ខេត្តកំពង់ឆ្នាំង ៖ ទីតាំងម៉ាស៊ីនអារនិងច្រៀកឈើដុះស្លែ២កន្លែង បាននិងកំពុងធ្វើសកម្មភាពច្រៀកឈើទាំងថ្ងៃទាំងយប់ ដោយពុំត្រូវបានសមត្ថកិច្ចជំនាញណាធ្វើការបង្ក្រាបឡើយ ព្រោះម្ចាស់ម៉ាស៊ីនច្រៀកឈើទាំង២នាក់នេះ មានសាច់ញាតិជាមន្ត្រីខណ្ឌរដ្ឋបាលព្រៃឈើកំពង់ឆ្នាំង។
ខេត្តកំពង់ឆ្នាំង ៖ ទីតាំងម៉ាស៊ីនអារនិងច្រៀកឈើដុះស្លែ២កន្លែង បាននិងកំពុងធ្វើសកម្មភាពច្រៀកឈើទាំងថ្ងៃទាំងយប់ ដោយពុំត្រូវបានសមត្ថកិច្ចជំនាញណាធ្វើការបង្ក្រាបឡើយ ព្រោះម្ចាស់ម៉ាស៊ីនច្រៀកឈើទាំង២នាក់នេះ មានសាច់ញាតិជាមន្ត្រីខណ្ឌរដ្ឋបាលព្រៃឈើកំពង់ឆ្នាំង។
ម៉ាស៊ីនច្រៀកឈើទាំង២នោះ មួយកន្លែងជារបស់ឈ្មោះ វន សាមៀន ជាឈ្មួញរកស៊ីទិញលក់ឈើ មានទីតាំងនៅក្នុងដីឡូត៍នៅផ្ទះរបស់ខ្លួនតែម្តង គឺស្ថិតនៅក្នុងភូមិគល់គុប ឃុំស្រែថ្មី ស្រុករលាប្អៀរ និងមួយកន្លែងទៀតជារបស់ឈ្មោះ ជៀន មានទីតាំងនៅក្នុងភូមិត្រពាំងស្បូវ ឃុំស្រែថ្មី ស្រុករលាប្អៀរដែរ។
ប្រភពព័ត៌មានពីប្រជាពលរដ្ឋនៅក្បែរទីតាំងខាងលើឱ្យដឹងថា ម្ចាស់ម៉ាស៊ីនច្រៀកឈើទាំង២ខាងលើនេះ បានដឹកឈើពីស្រុកលើ យកមកអារច្រៀក ដើម្បីយកទៅលក់ ចែកចាយឱ្យតាមដេប៉ូលក់ឈើនៅក្នុងស្រុករលាប្អៀរ និងក្នុងក្រុងកំពង់ឆ្នាំង ដែលដេប៉ូមួយចំនួនជាក្រុមគ្រួសារបស់មន្ត្រីរដ្ឋបាលព្រៃឈើ ព្រោះតែហេតុនេះហើយទើបគេគ្មានការបង្ក្រាប។
លោក ហោ ដារា នាយផ្នែករដ្ឋបាលព្រៃឈើកំពង់ឆ្នាំងបានប្រាប់អ្នកយកព័ត៌មានក្នុងស្រុកថា ករណីមាស៊ីនអារ និង ច្រៀកឈើនៅចំណុចទាំង២ខាងលើនោះ លោកមិនបានដឹងទេ តែលោកនឹងធ្វើការស្រាវជ្រាវ និងបង្ក្រាបឱ្យបាន មិនឱ្យខូចឈ្មោះមេព្រៃ និងមិនឱ្យកើតមានភាពអនាធិបតេយ្យបែបនេះឡើយ។
ករណីបទល្មើសខាងលើនេះលោក គឹម ហុងសាន ព្រះរាជអាជ្ញារងអមសាលាដំបូងខេត្តកំពង់ឆ្នាំង ឱ្យដឹងដែរថាទីតាំងបទល្មើសទាំង២ទីតាំងខាងលើនេះ លោកនឹងធ្វើការស្រាវជ្រាវជាមួយសមត្ថកិច្ចជំនាញ ដើម្បីធ្វើការបង្ក្រាបឱ្យបាន មិនឱ្យពួកជនទុច្ចរិតសម្ងំរកស៊ីបំផ្លាញព្រៃឈើរបស់ជាតិតាមចិត្តនោះឡើយ។
ប្រជាពលរដ្ឋ និងអ្នកសារព័ត៌មានក្នុងខេត្តនឹងចាំមើលថា តើលោកព្រះរាជអាជ្ញា និងសមត្ថកិច្ចជំនាញ បង្ក្រាបទីតាំងអារច្រៀកឈើដុះស្លែលួចលាក់ខាងលើនេះបានឬអត់ ខណៈដឹងទីតាំងពិតប្រាកដហើយនោះ ហើយម៉ាស៊ីនអារឈើទាំង២ខាងលើនេះ ក៍កំពុងបញ្ចេញសំឡេងរំខានដល់ប្រជាពលរដ្ឋជិតខាងជារៀងរាល់ថ្ងៃផងដែរ មិនត្រឹមតែប៉ុណ្ណោះ ការដឹកឈើលើផ្លូវនោះបានធ្វើឱ្យផ្លូវលំមួយចំនួនខូចខាតជាច្រើនផងទៀតដែរ៕
ចែករំលែកព័តមាននេះ