រាជធានីភ្នំពេញ ៖ ព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវបានធ្វើការរួមគ្នាបោះបង្គោលព្រំដែនទ្វេរភាគីបានចំនួន១២១បង្គោល លើផ្ទៃដីប្រវែង៤៨៥គីឡូម៉ែត្រ។ នេះបើតាមកាអះអាងរបស់ឯកអគ្គរាជទូតថ្មីដែលទើបតែងតាំងប្រចាំកម្ពុជាលើកឡើងក្នុងជំនួបទ្វេរភាគីជាមួយសម្តេចពញ្ញាចក្រី ហេង សំរិន ប្រធានរដ្ឋសភា កាលពីព្រឹកថ្ងៃទី៣០ កញ្ញា នៅវិមានរដ្ឋសភា ។
លោកកែវ ពិសិដ្ឋ នាយកខុទ្ទកាល័យសម្តេចហេង សំរិន និងជាអ្នកនាំពាក្យបានប្រាប់ក្រុមអ្នកសារព័ត៌មានក្រោយចប់ជំនួបថា លោក ប្រាសិដ្ឋ សាយាសិដ្ឋ (Mr. Prasith SAYASITH) ឯកអគ្គរាជទូតសាធារណរដ្ឋប្រជាធិបតេយ្យប្រជាមានិតឡាវ ដែលទើបតែងតាំងថ្មីប្រចាំកម្ពុជាបានលើកឡើងក្នុងជំនួបថា គណៈកម្មការជំនាញព្រំដែនកម្ពុជា-ឡាវរួមគ្នាបោះបង្គោលព្រំដែនទ្វេរភាគី(កម្ពុជា-ឡាវ) បានចំនួន១២១បង្គោលលើផ្ទៃដីប្រវែង៤៨៥គីឡូម៉ែត្រ ។
លោកឯកអគ្គរដ្ឋទូតលើកឡើងទៀតថា ចំពោះបង្គោលដែលនៅសេសសល់មួយចំនួនទៀត គណៈកម្មការជំនាញទាំងពីរប្រទេសនឹងជជែកគ្នាក្នុងខែតុលា ដើម្បីរួមគ្នាសម្រេចបោះបង្គោលព្រំដែនទាំងពីរប្រទេសឲ្យបានចប់រហ័ស។ ការជម្រុញបញ្ចប់បោះបង្គោលព្រំដែននេះសបញ្ជាក់ថា កម្ពុជា-ឡាវមានកិច្ចសហប្រតិបត្តិការជាមួយគ្នា យ៉ាងស្អិតល្មួត ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ