គលេខាធិការអង្គការទេសចរណ៍ពិភពលោក គណៈប្រតិភូកម្ពុជាក៏បានជួបពិភាក្សាជាមួយលោករដ្ឋមន្ត្រីក្រសួងដែនដី ហេដ្ឋារចនាសម្ពន្ធ័ដឹកជញ្ជូននិងទេសចរណ៍ជប៉ុន និងលោកប្រធានទីភ្នាក់ងារទេសចរណ៍ ជប៉ុនផងដែរ ៕
ចែករំលែកព័តមាននេះ