រាជធានីភ្នំពេញ ៖ ប្រភពពីស្នងការដ្ឋាននគរបាលរាជធានីភ្នំពេញបានបង្ហើបឲ្យដឹងថា អ្នកបើកបររថយន្តម្នាក់ដែលបង្កគ្រោះថ្នាក់ចរាចរណ៍មិនទទួលខុសត្រូវហើយបើករត់ និង ត្រូវប្រជាពលរដ្ឋជិះដេញតាម ហើយវាយកម្ទេចរថយន្តកាលពីថ្ងៃទី២៩កញ្ញាម្សិលមិញនោះ បានត្រូវប៉ូលិសដោះលែងវិញហើយ បន្ទាប់ពីមានអន្តរាគមន៍ ។
គេមិនដឹងថា តើអ្នកបើកបររថយន្តបង្កឈ្មោះ ធី សុវណ្ណរិទ្ឋ ជាកូនចៅរបស់មន្រ្តីណា ឬ អ្នកជំនួញណានោះទេ បានជាប៉ូលិសដោះលែងក្រោយមានការអន្តរាគមន៍បែបនេះ ។
នៅព្រឹកថ្ងៃទី៣០ កញ្ញា ២០១៤ កោះសន្តិភាពមិនអាចរកការសុំអត្ថាធិប្បាយបានភ្លាមៗទេពីនគរបាលជាន់ខ្ពស់នៃស្នងការដ្ឋាននគរបាលរាជធានីភ្នំពេញ ។
ក្រុមអ្នកវិភាគនិងតាមដានស្ថានភាពសង្គមក្នុងប្រទេសកម្ពុជាបានលើកឡើងថា ការដោះលែងជនសង្ស័យដែលបង្កគ្រោះថ្នាក់ចរាចរណ៍ និង បញ្ហាជាច្រើនទៀត ដោយសារតែវប្បធ៌មនៃការអន្តរាគមន៍ពីសំណាក់អ្នកមានអំណាច និងលុយកាក់យ៉ាងនេះហើយ ដែលធ្វើឲ្យមានអំពើហិង្សាកើតឡើងនៅតាមទីសាធារណៈពីសំណាក់អ្នកឃើញហេតុការណ៍ផ្ទាល់ ព្រោះពួកគេយល់ថាជនសង្ស័យជាកូនអ្នកមានអំណាច ឬអ្នកជំនួញធំណាម្នាក់ បើធ្លាក់ទៅដល់ដៃសមត្ថកិច្ចមិនយូរមិនឆាប់គង់តែដោះលែងដដែលជាដដែលនោះ ។
លើសពីនេះទៀត ប្រសិនបើមានការដោះលែងជនសង្ស័យបង្កគ្រោះថ្នាក់ចរាចរណ៍ខាងលើមែននោះ គឺវាផ្ទុយទៅអនុសាសន៍របស់សម្តេចតេជោ ហ៊ុន សែន ដែលកន្លងមក សម្តេចបានអំពាវនាវឲ្យលុបបំបាត់វប្បធ៌មនៃការអន្តរាគមន៍នេះ ។ គេហទំព័រកោះសន្តិភាព មិនចង់ឲ្យអ្នកណាម្នាក់ទទួលទោសទណ្ឌនោះទេ ប៉ុន្តែបើរកឃើញថា ជនសង្ស័យពិតជាបានបង្កគ្រោះថ្នាក់មែន ត្រូវតែអនុវត្តន៍ទៅតាមច្បាប់ ខណៈដែលរាជរដ្ឋាភិបាលបាននិងកំពុងធ្វើការកែទម្រង់ស៊ីជម្រៅលើគ្រប់ស្ថាប័នរដ្ឋ ធ្វើយ៉ាងណាឲ្យប្រទេសដ៍អភ័ព្វមួយនេះ ក្លាយជានីតរដ្ឋនិងមានការអភិវឌ្ឍរីកចម្រើនក្នុងពេលដ៍ខ្លីខាងមុខ ។
គួររំលឹកថា រថយន្តកាមរីហាយប្រ៊ីតមួយគ្រឿង ពណ៌ស អត់ស្លាកលេខ ត្រូវបានក្រុមប្រជាពលរដ្ឋ អ្នករត់ម៉ូតូឌុប និងក្រុមយុវជន ដេញតាមវាយរងការខូចខាតស្ទើរទាំងស្រុង បន្ទាប់ពីរថយន្តមួយគ្រឿងនេះ បង្កគ្រោះថ្នាក់ចរាចរណ៍ហើយបើករត់ មិនព្រមទទួលខុសត្រូវ ។
ហេតុការណ៍នេះ បង្កឱ្យផ្អើលដល់សមត្ថកិច្ចចុះអន្តរាគមន៍ និងមានការកកស្ទះចរាចរយ៉ាងខ្លាំង កាលពីម៉ោង១២និង១០នាទីថ្ងៃត្រង់ ថ្ងៃទី២៩ កញ្ញា ២០១៤ នៅខាងជើងស្តុបទួលគោក (ចំណុចរង្វង់មូលទួលគោក) សង្កាត់បឹងកក់ទី២ ខណ្ឌទួលគោក ។
បើតាមសេក្តីរាយការណ៍ឱ្យដឹងថា រថយន្តខាងលើ បើកបរដោយឈ្មោះ ធី សុវណ្ណរិទ្ធ ។ ដំបូង រថយន្តនេះបានបង្កគ្រោះថ្នាក់ចរាចរណ៍ដោយបុកម៉ូតូវីវ៉ាមួយគ្រឿងរបស់និស្សិតម្នាក់ បណ្តាលឱ្យរងរបួស នៅតាមផ្លូវ២១៨ កែងនឹងផ្លូវព្រះ នរោត្តម សង្កាត់ចតុមុខ ខណ្ឌដូនពេញ ហើយក្រោយពីកើតហេតុ ជនបង្កមិនបានចុះមើលជនរងគ្រោះនោះទេ ព្យាយាមបើករត់ទៅដល់ចំណុចមុខធនាគារជាតិ ក៏ត្រូវក្រុមប្រជាពលរដ្ឋ និងអ្នករត់ម៉ូតូឌុបដេញតាមគប់បែកកញ្ចក់រថយន្តខ្ទេច និងចាប់ឃាត់បាន ហើយបន្ទាប់មកក៏ដឹងដល់សមត្ថកិច្ចចុះអន្តរាគមន៍ភ្លាមៗ ។
គួរកត់សម្គាល់ថា ពេលកម្លាំងសមត្ថកិច្ចស្ទូចយករថយន្តបង្ក និងអ្នកបើកបរទៅកាន់ការិយាល័យចរាចរណ៍ផ្លូវគោក ក្រុមប្រជាពលរដ្ឋខាងលើ ក៏បានដេញតាមយកដុំថ្មដេញគប់វាយបំបែកកញ្ចក់រថយន្តម្តងទៀតនៅចំណុចរង្វង់មូលទួលគោក បណ្តាលឱ្យរងការខូចខាតស្ទើរទាំងស្រុង និងអ្នកបើកបររថយន្តរងរបួសផងដែរ ៕
ចែករំលែកព័តមាននេះ