រាជធានីភ្នំពេញ ៖ សាលារាជធានីភ្នំពេញបានអនុញ្ញាតឲ្យសមាគមគ្រូបង្រៀនកម្ពុជាឯករាជ្យជួបជុំគ្រូបង្រៀនចំនួន២០០នាក់ នៅទីលានប្រជាធិបតេយ្យដើម្បីអបអរសាទរទិវាគ្រូបង្រៀនពិភពលោក ថ្ងៃទី០៥ តុលា ។
ការអនុញ្ញាតនេះ បានធ្វើឡើងនៅក្នុងកិច្ចប្រជុំនៅព្រឹកថ្ងៃទី៣០ កញ្ញា ២០១៤ ក្រោមអធិបតីភាព លោក ឃួង ស្រេង អភិបាលរងរាជធានីភ្នំពេញ និង មានការចូលរួមពីលោក ម៉ៃ សុភក្ត្រា តំណាងសមាគមគ្រូបង្រៀនកម្ពុជាឯករាជ្យ ។
ជាការកត់សម្គាល់កិច្ចប្រជុំខាងលើនេះ បានធ្វើឡើងបន្ទាប់ពីលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ កាលពីថ្ងៃទី១៨ កញ្ញា ២០១៤ បានដាក់លិខិតជូនដំណឹងទៅសាលារាជធានីភ្នំពេញ ដោយសុំរៀបចំអបអរសាទរទិវាគ្រូបង្រៀនពិភពលោក ថ្ងៃទី០៥ តុលា នៅទីលានប្រជាធិបតេយ្យដោយមានតំណាងសមាគមគ្រូបង្រៀនមកពីតាមបណ្តារាជធានី-ខេត្តទូទំាងប្រទេសសរុប៦០០នាក់ ។
តាមកម្មវិធីរបស់សមាគមគ្រូបង្រៀនកម្ពុជាឯករាជ្យ នៅថ្ងៃទី០៥តុលាខាងមុខ ក៍មានការហែក្បួនដាក់ញ្ញត្តិនៅក្រសួងអប់រំ យុវជន និង កីឡាផងដែរ ប៉ុន្តែសាលារាជធានីភ្នំពេញអនុញ្ញាតឲ្យមានការជួបជុំតែ២០០នាក់ និង មិនឲ្យមានការហែក្បួននោះទេ ។
យ៉ាងណាក៍ដោយបើតាមអ្នកឆ្លើយឆ្លងព័ត៌មានកោះសន្តិភាព ឆ្លងតាមកិច្ចប្រជុំនៅព្រឹកមិញ ទោះបីជាមិនអនុញ្ញាតឲ្យមានការហែក្បួន តែសាលាក្រុងបានអនុញ្ញាតឲ្យមនុស្ស២៥នាក់ តំណាងឲ្យសមាគមគ្រូបង្រៀនកម្ពុជាមកពីរាជធានី-ខេត្តទំាង២៥ ជិះម៉ូតូយកញ្ញត្តិទាមទារទៅដាក់នៅក្រសួងអប់រំ ។
លោក រ៉ុង ឈុន ប្រធានសហភាពការងារកម្ពុជា និង ជាប្រធានសមាគមគ្រូបង្រៀនកម្ពុជាឯករាជ្យ មិនអាចទាក់ទងដើម្បីសុំសេចក្តីអត្ថាធិប្បាយបានភ្លាមៗនៅឡើយទេ នៅព្រឹកថ្ងៃទី៣០ កញ្ញា ២០១៤ ៕
ចែករំលែកព័តមាននេះ