ខេត្តសៀមរាប ៖ ក្រុមមន្ត្រីបុគ្គលិកនៃសាលាដំបូងខេត្តសៀមរាបប្រមាណ១២០នាក់ កំពុងប្រឹងប្រែងបំពេញការងារទាំងក្នុងចិត្តភ័យព្រួយពីសុវត្ថិភាពផ្ទាល់ខ្លួន ខណៈអគារបំរើការរបស់ពួកគេ កំពុងស្ថិតនៅក្រោមការប្រកាសអាសន្ននៃហានិភ័យកម្រិតខ្ពស់ ដោយមានស្នាមប្រេះជាអន្លើៗ ព្រមទាំងមានការញ័ររញ្ជួយយ៉ាងខ្លាំងផងដែរ។
ចៅក្រមសាលាដំបូងខេត្តមួយរូបបានប្រាប់ក្នុងលក្ខខណ្ឌមិនបញ្ចេញឈ្មោះថា អគារហ្នឹងបានប្រេះជាច្រើនកន្លែង ទាំងនៅលើជញ្ជាំង ទាំងនៅលើពិតាន និងសសរផងដែរ ជាពិសេសនៅពេលមានខ្យល់និងភ្លៀងម្តងៗ អគារហ្នឹងបានញ័ររញ្ជួយ ធ្វើឲ្យបុគ្គលិកបំរើការទាំងអស់ភ័យព្រលឹងចុងសក់ រត់ចេញទៅខាងក្រៅ ដើម្បីរកទីឋានសុវត្ថិភាពរៀងៗខ្លួន។ លោកបន្តថា ករណីនេះយើងបានធ្វើសំណើរទៅក្រសួងយុត្តិធម៌ សុំសាងសង់អគារថ្មីរួចហើយ ក៏ប៉ុន្តែនៅពេលចំពោះមុខ យើងមិនមានដំណោះស្រាយបន្ទាន់ណាមួយឲ្យបានប្រសើរ ក្រៅផ្សារសសរដែកទល់តាមសសរបេតុង និងទំលាយជញ្ជាំងធ្វើច្រកសុវត្ថិភាពមួយបន្ថែមទៀតសំរាប់ទុកឲ្យមនុស្សរត់ចេញទៅក្រៅ ពេលមានគ្រោះថ្នាក់កើតឡើង។
ជាមួយគ្នាដែរមន្ត្រីក្រឡាបញ្ជីមួយរូបទៀតបានបង្ហើបថា អគាររដ្ឋបាលសាលាដំបូងខេត្តដែលកំពុងបញ្ចេញស្មាមប្រេះហ្នឹង ទើបតែមានអាយុមិនដល់១០ឆ្នាំនៅឡើយទេ។ អគារហ្នឹងត្រូវបានសាងសង់ឡើងដោយក្រុមហ៊ុនរបស់លោកឧកញ៉ាអ៊ុំ យូរី បន្ទាប់ពីទីតាំងសាលាដំបូងចាស់នៅក្បែរភ្លើងស្តុបសុខា កណ្តាលក្រុងទេសចរសៀមរាប ត្រូវបានលក់កាលពីឆ្នាំ ២០០៦ ក្រោមរូបភាពដោះដូរទីតាំង។ មន្ត្រីក្រឡាបញ្ជីដដែលបានអះអាងថា បច្ចុប្បន្នមានមន្ត្រីបំរើការនៅក្នុងអគារនេះទាំងចៅក្រម ទាំងអយ្យការ ទាំងក្រឡាបញ្ជី និងបុគ្គលិកជាប់កិច្ចសន្យា សរុបប្រមាណ១២០ នាក់ ។ ពួកគេមកធ្វើការទាំងចិត្តមិនស្ងប់ និងប្រថុយប្រថានខ្ពស់ ព្រោះមិនដឹងថាពេលណានឹងជួបគ្រោះថ្នាក់ដល់អាយុជីវិត ឬពិការបាក់ដៃបាក់ជើងក៏ថាបាន។
ជុំវិញបញ្ហានេះដែរ មន្ត្រីស៊ើបអង្កេតសមាគមន៏សិទ្ធិមនុស្សអាដហុកប្រចាំខេត្តសៀមរាប លោកសួស ណារិន បានថ្លែងនៅរសៀលថ្ងៃទី២៩ កញ្ញា ឆ្នាំ២០១៤ ថា កិច្ចការវាយតម្លៃទៅលើគុណភាពសំណង់អគារណាមួយ វាជាបន្ទុករបស់មន្ត្រីជំនាញផ្នែកសំណង់ ក៏ប៉ុន្តែបើពិនិត្យផ្ទាល់ភ្នែកទៅលើអគារសាលាដំបូងខេត្តហ្នឹងពិតជាមានស្នាមប្រេះជាច្រើនកន្លែងអិចឹងមែន ៕
ចែករំលែកព័តមាននេះ